ନୂଆଦିଲ୍ଲୀ,୧୧।୮: ଦେଶର ପୂର୍ବତନ ଉପରାଷ୍ଟ୍ରପତି ଜଗଦୀପ ଧନକର ୨୧ ଜୁଲାଇରେ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ। ସେ ଏହି ଇସ୍ତଫା ପଛରେ ସ୍ବାସ୍ଥ୍ୟ କାରଣ ଦର୍ଶାଇଥିଲେ। ତଥାପି, ଇସ୍ତଫା ପରେ କେହି ତାଙ୍କୁ ଦେଖିନାହାଁନ୍ତି କିମ୍ବା ସେ କୌଣସି କାର୍ଯ୍ୟକ୍ରମରେ ଯୋଗ ଦେଇନାହାଁନ୍ତି। ଏହି କାରଣରୁ ବିରୋଧୀ ଦଳ ଏବେ ସରକାରଙ୍କୁ ଏ ବିଷୟରେ ପ୍ରଶ୍ନ ଉଠାଉଛି। ଶିବସେନା (UBT) ନେତା ସଞ୍ଜୟ ରାଉତ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ଏକ ଚିଠି ଲେଖି ହେବିୟସ କର୍ପସ ଆବେଦନ ପାଇଁ ଚେତାବନୀ ଦେଇଛନ୍ତି।
ଶିବସେନା (UBT) ନେତା ଏବଂ ରାଜ୍ୟ ସଭା ଏମ୍ପି ସଞ୍ଜୟ ରାଉତ ଅମିତ ଶାହଙ୍କୁ ଏକ ଚିଠି ଲେଖି ଉପରାଷ୍ଟ୍ରପତି ଏବଂ ରାଜ୍ୟ ସଭା ଅଧ୍ୟକ୍ଷ ଜଗଦୀପ ଧନଖରଙ୍କ ହଠାତ୍ ଇସ୍ତଫା ଏବଂ ସେବେଠାରୁ ତାଙ୍କ ନିଖୋଜ ହେବା ଉପରେ ଗମ୍ଭୀର ଚିନ୍ତା ପ୍ରକାଶ କରିଛନ୍ତି।
ରାଉତ ଚିଠିରେ କହିଛନ୍ତି, ୨୧ ଜୁଲାଇରେ ଧନଖର ଉଚ୍ଚ ସଦନର କାର୍ଯ୍ୟ ସ୍ବାଭାବିକ ଭାବରେ ପରିଚାଳନା କରୁଥିଲେ ଏବଂ ସମ୍ପୂର୍ଣ୍ଣ ସୁସ୍ଥ ଦେଖାଯାଉଥିଲେ। ତଥାପି, ସେହି ସନ୍ଧ୍ୟାରେ ସେ ସ୍ବାସ୍ଥ୍ୟ କାରଣ ଦର୍ଶାଇ ଇସ୍ତଫା ଦେଇଥିଲେ। ରାଉତଙ୍କ ଅନୁଯାୟୀ, ସେବେଠାରୁ ଧନକରଙ୍କ ସ୍ବାସ୍ଥ୍ୟ କିମ୍ବା କେଉଁଠି ଅଛନ୍ତି ସେ ବିଷୟରେ କୌଣସି ସରକାରୀ ସୂଚନା ପ୍ରକାଶ କରାଯାଇ ନାହିଁ।
୧୦ ଅଗଷ୍ଟରେ ଲେଖାଯାଇଥିବା ଏହି ଚିଠିରେ ସଞ୍ଜୟ ରାଉତ କହିଛନ୍ତି, ଅନେକ ଏମ୍ପି ଧନକରଙ୍କ ସହିତ ଯୋଗାଯୋଗ କରିବାକୁ ଚେଷ୍ଟା କରିଥିଲେ, କିନ୍ତୁ ବିଫଳ ହୋଇଛନ୍ତି। ତାଙ୍କ କର୍ମଚାରୀଙ୍କ ପକ୍ଷରୁ ମଧ୍ୟ କୌଣସି ଉତ୍ତର ମିଳିନାହିଁ। ରାଉତ ଦାବି କରିଛନ୍ତି, ଦିଲ୍ଲୀରେ ଗୁଜବ ବ୍ୟାପିଛି ଯେ, ଉପରାଷ୍ଟ୍ରପତିଙ୍କୁ ତାଙ୍କ ବାସଭବନରେ ଗୃହବନ୍ଦୀ କରାଯାଇଛି ଏବଂ ସେ ସୁରକ୍ଷିତ ନୁହଁନ୍ତି।
ଏହି ପରିସ୍ଥିତିକୁ ଆଶ୍ଚର୍ଯ୍ୟଜନକ ଏବଂ ଚିନ୍ତାଜନକ ବୋଲି ବର୍ଣ୍ଣନା କରି ସେ ପ୍ରଶ୍ନ କରିଛନ୍ତି ଯେ ତାଙ୍କ ଅବସ୍ଥା ଏବଂ ସ୍ଥାନ ବିଷୟରେ କାହିଁକି କିଛି କୁହାଯାଉନାହିଁ। ଦେଶକୁ ସତ୍ୟ ଜାଣିବାର ଅଧିକାର ଅଛି।
ସଞ୍ଜୟ ରାଉତ ତାଙ୍କ ଚିଠିରେ ଆହୁରି ପ୍ରକାଶ କରିଛନ୍ତି, କିଛି ରାଜ୍ୟ ସଭା ସଦସ୍ୟ ଉପରାଷ୍ଟ୍ରପତିଙ୍କ ମଙ୍ଗଳ ଜାଣିବା ପାଇଁ ସୁପ୍ରିମକୋର୍ଟରେ ହେବିୟସ କର୍ପସ ଆବେଦନ ଦାଖଲ କରିବାକୁ ବିଚାର କରୁଛନ୍ତି। ତଥାପି, ଆଇନଗତ କାର୍ଯ୍ୟାନୁଷ୍ଠାନ ନେବା ପୂର୍ବରୁ, ସେ ସ୍ବରାଷ୍ଟ୍ର ମନ୍ତ୍ରୀଙ୍କଠାରୁ ସରକାରୀ ସୂଚନା ଦାବି କରିଥିଲେ। ଶିବସେନା ନେତା ଶାହଙ୍କୁ ଉପରାଷ୍ଟ୍ରପତିଙ୍କ ସୁରକ୍ଷା ଏବଂ ସ୍ବାସ୍ଥ୍ୟ ବିଷୟରେ ସତ୍ୟ ସୂଚନା ସାର୍ବଜନୀନ କରିବାକୁ ଅନୁରୋଧ କରିଥିଲେ, ଯାହା ଦ୍ୱାରା ସମସ୍ତ କଳ୍ପନାଜଳ୍ପନା ବନ୍ଦ ହୋଇପାରିବ।
