ୱାଶିଂଟନ, ୧୨।୮: ଆମେରିକା ରାଷ୍ଟ୍ରପତି ର୍ନିବାଚନରେ ଡେମୋକ୍ରେଟିକ ପାର୍ଟି ପକ୍ଷରୁ ମୂଳ ଭାରତୀୟ କମଳା ହେରିସ ଉପରାଷ୍ଟ୍ରପତି ପ୍ରାର୍ଥୀ କରାଯାଇଛି। ଦଳ ପକ୍ଷରୁ ରାଷ୍ଟ୍ରପତି ପ୍ରାର୍ଥୀ ହୋଇଥିବା ଜୋ ବାଇଡେନ ଏନେଇ ଟୁଇଟ କରି ସୂଚନା ଦେଇଛନ୍ତି। ମୂଳ ଭାରତୀୟ ତଥା ଆଫ୍ରିକୀୟ କମଳାଙ୍କୁ ପ୍ରାର୍ଥୀ କରି ଡେମୋକ୍ରେଟିକ ପାର୍ଟି ପକ୍ଷରୁ ମୂଳ ଭାରତୀୟ ଭୋଟରଙ୍କୁ ଆକର୍ଷିତ କରିବାର ଉଦ୍ୟମ ଆରମ୍ଭ ହୋଇଛି। ନଭେମ୍ବରରେ ହେବାକୁ ଥିବା ନିର୍ବାଚନରେ ଯଦି କମଳା ବିଜୟୀ ହୁଅନ୍ତି ତେବେ ଭାରତକୁ କେତେ ପରିମାଣର ଲାଭ ହେବ ସେ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଧାର୍ମିକ ଏକତା ଏବଂ ଗଣତାନ୍ତ୍ରିକ ମୂଲ୍ୟବୋଧକୁ କମଳା ଅଧିକ ଗୁରୁତ୍ୱ ଦେଇଥାନ୍ତି। ଦଳୀୟ ନୀତି ତାଙ୍କ ଆଗରେ ସର୍ବୋପରି ଥରେ ସେ ଭାରତୀୟ ବହିର୍ବ୍ୟାପାର ନୀତି ଏବଂ ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ର ଉଚ୍ଛେଦକୁ କଡ଼ା ସମାଲୋଚନା ମଧ୍ୟ କରିଥିଲେ। ଭାରତ ସହିତ ଭଲ ସମ୍ପର୍କ ରଖିବାକୁୁ ଚାହୁଁଥିବା କମଳା ଆମେରିକାକୁ କାମ କରିବାକୁ ଯାଉଥିବା ଭାରତୀୟଙ୍କ ଖୋଲା ବିରୋଧ ମଧ୍ୟ କରୁଛନ୍ତି। ରାଷ୍ଟ୍ରପ୍ରତି ଡୋନାଲ୍ଡ ଟ୍ରମ୍ପ୍ଙ୍କ କେତେକ ନୀତିର କଡ଼ା ସମାଲୋଚନା ମଧ୍ୟ କରିଛନ୍ତି। ବହିର୍ବ୍ୟାପାର ମନ୍ତ୍ରୀ ଏସ୍.ଜୟଶଙ୍କରଙ୍କ ସହିତ କମଳାଙ୍କ ଅସହମତି ରହିଛି। ଦକ୍ଷିଣ ଭାରତୀୟ ଖାଦ୍ୟକୁ ପସନ୍ଦ କରୁଥିବା କମଳା ପ୍ରତିବର୍ଷ ତାମିଲନାଡୁରେ ଥିବା ତାଙ୍କ ସାନ ଭଉଣୀ ମାୟା ହେରିସଙ୍କ ପାଖକୁ ଛୁଟି ବିତାଇବା ପାଇଁ ଆସିଥାନ୍ତି। ଏହି ସମୟରେ ସେ ବହୁ ମନ୍ଦିରକୁ ପୂଜାର୍ଚ୍ଚନା ଲାଗି ଯାଇଥାନ୍ତି। ଜଣେ ମୂଳ ଭାରତୀୟ ହୋଇଥିବାରୁ ସେ ଗର୍ବିତ ଅନୁଭବ କରିଥାନ୍ତି। ତେବେ ତାଙ୍କର ବିଜୟ ଭାରତ ପାଇଁ ଶତପ୍ରତିଶତ ଶୁଭଫଳ ନେଇ ଆସିବାର ସମ୍ଭାବନା କମ୍ ଥିବା ରାଜନୈତିକ ସମୀକ୍ଷକ ମତପୋଷଣ କରୁଛନ୍ତି।
