ମୁମ୍ବାଇ: ଭେଟେରାନ ଅଭିନେତ୍ରୀ ଶ୍ରୀଦେବୀ ବଲିଉଡ୍ର ପ୍ରଥମ ମହିଳା ସୁପରଷ୍ଟାର ଭାବେ ବେଶ୍ ଜଣାଶୁଣା। ଶ୍ରୀ ତାଙ୍କ କ୍ୟାରିୟରରେ ୩୦୦ରୁ ଊର୍ଦ୍ଧ୍ୱ ଫିଲ୍ମ କରି ବେଶ୍ ଲୋକପ୍ରିୟତା ହାସଲ କରିପାରିଛନ୍ତି। କେବଳ ସେତିକି ନୁହେଁ ଶ୍ରୀ ଅନେକ ସୁପରଷ୍ଟାର ଅଭିନେତାଙ୍କ ବିପକ୍ଷରେ ମଧ୍ୟ ଅଭିନୟ କରିସାରିଛନ୍ତି। କିନ୍ତୁ ଜାଣିଛନ୍ତି କି, ଏଭଳି ଏକ ସମୟ ଥିଲା ଯେତେବେଳେ ଶ୍ରୀଦେବୀ ଅଭିନେତା ସଞ୍ଜୟ ଦତ୍ତଙ୍କ ସହ କାମ କରିବାକୁ ଚାହୁଁ ନ ଥିଲେ। ସୂଚନା ମୁତାବକ ୧୯୯୩ରେ ଏକ ଶୁଟିଂ ସେଟ୍ରେ ଘଟିଥିବା ଏକ ଘଟଣା ପରେ ଶ୍ରୀଦେବୀ ସଞ୍ଜୟଙ୍କ ସହ ସ୍କ୍ରିନ୍ ସ୍ପେସ୍ ଶେୟାର କରିବେ ନାହିଁ ବୋଲି ନିଷ୍ପତ୍ତି ନେଇଥିଲେ। ଏକ ସାକ୍ଷାତକାରରେ ସଞ୍ଜୟ ଦତ୍ତ ଏନେଇ ପରି ପ୍ରକାଶ କରିଥିଲେ। ସୂଚନାଯୋଗ୍ୟ, ସଞ୍ଜୟ ଶ୍ରୀଙ୍କ ବଡ଼ ପ୍ରଶଂସକ ଥିଲେ। ଗୋଟିଏ ଦିନ ସଞ୍ଜୟ ତାଙ୍କୁ ଭେଟିବା ପାଇଁ ଫଲ୍ମ‘ହିମ୍ମତଓ୍ବାଲା’ର ସେଟ୍ରେ ପହଞ୍ଚିଥିଲେ। ଯେତେବେଳେ ଶ୍ରୀଙ୍କୁ ସେଟ୍ରେ ପାଇ ନ ଥିଲେ ସେତେବେଳେ ସେ ସିଧାସଳଖ ମେକ୍ଅପ୍ ରୁମ୍ରେ ଯାଇ ପହଞ୍ଚିଥିଲେ। ସେହି ସମୟରେ ସଞ୍ଜୟଙ୍କୁ ନିଶାସକ୍ତ ଅବସ୍ଥାରେ ଦେଖି ଶ୍ରୀଦେବୀ ଭୟଭୀତ ହେବା ସହ ସଙ୍ଗେ ସଙ୍ଗେ କବାଟ ବନ୍ଦ କରିଦେଇଥିଲେ। କିନ୍ତୁ ଏହି ଏହି ଘଟଣା ତାଙ୍କ ଉପରେ ବହୁ ପ୍ରଭାବ ପକାଇଥିଲା। ଯେଉଁଥିପାଇଁ ସେ ସଞ୍ଜୟଙ୍କ ସହ କାମ ନ କରିବାକୁ ନିଷ୍ପତ୍ତି ନେଇଥିଲେ। କିନ୍ତୁ ପରେ ମହେଶ ଭଟ୍ଟ କହିବାରୁ ଫିଲ୍ମ ‘ଗୁମରାହ’ରେ ଶ୍ରୀ ସଞ୍ଜୟଙ୍କ ସହ ସ୍କ୍ରିନ୍ ଶେୟାର କରିବାକୁ ରାଜି ହୋଇଥିଲେ। କିନ୍ତୁ ସେଟ୍ରେ ୨ଜଣ କେବେ ବି କଥା ହୋଇନାହାନ୍ତି। ଶୁଟିଂ ସରିବା ପରେ ମାତ୍ରେ ହିଁ ଶ୍ରୀ ସେଠାରୁ ପଳାଇଯାଆନ୍ତି ବୋଲି ସଞ୍ଜୟ କହିଛନ୍ତି। ଫିଲ୍ମ ତିଆରି ହେବା ପରେ ସେ ଆଉ କେବେ ସଞ୍ଜୟ ଆଡ଼କୁ ଚାହିଁନାହାନ୍ତି। କିଛି ବର୍ଷ ପରେ ନିର୍ଦ୍ଦେଶକ ତଥା ପ୍ରଯୋଜକ କରନ ଜୋହର ଫିଲ୍ମ କଳଙ୍କ ପାଇଁ ସଞ୍ଜୟ ଓ ଶ୍ରୀଦେବୀଙ୍କୁ ଏକାସଙ୍ଗେ ଅଫର ଦେଇଥିଲେ। ଏଥିପାଇଁ ଦୁଇଜଣ ରାଜି ମଧ୍ୟ ହୋଇଯାଇଥିଲେ। କିନ୍ତୁ ସମୟର ବିଡ଼ମ୍ବନା ଯେ, ଶୁଟିଂ ପୂର୍ବରୁ ଶ୍ରୀ ଏହି ଦୁନିଆ ଛାଡ଼ି ଚାଲିଯାଇଥିଲେ।
