ନୂଆଦିଲ୍ଲୀ,୧୫।୯: ଏସିଆ କପ ଟ୍ରଫି ପ୍ରେଜେଣ୍ଟେସନ୍କୁ ନେଇ ପାକିସ୍ତାନ କ୍ରିକେଟ ବୋର୍ଡ (PCB) ମୁଖ୍ୟ ତଥା ଏସିଆନ କ୍ରିକେଟ କାଉନସିଲ (ACC) ଅଧ୍ୟକ୍ଷ ମୋହସିନ ନକଭିଙ୍କୁ ନେଇ ପୁଣି ଚର୍ଚ୍ଚା ଜୋର ଧରିଛି। ଶ୍ରୀଲଙ୍କାକୁ ପରାସ୍ତ କରି ଚାମ୍ପିୟନ ହୋଇଥିବା ଭାରତୀୟ ମହିଳା ଦଳ ମଧ୍ୟ ନକଭିଙ୍କ ହାତରୁ ଟ୍ରଫି ଗ୍ରହଣ କରିନାହିଁ। ଏହା ପରେ ଏବେ ନକଭିଙ୍କ ଏସିସି ଅଧ୍ୟକ୍ଷ ପଦର କାର୍ଯ୍ୟକାଳ ବୃଦ୍ଧି ପାଇବ କି ନାହିଁ, ତାହାକୁ ନେଇ ପ୍ରଶ୍ନ ଉଠିଛି।
ଗତବର୍ଷ ଭାରତୀୟ ପୁରୁଷ କ୍ରିକେଟ ଦଳ ଏସିଆ କପ ଚାମ୍ପିୟନ ହେବା ପରେ ମଧ୍ୟ ନକଭିଙ୍କ ହାତରୁ ଟ୍ରଫି ନେବାକୁ ମନା କରିଥିଲା। ଏହି ଘଟଣା ପରେ ଚଳିତଥର ଭାରତୀୟ ମହିଳା ଦଳ ମଧ୍ୟ ତାଙ୍କ ହାତରୁ ଟ୍ରଫି ନେବ ନାହିଁ ବୋଲି ଆଶଙ୍କା ରହିଥିଲା। ତଥାପି ନକଭି ଟ୍ରଫି ପ୍ରେଜେଣ୍ଟେସନ୍ରେ ଉପସ୍ଥିତ ରହିଥିଲେ। ଶେଷରେ ଭାରତୀୟ ମହିଳା ଦଳ ମଧ୍ୟ ତାଙ୍କଠାରୁ ଟ୍ରଫି ଗ୍ରହଣ କରିନଥିଲା।
ମୋହସିନ ନକଭିଙ୍କୁ ୨୦୨୫ ଏପ୍ରିଲରେ ଏସିଆନ କ୍ରିକେଟ କାଉନସିଲରେ ଅଧ୍ୟକ୍ଷ ଭାବେ ନିଯୁକ୍ତ କରାଯାଇଥିଲା। ତାଙ୍କ ପୂର୍ବରୁ ଶ୍ରୀଲଙ୍କାର ଶମ୍ମି ସିଲ୍ଭା ଏହି ପଦରେ ଥିଲେ। ତାଙ୍କ ପୂର୍ବରୁ ବିସିସିଆଇର ପୂର୍ବତନ ସଚିବ ଜୟ ଶାହା ଏସିସିର ଅଧ୍ୟକ୍ଷ ଥିଲେ।
ଏସିସି ଅଧ୍ୟକ୍ଷ ପଦ ସାଧାରଣତଃ ଦୁଇ ବର୍ଷର ରୋଟେସନ ବ୍ୟବସ୍ଥାରେ ଚାଲିଥାଏ। ସେହି ହିସାବରେ ନକଭିଙ୍କ କାର୍ଯ୍ୟକାଳ ୨୦୨୭ ଏପ୍ରିଲରେ ଶେଷ ହେବ। ତା’ପରେ ନୂଆ ଅଧ୍ୟକ୍ଷ ଚୟନ ହେବାର ନିୟମ ରହିଛି।
ନିୟମ ଅନୁସାରେ ନକଭିଙ୍କ କାର୍ଯ୍ୟକାଳ ବଢ଼ିବାର ସମ୍ଭାବନାକୁ ସମ୍ପୂର୍ଣ୍ଣ ଏଡ଼ାଇ ଦିଆଯାଇପାରିବ ନାହିଁ। ଏଥିପାଇଁ ଏସିସିର ସଦସ୍ୟ ଦେଶଗୁଡ଼ିକର ସମର୍ଥନ ଆବଶ୍ୟକ ହେବ।
ଏହାର ଉଦାହରଣ ହେଉଛନ୍ତି ଜୟ ଶାହା। ୨୦୨୧ରେ ସେ ଏସିସି ଅଧ୍ୟକ୍ଷ ଦାୟିତ୍ୱ ନେଇଥିଲେ। ପରେ ସଦସ୍ୟ ଦେଶଗୁଡ଼ିକର ସହମତିରେ ତାଙ୍କ କାର୍ଯ୍ୟକାଳ ୨୦୨୪ ପର୍ଯ୍ୟନ୍ତ ବଢ଼ିଥିଲା। ଫଳରେ ସେ ପ୍ରାୟ ୪ ବର୍ଷ ଏହି ପଦରେ ରହିଥିଲେ।