ନୂଆଦିଲ୍ଲୀ,୧୯।୩: ଭାରତ-ଇଂଲଣ୍ଡ ମଧ୍ୟରେ ଖେଳାଯାଇଥିବା ଚତୁର୍ଥ ଟି୨୦ ମୁକାବିଲା ପରଠାରୁ ଚର୍ଚ୍ଚାରେ ‘ସଫ୍ଟ ସିଗ୍ନାଲ’। ଏହା କ’ଣ ଏବଂ ଏପରି କ’ଣ ଘଟିଲା ଯେ ପଡ଼ିଆରେ ଅଧିନାୟକ କୋହଲି ରାଗି ଯାଇ କଟୁ ମନ୍ତବ୍ୟ ଦେଇଥିଲେ ସେ ନେଇ ବିତର୍କ ଲାଗିରହିଛି। ତେବେ ଆସନ୍ତୁ ଜାଣିବା ଏହା କ’ଣ?
ଯେଭଳି ଆପଣ ଜାଣନ୍ତି ମ୍ୟାଚ୍ରେ ସୂର୍ଯ୍ୟକୁମାର ଯାଦବ ଖେଳିଥିବା ଏକ କ୍ୟାଚ୍କୁ ଡେଭିଡ ମଲାନ ଧରିନେଇଥିଲେ। ହେଲେ ବଲ୍ଟି ଘାସ ସ୍ପର୍ଶ କରିଥିଲା। ପଡ଼ିଆରେ ଥିବା ଅମ୍ପାୟାର ଏହାକୁ ଆଉଟ କହିବା ପରେ ତୃତୀୟ ଅମ୍ପାୟାରଙ୍କ ପାଖକୁ କଥା ଯାଇଥିଲା। ସେ ସବୁପଟରୁ ବଲ୍କୁ ଦେଖିବା ପରେ ମଧ୍ୟ ଆଉଟ୍ ବୋଲି କହିଥିଲେ। ମୋଟାମୋଟି ଦେଖିଲେ ପଡ଼ିଆରେ ଥିବା ଅମ୍ପାୟାରଙ୍କ ‘ସଫ୍ଟ ସିଗ୍ନାଲ’ ଆଉଟ୍ ନିଷ୍ପତ୍ତି ସହ ସେ ଯାଇଥିଲେ। ସେହିଭଳି ଅନ୍ୟ ଏକ ବଲ୍ରେ ଓ୍ବାଶିଂଟନ୍ ସୁନ୍ଦରଙ୍କ କ୍ୟାଚ୍କୁ ମଧ୍ୟ ଆଉଟ୍ ବୋଲି ସେ କହି ବିବାଦକୁ ଆସିଥିଲେ।
ସଫ୍ଟ ସିଗ୍ନାଲ କ’ଣ?
କ୍ୟାଚ୍ ହେଉ ଅଥବା ଅନ୍ୟ କୌଣସି ପ୍ରକାରେ ଉଇକେଟ ପାଇଁ ଦ୍ୱନ୍ଦ୍ୱ ଉପୁଜିଲେ, ପଡ଼ିଆରେ ଥିବା ଅମ୍ପାୟାର ଏକ ନିଷ୍ପତ୍ତି ନେଇଥାନ୍ତି। ଏହାପରେ ଥାର୍ଡ ଅମ୍ପାୟାରଙ୍କୁ ଏହାକୁ ଦେଖିବାକୁ ସେ କହିଥାନ୍ତି। ଟେଲିଭିଜନ ପରଦାରେ ଅମ୍ପାୟାରଜଣଙ୍କ ସବୁ ଆଙ୍ଗେଲରୁ ରିପ୍ଲେ ଦେଖିଥାନ୍ତି। ତାଙ୍କୁ ଯଦି ଲାଗେ ସେ ଆଉଟ୍ ନୁହନ୍ତି ତେବେ ସେ ପଡ଼ିଆ ଅମ୍ପାୟାରଙ୍କ ନିଷ୍ପତ୍ତି ବଦଳାଇ ନଟଆଉଟ୍ ବୋଲି କହିପାରନ୍ତି। ହେଲେ ସଫ୍ଟ ସିଗ୍ନାଲ ନିୟମ ଅନୁଯାୟୀ ଯଦି ସମସ୍ତ ପ୍ରଚେଷ୍ଟା ପରେ ତୃତୀୟ ଅମ୍ପାୟାରଙ୍କୁ କୌଣସି ପ୍ରମାଣ ମିଳୁନାହିଁ। ତେବେ ଉକ୍ତ ଅମ୍ପାୟାର ସଫ୍ଟ ସିଗ୍ନାଲ ଅର୍ଥାତ ପୁରୁଣା ନିଷ୍ପତ୍ତିକୁ ଅପରିବର୍ତ୍ତିତ ରଖିବାକୁ କହିଥାଏ। ସୂର୍ଯ୍ୟକୁମାରଙ୍କ ଘଟଣାରେ ଏହାହିଁ ହୋଇଥିଲା।
