ନୂଆଦିଲ୍ଲୀ,୨୪।୭:ଲୋକସଭା ନିର୍ବାଚନ ଭିତରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ୟୁପି ସମ୍ପର୍କରେ ଏକ ବଡ଼ ଭବିଷ୍ୟବାଣୀ କରିଥିଲେ। ସେ ଦାବି କରିଥିଲେ ଯେ, ମଧ୍ୟପ୍ରଦେଶର ପୂର୍ବତନ ସିଏମ ଶିବରାଜ ସିଂ ଚୌହାନଙ୍କ ପରି ୟୁପି ସିଏମ ଯୋଗୀ ଆଦିତ୍ୟନାଥଙ୍କୁ ଲୋକ ସଭା ନିର୍ବାଚନ ପରେ ମୁଖ୍ୟମନ୍ତ୍ରୀ ପଦରୁ ହଟାଇ ଦିଆଯିବ। ବର୍ତ୍ତମାନ ଲୋକ ସଭା ନିର୍ବାଚନ ଫଳାଫଳ ଆସିବାର ଦେଢ ମାସରୁ ଅଧିକ ସମୟ ବିତିଗଲାଣି ଏବଂ ୟୁପିକୁ ନେଇ ନାନା ପ୍ରକାର ଆକଳନ ଆରମ୍ଭ ହୋଇଗଲାଣି।
ଭାଜପାର ରାଜନୈତିକ ଓଲଟପାଲଟ ହେବାର କଳ୍ପନାଜଳ୍ପନା ମଧ୍ୟରେ ଲକ୍ଷ୍ନୌରୁ ଦିଲ୍ଲୀ ଯାଏଁ ଅନୁଷ୍ଠିତ ବୈଠକ ସମସ୍ତଙ୍କ ଉତ୍ସୁକତାକୁ ଆହୁରି ବଢାଇ ଦେଇଛି। ବର୍ତ୍ତମାନ ଏସବୁ ମଧ୍ୟରେ କୃଷକ ନେତା ରାକେଶ ଟିକାଇତ ୟୁପି ରାଜନୀତି ଏବଂ ସିଏମ ଯୋଗୀଙ୍କୁ ନେଇ ବଡ଼ ଭବିଷ୍ୟବାଣୀ କରିଛନ୍ତି। ଯାହା ସମସ୍ତଙ୍କୁ ଚକିତ କରିଛ।
କୃଷକ ନେତା ରାକେଶ ଟିକାଇତ କହିଛନ୍ତି, ଏହା ଭାଜପାର ଚକ୍ରବ୍ୟୁହ। ଯିଏ ଏଥିରେ ଫସିଯାଏ, ସେ ବାହାରକୁ ଆସିପାରେ ନାହିଁ। ଭାଜପା ନେତାଙ୍କର ଏହିପରି ଭ୍ରୁଣହତ୍ୟା କରନ୍ତି। ଯୋଗୀ ଆଉ ଅଢେଇ ବର୍ଷ ପରେ ଦିଲ୍ଲୀ ଯିବେ। ବର୍ତ୍ତମାନ ସମୟ ଆସିଛି ।
କେବଳ ଏତିକି ନୁହେଁ, ଅଢେଇ ବର୍ଷ ପରେ ଯୋଗୀ ଆଦିତ୍ୟନାଥ କେନ୍ଦ୍ର ସରକାରରେ ଯୋଗଦେବେ ଏବଂ ଗୃହମନ୍ତ୍ରୀ ହେବେ ବୋଲି ରାକେଶ ଟିକାଇତ ଦାବି କରିଛନ୍ତି। ସିଏମ ଯୋଗୀ ଗୃହମନ୍ତ୍ରୀ ହୋଇପାରନ୍ତି। ତା’ପରେ ସେମାନଙ୍କ ବୁଲଡୋଜର ସାରା ଦେଶରେ ଚାଲିବ। ଏବେ ସେମାନଙ୍କୁ ଭୟଭୀତ କରିବା ପାଇଁ ଏପରି କରାଯାଉଛି।
