ନୂଆଦିଲ୍ଲୀ,୧୭।୨:ଗତ କିଛିଦିନ ହେବ ଦରଦାମକୁ ନେଇ ସବୁ ସ୍ଥରରେ ବିରୋଧ ପ୍ରଦର୍ଶନ କରାଯାଥିଲା। ଫଳରେ କେନ୍ଦ୍ର ସରକାର ଗୁରୁବାର ପାଇକାରୀ ଓ ଖୁଚୁରା ବଜାରରେ ଗହମ କେଜି ପିଛା ୫ ଟଙ୍କା ହ୍ରାସ କରିଥିବା କେନ୍ଦ୍ର ଖାଦ୍ୟ ସଚିବ ସଞ୍ଜୀବ ଚୋପ୍ରା ସୂଚନା ଦେଇଛନ୍ତି। ଏପରିକି କେନ୍ଦ୍ର ସରକାର ଖୋଲା ବଜାରରେ ୩୦ଲକ୍ଷ ଟନ ଗହମ ବିକ୍ରି ଲାଗି ନିଷ୍ପତ୍ତି ନେଇଛନ୍ତି। ସରକାରଙ୍କ ଏହି ନିଷ୍ପତ୍ତି ପରେ ବଜାରରେ ଗହମ କେଜି ପିଛା ଦର ହ୍ରାସ ହୋଇଥିବା ଚୋପ୍ରା ମତପ୍ରକାଶ କରିଛନ୍ତି। ତେବେ ବଜାରରେ ଗହମ ଦର ହ୍ରାସ ଲାଗି ଯଦି ଆବଶ୍ୟକ ପଡେ ତେବେ ଅନ୍ୟ ପଦକ୍ଷେପ ମଧ୍ୟ ନିଆଯିବ ବୋଲି ସେ କହିଛନ୍ତି। ଏପରିକି ଆବଶ୍ୟକତା ପଡିଲେ ସରକାର ବଜାର ମୂଲ୍ୟ ନିୟନ୍ତ୍ରଣ କରିବାପାଇଁ ମୁକ୍ତ ବଜାର ବିକ୍ରି ଯୋଜନା (ଓଏମ୍ଏସ୍ଏସ୍) ରେ ଅଧିକ ଗହମ ଛଡିବା ସହ ଅନ୍ୟ ପଦକ୍ଷେପ ମଧ୍ୟ ନେଇପାରନ୍ତି। ସେହିପରି ଗହମ ରପ୍ତାନି ଉପରେ କଟକଣା ହଟାଇବା ପାଇଁ କୌଣସି ପ୍ରସ୍ତାବ ଉପରେ ସରକାର ଏ ପର୍ଯ୍ୟନ୍ତ ବିଚାର କରି ନାହାନ୍ତି ବୋଲି ଚୋପ୍ରା ମତବ୍ୟକ୍ତ କରିଛନ୍ତି।
