ନୂଆଦିଲ୍ଲୀ,୩୦ା୮: ଜମ୍ମୁ-କଶ୍ମୀରକୁ ରାଜ୍ୟ ମାନ୍ୟତା କେବେ ଫେରାଇବ ବୋଲି ସୁପ୍ରିମକୋର୍ଟ ମଙ୍ଗଳବାର କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି। ଏଥିସହ ଏ ସଂକ୍ରାନ୍ତ ରୋଡ୍ମ୍ୟାପ୍ ପ୍ରସ୍ତୁତ କରି ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ୩୧ ସୁଦ୍ଧା ଏହା ଉପରେ ବିସ୍ତୃତ ବିବରଣୀ ଦେବାକୁ ସାମ୍ବିଧାନିକ ପୀଠ ନିର୍ଦ୍ଦେଶ ଦେଇଛନ୍ତି।
ଅଗଷ୍ଟ ୫ରେ କେନ୍ଦ୍ର ସରକାର ସମ୍ବିଧାନର ଅନୁଚ୍ଛେଦ ୩୭୦କୁ ଉଚ୍ଛେଦ କରିବା ସହ ଜମ୍ମୁ-କଶ୍ମୀରକୁ ଏହା ବଳରେ ମିଳିଆସୁଥିବା ସ୍ବତନ୍ତ୍ର ରାଜ୍ୟ ମାନ୍ୟତା ପ୍ରତ୍ୟାହାର କରିଥିଲେ। ସେବେଠୁ ଜମ୍ମୁ-କଶ୍ମୀର କେନ୍ଦ୍ରଶାସିତ ଅଞ୍ଚଳରେ ପରିଣତ ହୋଇରହିଛି। ଏହାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ୨୦ରୁ ଊର୍ଦ୍ଧ୍ୱ ପିଟିଶନ ଦାଖଲ ହୋଇଛି। ଉକ୍ତ ଆବେଦନଗୁଡ଼ିକର ଶୁଣାଣି ସାମ୍ବିଧାନିକ ପୀଠରେ ଚାଲିଛି। ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ତଥା ଜଷ୍ଟିସ୍ ଏସ୍.କେ. କୌଲ, ସଞ୍ଜୀବ ଖାନ୍ନା, ବି.ଆର୍. ଗଭାଇ ଏବଂ ସୂର୍ଯ୍ୟକାନ୍ତଙ୍କୁ ନେଇ ଗଠିତ ସାମ୍ବିଧାନିକ ପୀଠରେ ଏହି ପ୍ରସଙ୍ଗରେ ମଙ୍ଗଳବାର ଥିଲା ଶୁଣାଣିର ଦ୍ୱାଦଶ ଦିନ। ଶୁଣାଣି ବେଳେ କେନ୍ଦ୍ର ପକ୍ଷରୁ ପ୍ରତିନିଧିତ୍ୱ କରୁଥିବା ସଲିସିଟର ଜେନେରାଲ (ଏସ୍ଜି) ତୁଷାର ମେହେଟ୍ଟା ୨୦୧୯ରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ପାର୍ଲାମେଣ୍ଟରେ ଜମ୍ମୁ ଓ କଶ୍ମୀର ପୁନର୍ଗଠନ ବିଧେୟକ ଆଗତ ବେଳେ ଦେଇଥିବା ସୂଚନାର ଅବତାରଣା କରିଥିଲେ। ଏସ୍ଜି ମେହେଟ୍ଟା କହିଥିଲେ, କଶ୍ମୀରକୁ ରାଜ୍ୟ ମାନ୍ୟତା ଉପଯୁକ୍ତ ସମୟରେ ଫେରାଇ ଦିଆଯିବ। କେନ୍ଦ୍ରଶାସିତ ଅଞ୍ଚଳ ମାନ୍ୟତା ସ୍ଥାୟୀ ନୁହେଁ ବୋଲି ମେହେଟ୍ଟା କହିବା ପରେ ସିଜେଆଇ ସମୟକୁ ନେଇ ପ୍ରଶ୍ନ କରିଥିଲେ, ଏହା କିପରି ଅସ୍ଥାୟୀ? ସରକାର ଜମ୍ମୁ-କଶ୍ମୀରରେ କେବେ ନିର୍ବାଚନ କରାଇବାକୁ ଯାଉଛନ୍ତି? ମେହେଟ୍ଟା କହିଥିଲେ, ଏହି ପ୍ରସଙ୍ଗରେ କେନ୍ଦ୍ରକୁ ପଚାରି ଜଣାଇବେ। ରାଜ୍ୟ ମାନ୍ୟତା ପୁନଃ ଅବସ୍ଥାପିତ କରିବା ପ୍ରକ୍ରିୟା ଚାଲିଛି। ଏହି ପରିପେକ୍ଷୀରେ ସିଜେଆଇ କହିଥିଲେ, କେନ୍ଦ୍ର ଜାତୀୟ ନିରାପତ୍ତା ଆଳରେ ଏକ ରାଜ୍ୟକୁ ଅସ୍ଥାୟୀ କେନ୍ଦ୍ରଶାସିତ ଅଞ୍ଚଳରେ ପରିବର୍ତ୍ତିତ କରିପାରିବ କି? କେନ୍ଦ୍ର ପାଖରେ ଯଦି ଏପରି କ୍ଷମତା ରହିଛି, ତେବେ ସରକାର ଅନ୍ୟ ରାଜ୍ୟଗୁଡ଼ିକୁ ମଧ୍ୟ କେନ୍ଦ୍ରଶାସିତ ଅଞ୍ଚଳ କରିଦେବେ, ଯାହାକି ଜଣେ ଆବେଦନକାରୀ ନିଜ ପିଟିଶନରେ ଉଲ୍ଲେଖ କରିଛନ୍ତି। ଉପତ୍ୟକାରେ ଗଣତନ୍ତ୍ରର ପୁନଃ ପ୍ରତିଷ୍ଠା କରିବା ସବୁଠୁ ଗୁରୁତ୍ୱପୂର୍ଣ୍ଣ ବୋଲି ସିଜେଆଇ କହିଥିଲେ।
ଯେ, ୨୦୨୦ ମାର୍ଚ୍ଚରେ ୩୭୦ ଉଚ୍ଛେଦ ପ୍ରସଙ୍ଗ ତାଲିକାଭୁକ୍ତ ହେବା ପରେ ସେତେବେଳର ୫ ଜଣିଆ ସାମ୍ବିଧାନିକ ପୀଠ ଏହାକୁ ୭ ଜଣିଆ ସାମ୍ବିଧାନକ ପୀଠକୁ ପଠାଇବାକୁ ମନା କରିଦେଇଥିଲେ। ଗତ ୨ରେ ଶୀର୍ଷ ଅଦାଲତରେ ଏହି ପ୍ରସଙ୍ଗରେ ଚୂଡ଼ାନ୍ତ ଶୁଣାଣି ଆରମ୍ଭ ହୋଇଥିଲା। ମୂଳ ପ୍ରଶ୍ନ ଥିଲା, ସମ୍ବିଧାନ ପ୍ରଣେତାମାନେ ଅନୁଚ୍ଛେଦ ୩୭୦କୁ ସ୍ଥାୟୀ କିମ୍ବା ଅସ୍ଥାୟୀ ଭାବେ ରଖିବା ପାଇଁ ପ୍ରଣୟନ କରିଥିଲେ।