ଭୁବନେଶ୍ୱର,୮ା୬(ବ୍ୟୁରୋ): ବାହାନଗା ଟ୍ରେନ ଦୁର୍ଘଟଣାରେ ୨୮୮ଜଣଙ୍କ ମୃତ୍ୟୁ ହୋଇଥିବାବେଳେ ଚିହ୍ନଟ ଲାଗି ବାଲେଶ୍ୱରରୁ ୧୯୩ଟି ମୃତଦେହ ଭୁବନେଶ୍ୱରକୁ ଆସିଥିଲା। ଏଥିମଧ୍ୟରୁ ୧୨୩ଟି ମୃତଦେହକୁ ଏମ୍ସରେ ରଖାଯାଇଥିଲା। ତେବେ ୬ ତାରିଖ ବିଳମ୍ବିତ ରାତିରେ ଭୁବନେଶ୍ୱରର ବିଭିନ୍ନ ହସ୍ପିଟାଲରୁ ୩୯ଟି ମୃତଦେହ ଏମ୍ସକୁ ସ୍ଥାନାନ୍ତର କରାଯାଇଥିଲା। ଏହାକୁ ମିଶାଇ ଏବେ ଏମ୍ସରେ ମୋଟ ୧୬୨ ମୃତଦେହ ଥିବାବେଳେ ବୁଧବାର ୭୫ଟି ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ତେବେ ଗୋଟିଏ ଗୋଟିଏ ମୃତଦେହର ଏକାଧିକ ଦାବିଦାର ଥିବାରୁ ଡିଏନ୍ଏ ଟେଷ୍ଟ୍ର ବ୍ୟବସ୍ଥା କରାଯାଇଛି। ନମୁନା ସଂଗ୍ରହ, ପ୍ରେରଣ ଓ ଡିଏନ୍ଏ ଟେଷ୍ଟ୍, ଏସବୁ ସମୟସାପେକ୍ଷ ହୋଇଥିବାରୁ ରିପୋର୍ଟ ଆସିବା ପର୍ଯ୍ୟନ୍ତ ଦାବିଦାରଙ୍କୁ ଅପେକ୍ଷା କରିବାକୁ କୁହାଯାଇଛି। ରାଜ୍ୟ ତଥା ବାହାର ରାଜ୍ୟରୁ ମୃତକଙ୍କ ପରିବାର ଲୋକେ ଆସିଥିବାରୁ ସେମାନେ ଏବେ ଏମ୍ସରେ ପଡି ରହିଛନ୍ତି। ମନସ୍ତାପ ଭିତରେ ଖାଇବା ଓ ରହିବା ସେମାନଙ୍କ ପାଇଁ କଷ୍ଟକର ହୋଇପଡିଛି। ଦିନରେ ଟାଣ ଖରା ସାଙ୍ଗକୁ ରାତିରେ ପ୍ରବଳ ଗରମରେ ଦହଗଞ୍ଜ ହେଉଛନ୍ତି। ନା ଅଛି ପେଟରେ ଭୋକର ଜ୍ୱଳା ନା ଅଛି ଝଡ ବର୍ଷାର ଡର। ଏସବୁକୁ ଖାତିର ନ କରି ଏମ୍ସର ହେଲ୍ପଡେସ୍କ ବାରଣ୍ଡାରେ ନିଜ ଆତ୍ମୀୟ ବ୍ୟକ୍ତିଙ୍କ ମୃତ ଶରୀରକୁ ଚାହିଁ ରହିଛନ୍ତି। କେମିତି ନିଜ ସମ୍ପର୍କୀୟଙ୍କ ମୃତ ଶରୀର ନେଇ ନିଜ ଗନ୍ତବ୍ୟସ୍ଥଳକୁ ଯିବେ ତାହା ଭାବି ଭାବି ଦିନ କାଟୁଛନ୍ତି। ସମସ୍ତଙ୍କ ମୁହଁରେ ଏକା ପ୍ରଶ୍ନ କେବେ ମିଳିବ ଆମ ଲୋକଙ୍କ ମୃତଦେହ?
ସେପଟେ ଏମ୍ସ ଭୁବନେଶ୍ୱରରେ ଡିଏନ୍ଏ ଟେଷ୍ଟର ସାମ୍ପଲ ଗ୍ରହଣ କରାଯାଉଥିଲେ ମଧ୍ୟ ବ୍ୟାପକ ସୁବିଧା ନ ଥିବାରୁ ଟେଷ୍ଟିଂ ଲାଗି ଦିଲ୍ଲୀସ୍ଥିତ ଏମ୍ସକୁ ପଠାଯାଉଛି। ଏମ୍ସ ନିର୍ଦ୍ଦେଶକଙ୍କ ସୂଚନା ଅନୁଯାୟୀ, ଟେଷ୍ଟିଂ ଲାଗି ପାଖାପାଖି ୭ରୁ ୮ ଦିନ ଲାଗିବ। ଅନ୍ୟପଟେ ବୁଧବାର ଦିନ ୪୫ରୁ ଊର୍ଦ୍ଧ୍ୱ ଡିଏନ୍ଏ ନମୁନା ଗ୍ରହଣ କରାଯାଇଥିବାବେଳେ ପାଖାପାଖି ୩୦ରୁ ଊର୍ଦ୍ଧ୍ୱ ନମୁନାକୁ ଟେଷ୍ଟିଂ ନିମନ୍ତେ ଦିଲ୍ଲୀ ପଠାଯାଇଛି। ମୃତକଙ୍କ ପରିବାର ଲୋକଙ୍କ କଷ୍ଟକୁ ହୃଦୟଙ୍ଗମ କରି ଗୋଟିଏ ଦିନ ଭିତରେ ନମୁନାର ପରୀକ୍ଷଣ କରି ରିପୋର୍ଟ ପଠାଇବାକୁ ଅନୁରୋଧ କରିଛନ୍ତି ଏମ୍ସ କାର୍ଯ୍ୟନିର୍ବାହୀ ନିର୍ଦ୍ଦେଶକ ଆଶୁତୋଷ ବିଶ୍ୱାସ।
