ଭୁବନେଶ୍ୱର,୪।୧୧(ବ୍ୟୁରୋ): ଯିଏ କଂଗ୍ରେସରେ ରହି ବିଜେଡି ଏବଂ ଭାଜପା ସହ ସମ୍ପର୍କରେ ଅଛ ସେମାନେ ଆଉ ଏ ଦଳରେ ରୁହନାହିଁ। ସେମାନଙ୍କ ବିଷୟରେ ମୋ ପାଖରେ ତଥ୍ୟ ଅଛି। ଯଦି ନିଜର ଏଭଳି କାର୍ଯ୍ୟରୁ ବିରତ ନ ରୁହ ଆଉ ବରଦାସ୍ତ କରାଯିବ ନାହିଁ, ସିଧା ଦଳରୁ ବିଦା କରିଦିଆଯିବ। ତୁମମାନଙ୍କ ଯୋଗୁ ବର୍ଷ ବର୍ଷ ଧରି କଂଗ୍ରେସ ସହ ଯୋଡ଼ିହୋଇ ରହିଥିବା କର୍ମୀମାନେ ହଇରାଣ ହୋଇଗଲେଣି। ତୁମମାନଙ୍କ ବ୍ୟକ୍ତିଗତ ସ୍ବାର୍ଥ ଲାଗି ଆଉ ସେହି କର୍ମୀମାନଙ୍କୁ ହଇରାଣ ହେବାକୁ ଦିଆଯିବ ନାହିଁ। ଯେଉଁ କର୍ମୀମାନେ ତୁମମାନଙ୍କ ଯୋଗୁ ନିଜର ଜୀବନ ଜୀବିକା ହରାଇଛନ୍ତି ସେମାନଙ୍କୁ ନ୍ୟାୟ ମିଳିବ ବୋଲି କହି ଦଳୀୟ ନେତାମାନଙ୍କ ଉପରେ କଂଗ୍ରେସ ପ୍ରଭାରୀ ଏ. ଚେଲ୍ଲାକୁମାର ପ୍ରବଳ ବର୍ଷିଛନ୍ତି। ତାଙ୍କର ଏଭଳି ଶାଣିତ ଆକ୍ରମଣ ଦଳୀୟ ନେତାଙ୍କ ଚିନ୍ତା ବଢ଼ାଇ ଦେଇଛି।
ଗତ ସୋମବାର କଂଗ୍ରେସର ରାଜ୍ୟ ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକ କଂଗ୍ରେସ ଭବନଠାରେ ଅନୁଷ୍ଠିତ ହୋଇଥିଲା। ବୈଠକରେ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନିରଞ୍ଜନ ପଟ୍ଟନାୟକ, ପୂର୍ବତନ ପିସିସି ସଭାପତି ଜୟଦେବ ଜେନା, ଶରତ ପଟ୍ଟନାୟକ, ଗଣେଶ୍ୱର ବେହେରା, ପୂର୍ବତନ ମହିଳା ସଭାପତି ସସ୍ମିତା ବେହେରା ଏବଂ ବିଧାୟକ ମହମ୍ମଦ ମୋକିମ ଓ ତାରାପ୍ରସାଦ ବାହିନୀପତି ପ୍ରମୁଖ ବରିଷ୍ଠ ନେତାମାନେ ଉପସ୍ଥିତ ଥିଲେ। ସୋମବାର ଠାରୁ ଦଳର ନୂଆ ମେମ୍ବରଶିପ୍ ଡ୍ରାଇଭ୍ର ମଧ୍ୟ ଶୁଭାରମ୍ଭ କରାଯାଇଥିଲା। ଏହି ପ୍ରସଙ୍ଗରେ କାର୍ଯ୍ୟକାରିଣୀରେ ଅଭିଭାଷଣ କାର୍ଯ୍ୟକ୍ରମ ଚାଲିଥିଲା। ଏନେଇ ପିସିସି ସଭାପତି ନିଜର ଅଭିଭାଷଣ ରଖିବା ପରେ ସିଧା ଚେଲ୍ଲାକୁମାର ନିଜ ମତ ରଖିଥିଲେ। ଏଥିରେ କେତେଜଣ ବିଧାୟକ ଓ ବରିଷ୍ଠ ନେତାଙ୍କୁ କହିବାର ସୁଯୋଗ ନ ମିଳିବାରୁ ସେମାନେ ରାଗିଯାଇଥିଲେ। ସଙ୍ଗେ ସଙ୍ଗେ ଜଣେ ବିଧାୟକ ବୈଠକରୁ ବାହାରିଯାଇ ସିଧା ଗଣମାଧ୍ୟମକୁ କହିଲେ, ଏଠାରେ ଆମର କିଛି ସମ୍ମାନ ନାହିଁ। ତେଣୁ ଏହି ବୈଠକରେ ରହିବାର କିଛି ଆବଶ୍ୟକତା ନାହିଁ । ଏକଥା ବୈଠକ ଭିତରେ ଥିବାବେଳେ ଚେଲ୍ଲାକୁମାରଙ୍କ କାନରେ ପଡ଼ିଯାଇଥିଲା। ଏହାପରେ ଚିହିଁକି ଉଠି ସେ କହିଥିଲେ, ବହୁ ନେତା ଏଠି ଅଛନ୍ତି ଯେଉଁମାନେ ବିଜେଡି ଓ ଭାଜପା ସମ୍ପର୍କରେ ରହିଛନ୍ତି। ସେମାନେ ଆଉ ଦଳର କ୍ଷତି ନ କରି ନିଜ ଆଡୁ ଛାଡ଼ିଦିଅନ୍ତୁ। ଯେଉଁମାନେ ଗଣମାଧ୍ୟମକୁ ଯାଇ ୟାଡୁସାଡୁ ମତାମତ ଦେଇ ଦଳର କ୍ଷତି କରିବାକୁ ଚାହୁଁଛନ୍ତି ସେମାନେ ସତର୍କ ହୋଇଯାଆନ୍ତୁ। ଏଥିସହ କଂଗ୍ରେସ ସମ୍ବିଧାନ ଯାହାକୁ ଜଣାନାହିଁ ସେମାନେ ଦଳରେ ନ ରୁହନ୍ତୁ ବୋଲି ସେ କହିଥିଲେ। ପରେ ଚେଲ୍ଲାକୁମାର ପିପିଲି ଉପନିର୍ବାଚନ ଫଳାଫଳ ବାହାରିବା ଦିନ କଂଗ୍ରେସ ଭବନରେ ପଶି ତାଲା ପକାଇ ଚେୟାର, ଟେବୁଲ ଭାଙ୍ଗିଥିବା ନେତା ଓ କର୍ମୀଙ୍କୁ ଶାଣିତ ଆକ୍ରମଣ କରି କହିଥିଲେ, ଯାହାର ପିସିସି ସଭାପତିଙ୍କ ଉପରେ ରାଗ ଅଛି ସେମାନେ ଜଣାନ୍ତୁ, ସେଥିରେ କିଛି ନାହିଁ। ସେହି କଥା ଲାଗି କଂଗ୍ରେସର କ୍ଷତି କଲେ କ୍ଷମା ମିଳିବନାହିଁ।
ଅନ୍ୟପଟେ କଂଗ୍ରେସ ଭବନରେ ଭଙ୍ଗାରୁଜା ଘଟଣାକୁ ଗଣମାଧ୍ୟମରେ ଖବର ଦେଇ ଦଳର କ୍ଷତି କରିଥିବା ନେତା ଓ କର୍ମୀଙ୍କ ତାଲିକା ଚେଲ୍ଲାକୁମାର ମଗାଇଛନ୍ତି। ଏହି ତାଲିକା ପ୍ରସ୍ତୁତ କାର୍ଯ୍ୟ ଶେଷ ହୋଇଥିବା ଜାଣିବାକୁ ମିଳିଛି। ସେମାନଙ୍କୁ ଦଳ ପକ୍ଷରୁ ଗୁରୁବାର ସୁଦ୍ଧା ବହିଷ୍କାର କରିଦିଆଯିବ ବୋଲି ବିଶେଷ ସୂତ୍ରରୁ ଜଣାପଡ଼ିଛି। ଅନ୍ୟପଟେ ଯେଉଁମାନେ ଦଳର କ୍ଷତି ହେବା ଭଳି କାମ କରନ୍ତି ସେମାନଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନେବା ଲାଗି ମଧ୍ୟ ହାଇକମାଣ୍ଡଙ୍କଠାରୁ ଚେଲ୍ଲାକୁମାର ନିର୍ଦ୍ଦେଶ ପାଇଥିବା ଜାଣିବାକୁ ମିଳିଛି।
