ଓ୍ବାଶିଂଟନ୍,୨୬।୩: ହ୍ବାଇଟ ହାଉସ ପ୍ରେସ ସଚିବ କାରୋଲିନ ଲିଭିଟ କହିଛନ୍ତି ଯେ ଆମେରିକା ଗତ ତିନି ଦିନ ଧରି ଇରାନ ସହିତ ଆଲୋଚନା କରୁଛି ଏବଂ ଏକ ଆଂଶିକ ଯୁଦ୍ଧବିରତି କାର୍ଯ୍ୟକାରୀ ହୋଇଛି। ରାଷ୍ଟ୍ରପତି ଟ୍ରମ୍ପ ଯୋଜନାବଦ୍ଧ ଆକ୍ରମଣକୁ ଅସ୍ଥାୟୀ ଭାବରେ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି, ବିଶେଷକରି ଇରାନର ବିଦ୍ୟୁତ୍ କେନ୍ଦ୍ର ଏବଂ ଶକ୍ତି ଭିତ୍ତିଭୂମି ବିରୁଦ୍ଧରେ। ରାଷ୍ଟ୍ରପତି ଟ୍ରମ୍ପ ଶାନ୍ତି ଚାହାଁନ୍ତି। ଯୁଦ୍ଧରେ ଆଉ ମୃତ୍ୟୁ ଏବଂ ବିନାଶର ଆବଶ୍ୟକତା ନାହିଁ। ଇରାନ ଏହି ଭ୍ରମ ପୋଷଣ କରିବା ଉଚିତ୍ ନୁହେଁ ଯେ ସେ ଏଥିରୁ ଖସିଯିବ। ଯଦି ଇରାନ ଏହାର ସାମରିକ ପରାଜୟକୁ ଗ୍ରହଣ କରେ ନାହିଁ, ତେବେ ପୂର୍ବ ଅପେକ୍ଷା ଅଧିକ କଠିନ ଭାବରେ ଆଘାତ ପାଇବ। ରାଷ୍ଟ୍ରପତି ଟ୍ରମ୍ପ ଯାହା କୁହନ୍ତି ତାହା କରନ୍ତି। ସେ ଇରାନକୁ “ନର୍କ”ରେ ପରିଣତ କରିବେ।
ଲିଭିଟ ଆହୁରି କହିଛନ୍ତି, ଇରାନ ଆମେରିକାର ୧୫-ସୂତ୍ରୀ ଯୁଦ୍ଧବିରତି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି। ସେ କହିଛନ୍ତି , ଆଲୋଚନା ଏବେ ବି ଚାଲିଛି ଏବଂ କିଛିଟା ସକାରାତ୍ମକ ହୋଇଛି। ତଥାପି, ଭୂମିରେ ଉତ୍ତେଜନା କମିନାହିଁ। ଇରାନ କୁଏତ୍ ଅନ୍ତର୍ଜାତୀୟ ବିମାନବନ୍ଦର ଉପରେ ଏକ ବଡ଼ ଆକ୍ରମଣ କରିଥିଲା, ଯାହାର ଜବାବରେ ପେଣ୍ଟାଗନ ଏବେ ୮୨ତମ ଏୟାରବର୍ଣ୍ଣ ଡିଭିଜନରୁ ୧୦୦୦ରୁ ଅଧିକ ଅତିରିକ୍ତ ସୈନ୍ୟଙ୍କୁ ମଧ୍ୟପ୍ରାଚ୍ୟକୁ ପଠାଇବାକୁ ପ୍ରସ୍ତୁତ ହେଉଛି। ଯଦିଓ ସେ କିଛି ଗଣମାଧ୍ୟମ ରିପୋର୍ଟକୁ ସମ୍ପୂର୍ଣ୍ଣ ଭାବରେ ନିଶ୍ଚିତ କରି ନଥିଲେ, ସେ ସ୍ବୀକାର କରିଛନ୍ତି ଯେ ପ୍ରସ୍ତାବରେ କିଛି ସତ୍ୟତା ଅଛି।
