ଜୟପୁର,୧୬।୧୧: ଭାରତୀୟ ଟି୨୦ ଦଳର ନୂଆ ସେଟ୍ଅପ୍ରେ ବ୍ୟାଟର ବିରାଟ କୋହଲିଙ୍କ ଭୂମିକାରେ କୌଣସି ପରିବର୍ତ୍ତନ ହେବ ନାହିଁ। ଆଗକୁ ଟି୨୦ ଦଳରେ ପୂର୍ବତନ ଅଧିନାୟକଙ୍କ ଭୂମିକାରେ କୌଣସି ପରିବର୍ତ୍ତନ ହେବ କି ବୋଲି ପଚରାଯିବାରୁ ଉପରୋକ୍ତ ଉତ୍ତର ଦେଇଛନ୍ତି ନୂଆ ଅଧିନାୟକ ରୋହିତ ଶର୍ମା।
”ଏହା ଖୁବ୍ ସରଳ। ସେ ଏପର୍ଯ୍ୟନ୍ତ ଯାହା କରୁଥିଲେ, ଦଳରେ ତାଙ୍କ ଭୂମିକା ସମାନ ରହିବ। ସେ ଯେତେବେଳେ ବି ଖେଳନ୍ତି, ମ୍ୟାଚ୍ରେ ପ୍ରଭାବ ଛାଡ଼ି ଯାଆନ୍ତି। ଦଳ ପାଇଁ ସେ ଜଣେ ଗୁରୁତ୍ୱପୂର୍ଣ୍ଣ ଖେଳାଳି। ମ୍ୟାଚ୍ରେ ଦଳର ଆବଶ୍ୟକତା ଅନୁଯାୟୀ, ପ୍ରତ୍ୟେକ ଖେଳାଳିଙ୍କ ଭୂମିକାରେ ପରିବର୍ତ୍ତନ ହେବ। ପଛରେ ବ୍ୟାଟିଂ ହେଉ କି ପ୍ରଥମେ ବ୍ୟାଟିଂ, ଉଭୟ ଥର ବ୍ୟାଟରଙ୍କ ଭୂମିକା ଭିନ୍ନ ହୋଇଥାଏ। ମ୍ୟାଚ୍ର ଆବଶ୍ୟକତା ଭିତ୍ତିରେ ଖେଳାଳିଙ୍କ ଭୂମିକାରେ ପରିବର୍ତ୍ତନ ହେବ। ମୁଁ ନିଶ୍ଚିତ ଯେ, ବିରାଟ ଫେରିଲେ ଆମ ଦଳର ଶକ୍ତି ବୃଦ୍ଧି ପାଇବ। କାରଣ ହେଲା ତାଙ୍କ ପାଖରେ ଥିବା ଅଭିଜ୍ଞତା। ଆଉ ସେ ଯେଉଁ ସ୍ତରର ବ୍ୟାଟର ଆମ ଦଳର ଶକ୍ତି ବୃଦ୍ଧି କରିବେ“ ବୋଲି ବୁଧବାର ନ୍ୟୁଜିଲାଣ୍ଡ ବିପକ୍ଷରେ ଖେଳାଯିବାକୁ ଥିବା ପ୍ରଥମ ଟି୨୦ ମ୍ୟାଚ୍ ପୂର୍ବରୁ ଆୟୋଜିତ ଖବରଦାତା ସମ୍ମିଳନୀରେ କହିଛନ୍ତି ରୋହିତ।
