ଭଞ୍ଜନଗର,୮।୧୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଫୁଲବାଣୀ ମୁଖ୍ୟ ରାସ୍ତାର ସୋରାଦେବୀ ମନ୍ଦିର ନିକଟରେ ସୋମବାର ସନ୍ଧ୍ୟାରେ ଏକ ଅଜଣା ଜନ୍ତୁକୁ ଧକ୍କା ଦେଇ ଜଣେ ବାଇକ ଚାଳକ ଗୁରୁତର ଭାବେ ଆହତ ହୋଇଛନ୍ତି। ସେ ହେଲେ କଣ୍ଟେଇପଲ୍ଲୀର ଜି ଏସ୍ ସ୍ବାଇଁ। ଖବରପାଇ ସେହି ରାସ୍ତାରେ ଆସୁଥିବା ଭେଜିପୁଟର କିଛି ଯୁବକ ତାଙ୍କୁ ଉଦ୍ଧାର କରି ଚିକିତ୍ସା ପାଇଁ ଭଞ୍ଜନଗର ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରିଛନ୍ତି। ଘଟଣାରୁ ପ୍ରକାଶ ଯେ, ଯୁବକ ଜଣଙ୍କ ଫୁଲବାଣୀରୁ ଆଜି କୌଣସି କାମରେ ଭଞ୍ଜନଗର ଆସୁଥିଲେ। ବାଟରେ ସୋରାଦେବୀ ମନ୍ଦିର ନିକଟରେ ହଠାତ୍ ଜଙ୍ଗଲ ଭିତରୁ ଏକ ଜନ୍ତୁ ବାଇକ ଆଗକୁ ଚାଲି ଆସିଥିଲା। ଫଳରେ ବାଇକ ଚାଳକ ଭାରସାମ୍ୟ ହରାଇ ଉକ୍ତ ଅଜଣା ଜନ୍ତୁକୁ ଧକ୍କା ଲଗାଇ ରାସ୍ତା କଡ଼ରେ ପଡ଼ିଥିଲେ। ଏହି ସମୟରେ ଭେଜିପୁଟର ମିଥୁନ ସାଇଁ ଏବଂ ଅନ୍ୟମାନେ ସୂଚନା ପାଇ ଉକ୍ତ ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ଭଞ୍ଜନଗର ଆଣିଥିଲେ। ବିଗତ କିଛି ମାସ ହେବ ଉକ୍ତ ରାସ୍ତାରେ ବାରମ୍ବାର ଦୁର୍ଘଟଣା ଘଟୁଛି। ଦ୍ରୁତ ଗତିରେ ଗାଡି ଚଳାଇବା, ମଦୁଆ ଚାଳକ, ଜାତୀୟ ରାଜପଥ ଉପରେ ବନ୍ୟପ୍ରାଣୀଙ୍କ ଚଳପ୍ରଚଳ ବୃଦ୍ଧି ପ୍ରମୁଖ କାରଣ ଯୋଗୁଁ ଦୁର୍ଘଟଣା ବଢୁଛି। ଏହିଭଳି ପରିସ୍ଥିତିରେ ଗତ ଗୁରୁବାର ରାତିରେ ଆଜି ଦୁର୍ଘଟଣା ଘଟିଥିବାସ୍ଥଳ ଠାରୁ କିଛି ଦୂରରେ ଏକ କଲରାପତରିଆ ବାଘ ଗୋଟିଏ ଗାଈ ବାଛୁରୀକୁ ମାରି ଖାଇଥିଲା। ଆଜି କେଉଁ ଜନ୍ତୁ ହଠାତ୍ ରାସ୍ତା ଉପରକୁ ଦ୍ରୁତ ଗତିରେ ଆସିଲା ତାହା ବାଇକ ଚାଳକ ଜାଣି ପାରୁନାହାନ୍ତି।
