ମୁମ୍ବାଇ,୨୮।୧୧: ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ ଆସିବାକୁ ୬ ଦିନ ହୋଇ ଗଲାଣି। ହେଲେ ରାଜ୍ୟର ମୁଖ୍ୟମନ୍ତ୍ରୀ କିଏ ହେବେ ତାହା ଏବେ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। କୁହାଯାଉଛି କି ମହାରାଷ୍ଟ୍ରରେ ଭାରତୀୟ ଜନତା ପାର୍ଟି(ଭାଜପା)ର ନେତା ହିଁ ମୁଖ୍ୟମନ୍ତ୍ରୀ ଚୌକିରେ ବସିବେ। ଦିଲ୍ଲୀରୁ ନେଇ ମହାରାଷ୍ଟ୍ର ପର୍ଯ୍ୟନ୍ତ ଅନେକ ନେତାଙ୍କ ନାମ ଏହି ରେସ୍ରେ ଯୋଡି ହୋଇଯାଇଛି। ହେଲେ କାହା ନାମରେ ଏବେ ପର୍ଯ୍ୟନ୍ତ ମୋହର ବାଜି ନାହିଁ। ରାଜନୈତିକ ମହଲରେ ଆଲୋଚନା ହେଉଛି କି ଦେବେନ୍ଦ୍ର ଫଡନାଭିସ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହୋଇପାରନ୍ତି।
ଅନ୍ୟପଟେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ବି କହିଛନ୍ତି ଭାଜପା ହାଇକମାଣ୍ଡ ଯାହା ନିଷ୍ପତ୍ତି ନେବେ ତାକୁ ସେ ମାନିନେବେ। ଏହାପରେ ବି ମହାରାଷ୍ଟ୍ରର ମୁଖ୍ୟମନ୍ତ୍ରୀ କିଏ ହେବେ ତାକୁ ନେଇ ସସପେନ୍ସ ଜାରି ରହିଛି। ହେଲେ ଏହା ପ୍ରଥମ ଥର ନୁହେଁ ଯେ ଭାଜପାକୁ ମୁଖ୍ୟମନ୍ତ୍ରୀ ବାଛିବାକୁ ଏତେ ସମୟ ଲାଗିଛି। ଏହା ପୂର୍ବରୁ ମଧ୍ୟ କିଛି ରାଜ୍ୟରେ ଭାଜପା ମୁଖ୍ୟମନ୍ତ୍ରୀ ନାମ ସ୍ଥିର କରିବାକୁ ସମୟ ନେଇଛି।
ବିଳମ୍ବ ପରେ ଯେଉଁ ନାମ ସାମ୍ନାକୁ ଆସିଛି ତାହା ସମସ୍ତଙ୍କୁ ଚମକାଇ ଦେଇଛି। ୨୦୧୪ ପରେ ମୁଖ୍ୟମନ୍ତ୍ରୀ ବାଛିବାକୁ ଯେବେବି ଭାଜପା ସମୟ ନେଇଛି ସେବେ ସରପ୍ରାଇଜ ଚେହେରା ଏଣ୍ଟ୍ରି କରିଛି। ଆଉ ଯେଉଁଠି ଭାଜପାକୁ ମୁଖ୍ୟମନ୍ତ୍ରୀ ବାଛିବାକୁ ସମୟ ଲାଗିନି ସେଠାରେ ମୁଖ୍ୟମନ୍ତ୍ରୀ ଭାବେ ଚର୍ଚ୍ଚାରେ ଥିବା ନାମ ହିଁ ସେହି ଆସନରେ ବସିଛନ୍ତି।
୨୦୨୪ରେ ଭାରତୀୟ ଜନତା ପାର୍ଟି ଓଡ଼ିଶାରେ ସରକାର ଗଠନ କରିଥିଲା। ହେଲେ ଭାଜପା ନେତୃତ୍ୱରେ ରାଜ୍ୟରେ ମୁଖ୍ୟମନ୍ତ୍ରୀ ଚେହେରା ବାଛିବାକୁ ୮ ଦିନ ସମୟ ଲାଗିଥିଲା। ମୁଖ୍ୟମନ୍ତ୍ରୀ ପଦ ପାଇଁ ଧର୍ମେନ୍ଦ୍ର ପ୍ରଧାନ ଓ ମନମୋହନ ସାମଲଙ୍କ ନାମ ଚର୍ଚ୍ଚାରେ ଥିବା ବେଳେ ଭାଜପା କିନ୍ତୁ ଏହି ଆସନରେ ମୋହନ ମାଝୀଙ୍କୁ ବସାଇଥିଲା। ମୋହନ ମାଝୀ ଆଦିବାସୀ ସମ୍ପ୍ରଦାୟର।
