ନୂଆଦିଲ୍ଲୀ,୧୮।୨: କ୍ରିକେଟ ମଇଦାନରେ ଅନେକ ଅବିସ୍ମରଣୀୟ ଘଟଣା ଦେଖିବାକୁ ମିଳିଥାଏ। ସେଥିରୁ ଗୋଟିଏ ହେଉଛି ୧୯୮୬ ଫେବୃୟାରୀ ୧୮ ତାରିଖରେ ଖେଳାଯାଇଥିବା ଏକ ମ୍ୟାଚ୍ର ଘଟଣା। ସେତେବେଳେ ଇଂଲଣ୍ଡ ଟିମ୍ ଓ୍ବେଷ୍ଟଇଣ୍ଡିଜ୍ ଗସ୍ତରେ ଥିଲା। ଏହି ସମୟରେ ଓ୍ବେଷ୍ଟଇଣ୍ଡିଜ୍ ଦଳରେ ଏକକୁ ବଳି ଆରେକ ବୋଲର୍ ଥିଲେ। ଏହି ଗସ୍ତର ପ୍ରଥମ ଦିନିକିଆ ମ୍ୟାଚ୍ରେ ଇଂଲଣ୍ଡ ଟିମ୍ ପ୍ରଥମେ ବ୍ୟାଟିଂ କରିବାର ନିଷ୍ପତ୍ତି ନେଇଥିଲା। ହେଲେ ଏହି ପାଳିରେ ଇଂଲଣ୍ଡର ପୂର୍ବ ଅଭିଜ୍ଞ ବ୍ୟାଟ୍ସମ୍ୟାନ୍ ମାଇକ୍ ଗେଟିଂ ଏକ ଭୟଙ୍କର ଦୁର୍ଘଟଣାର ଶିକାର ହୋଇଥିଲେ।
ମାଇକ୍ ଚତୁର୍ଥ ସ୍ଥାନରେ ବ୍ୟାଟିଂ କରିବାକୁ ଆସିଥିଲେ। ହେଲେ ତାଙ୍କୁ ସଂଘର୍ଷ କରିବାକୁ ପଡ଼ିଥିଲା। ଓ୍ବେଷ୍ଟଇଣ୍ଡିଜ୍ ବୋଲରଙ୍କ ବଲ୍ରେ ଗୋଟିଏ ରନ୍ ନେବା କଷ୍ଟକର ହୋଇପଡ଼ୁଥିଲା। ୩୬ ବଲ୍ରେ ୧୦ରନ୍ କରି ଖେଳୁଥିଲେ ସେ। ଏହି ସମୟରେ ବୋଲର୍ ମାଲକମ୍ ମାର୍ଶଲ ଏକ ବାଉନ୍ସର ପକାଇଥିଲେ। ଏହି ବଲ୍ ଗେଟିଂଙ୍କ ନାକରେ ବାଜିଥିଲା। ହେଲେ ଏହା ଏତେ ଦ୍ରୁତ ବେଗରେ ବାଜିଥିଲା ଯେ ତାଙ୍କ ନାକର ହାଡ଼ ଭାଙ୍ଗି ଯାଇଥିଲା। ଏହାପରେ ବଲ୍ଟି ଷ୍ଟମ୍ପରେ ବାଜିଥିଲା। ଫଳରେ ସେ ଉଇକେଟ ହରାଇଥିଲେ। ସେଠାରେ ଉପସ୍ଥିତ ବୋଲର ବଲ୍ ଉଠାଇବା ବେଳେ ସେଥିରେ ନାକ ହାଡ଼ର ଏକ ଅଂଶ ଲାଗିଥିବା ଦେଖିଥିଲେ। ଏହା ସେଠାରେ ଉପସ୍ଥିତ ଅନେକଙ୍କୁ ଚକିତ କରିଥିଲା।
ତେବେ ଉକ୍ତ ମ୍ୟାଚ୍ରେ ମାଲକମ୍ ବ୍ୟାଟ୍ସମ୍ୟାନ୍ଙ୍କ ପାଇଁ ଦୁଃସ୍ବପ୍ନ ପାଲଟିଥିଲେ। ସେ ୧୦ ଓଭରରେ ଗୋଟିଏ ମେଡେନ୍ ସହ ୨୩ ରନ୍ ଦେଇ ୪ ଉଇକେଟ ନେଇଥିଲେ। ତାଙ୍କ ଯୋଗୁ ଇଂଲଣ୍ଡ ଟିମ୍ ୪୬ ଓଭରରେ ୮ ଉଇକେଟ ହରାଇ ୧୪୫ ରନ୍ କରିପାରିଥିଲା। ଜବାବରେ ଓ୍ବେଷ୍ଟଇଣ୍ଡିଜ ଦଳ ୪୩.୫ ସଭରରେ ୪ ଉଇକେଟ ହରାଇ ସହଜ ବିଜୟ ହାସଲ କରିଥିଲେ। ଏଥିରେ ମାଲକମ୍ ମ୍ୟାନ୍ ଅଫ୍ ଦ ମ୍ୟାଚ୍ ହୋଇଥିଲେ।
