ସୁନ୍ଦରଗଡ଼,୧୮ା୯(ଡି.ଏନ୍.ଏ.): ଏମ୍ସିଏଲ କୋଇଲା ଖଣିରୁ କୋଇଲା ପରିବହନ ଭଡ଼ା ବୃଦ୍ଧି ଦାବି ନେଇ ରବିବାରଠାରୁ ସୁନ୍ଦରଗଡ଼ ମିଳିତ ଟ୍ରକ ମାଲିକ ସଂଘ ପକ୍ଷରୁ ଅନିର୍ଦ୍ଦିଷ୍ଟ କାଳ ପାଇଁ ଚକାଜାମ ଆନ୍ଦୋଳନ ଆରମ୍ଭ ହୋଇଛି। ଫଳରେ ଏମ୍ସିଏଲ୍ର ତିନୋଟି କୋଇଲା ଖଣିରୁ ଝାରସୁଗୁଡ଼ା, ସମ୍ବଲପୁର ଓ ପଡ଼ୋଶୀ ରାଜ୍ୟ ଛତିଶଗଡ଼କୁ କୋଇଲା ପରିବହନ ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଛି। ଡିଜେଲ, ଟୋଲ ଟ୍ୟାକ୍ସ ଓ ଅନ୍ୟାନ୍ୟ ଆନୁଷଙ୍ଗିକ ସାମଗ୍ରୀର ଦର ବ୍ରୁଦ୍ଧି ଯୋଗୁ କୋଇଲା ପରିବହନ କରୁଥିବା ଟ୍ରକ୍ ମାଲିକମାନେ ଆର୍ଥିକ ସମସ୍ୟାର ସମ୍ମୁଖୀନ ହୋଇ ବ୍ୟାଙ୍କର କିସ୍ତି ଲୋନ୍ ଟଙ୍କା ପରିଶୋଧ କରି ନ ପାରି ଦେବାଳିଆ ହୋଇପଡ଼ିଛନ୍ତି। ଆନ୍ଦୋଳନ ଯୋଗୁ ରାସ୍ତାରେ ଓ କୋଇଲା ଖଣି ଅଞ୍ଚଳରେ ହଜାର ହଜାର ଟ୍ରକ ଅଟକି ରହିଛି। ଟନ୍ ପିଛା ୧୪୦ ଟଙ୍କା ଲେଖାଏ ଭଡ଼ା ବୃଦ୍ଧି ଦାବି ନେଇ ପ୍ରଶାସନର ମଧ୍ୟସ୍ଥିରେ ବିଭିନ୍ନ କାରଖାନା କର୍ତ୍ତୃପକ୍ଷ ଏବଂ ମିଳିତ ଟ୍ରକ ମାଲିକ ସଂଘର କର୍ମକର୍ତ୍ତାଙ୍କ ମଧ୍ୟରେ ଦୁଇ ଥର ଆଲୋଚନା ବୈଠକ ଫଳପ୍ରଦ ହୋଇ ନ ଥିବାରୁ ପରିଶେଷରେ ମିଳିତ ଟ୍ରକ ମାଲିକ ସଂଘ ଏହି ଆନ୍ଦୋଳନକୁ ଓହ୍ଲାଇଛି। ରବିବାର ଡୁଡୁକା ବାଇପାସଠାରେ ମିଳିତ ଟ୍ରକ ମାଲିକ ସଂଘ ପକ୍ଷରୁ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା। ଏଥିରେ ସୁନ୍ଦରଗଡ଼ ଏମ୍ପି ଜୁଏଲ ଓରାମ,ପୂର୍ବତନ ବାଚସ୍ପତି କିଶୋର ଚନ୍ଦ୍ର ପଟେଲ,ଅଜୟ ପଟେଲଙ୍କ ସମେତ ବିଭିନ୍ନ ପଞ୍ଚାୟତର ସରପଞ୍ଚ, ଅଞ୍ଚଳର ଜନସାଧାରଣ ଏକତ୍ରିତ ହୋଇ ପରିବହନ ଭଡ଼ା ବୃଦ୍ଧି ଦାବିକୁ ସମର୍ଥନ ଜଣାଇଥିଲେ। ସୁନ୍ଦରଗଡ଼ ବିଧାୟିକା କୁସୁମ ଟେଟେ ଓ ତଳସରା ବିଧାୟକ ଭବାନୀ ଶଙ୍କର ଭୋଇ ମଧ୍ୟ ଏହି ସଭାରେ ଯୋଗ ଦେଇଥିଲେ।
