ମା’ ଅନ୍ନପୂର୍ଣ୍ଣାଙ୍କ ଫଟୋ ହେଉ ଅବା ମୂର୍ତ୍ତିକୁ ଘରେ ରଖି ନିଷ୍ଠାର ସହ ପୂଜା କଲେ ମଙ୍ଗଳ ହେବା ସହ ସୌଭାଗ୍ୟପ୍ରାପ୍ତି ହୋଇଥାଏ ବୋଲି ଅନେକଙ୍କର ବିଶ୍ୱାସ ରହିଛି। ବାସ୍ତୁଶାସ୍ତ୍ରରେ ବି ଏକଥାକୁ ସ୍ବୀକାର କରାଯାଇଛି। କିନ୍ତୁ ବାସ୍ତୁଶାସ୍ତ୍ର ଅନୁଯାୟୀ, ମାତାଙ୍କର ଫଟୋକୁ କେଉଁ ଦିଗରେ ରଖିଲେ ଅଧିକ ସୁଫଳ ମିଳିଥାଏ ଆସନ୍ତୁ ଜାଣିବା ସେ ସମ୍ପର୍କରେ…
* ମା’ ଅନ୍ନପୂର୍ଣ୍ଣାଙ୍କ ଫଟୋକୁ ଘରର ଆଗ୍ନେୟ କୋଣରେ ଲଗାଇଲେ ଘରେ ସୁଖସମୃଦ୍ଧି ବଢ଼ିବା ସହ ସୌଭାଗ୍ୟପ୍ରାପ୍ତି ହୋଇଥାଏ ବୋଲି ବିଶ୍ୱାସ କରାଯାଏ। କେବଳ ସେତିକି ନୁହେଁ, ଏହି କୋଣରେ ମା’ଙ୍କର ଫଟୋ ରହିଲେ ପରିବାର ଲୋକଙ୍କର ସ୍ବାସ୍ଥ୍ୟ ଭଲ ରହିବା ସହ ଘରୁ ବାସ୍ତୁଦୋଷ ଦୂର ହୋଇଥାଏ ବୋଲି ବିଶ୍ୱାସ ରହିଛି।
* ମା’ ଅନ୍ନପୂର୍ଣ୍ଣାଙ୍କର ସମ୍ବନ୍ଧ ଅନ୍ନ ବା ଖାଦ୍ୟ ସହ ରହୁଥିବାରୁ ମା’ଙ୍କ ଫଟୋକୁ ରୋଷେଇ ଘରେ ଲଗାଇବା ଶୁଭ ହୋଇଥାଏ। ଏହାଦ୍ୱାରା ଘରେ କେବେ ବି ଖାଦ୍ୟର ଅଭାବ ଦେଖାଯାଇ ନ ଥାଏ। ଏପରି କି ରନ୍ଧାଯାଇଥିବା ଖାଦ୍ୟ ସାତ୍ତ୍ୱିକ ହେବା ସହ ସୁସ୍ବାଦୁ ଲାଗିଥାଏ ବୋଲି ଅନେକଙ୍କର ବିଶ୍ୱାସ ରହିଛି।
* ମା’ ଅନ୍ନପୂର୍ଣ୍ଣାଙ୍କୁ ପ୍ରସନ୍ନ କରିବାକୁ ହେଲେ ମୁଗ ଡାଲିରେ ପ୍ରସ୍ତୁତ କିଛି ବ୍ୟଞ୍ଜନକୁ ପ୍ରସାଦ ରୂପେ ଅର୍ପଣ କରି ସେହି ପ୍ରସାଦକୁ ଗୋମାତାକୁ ଖାଇବା ପାଇଁ ଦେଲେ ଘରର ଯଶ ଖ୍ୟାତି ବଢ଼ିଥାଏ ବୋଲି ବିଶ୍ୱାସ କରାଯାଏ।
* ମା’ଙ୍କ ଫଟୋ ରହିଥିବା ସ୍ଥାନକୁ ସର୍ବଦା ସଫାସୁତରା ରଖିବା ସହ ପ୍ରତିଦିନ ଧୂପ, ଦୀପ ଦେଇ ପୂଜା କଲେ ଘରର ଐଶ୍ୱର୍ଯ୍ୟ ବୃଦ୍ଧି ହୋଇଥାଏ।
