ପଦ୍ମପୁର, ୬ା୨ (ଡି.ଏନ.ଏ.) ଭଦ୍ରକ ଜିଲା ବାସୁଦେବପୁର ବ୍ଲକର ବିଭିନ୍ନ ସମିତି ଓ ମହାସଂଘର ମଣ୍ଡିରେ ଗୋଦାମ ବ୍ୟବସ୍ଥା ନାହିଁ। ଫଳରେ ଶୁକ୍ରବାର ତୁହାକୁ ତୁହା ବର୍ଷାରେ ପ୍ରାୟ ୫୦ ହଜାର କୁଇଣ୍ଟାଲରୁ ଊର୍ଦ୍ଧ୍ୱ ଧାନ ଭିଜି ଯାଇଛି। ଚାଷୀମାନେ ଧାନକୁ ପଲିଥିନ ଘୋଡ଼ାଇ ବର୍ଷାରେ ଭିଜି ରାତିସାରା ଜଗି ରହିଥିଲେ। ମଣ୍ଡିରେ ଅବ୍ୟବସ୍ଥା ଯୋଗୁ ଏଭଳି ଅସୁବିଧାର ସମ୍ମୁଖୀନ ହୋଇଥିବାରୁ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି। ବ୍ଲକର ୨୨ ସେବା ସମବାୟ ସମିତି ମଧ୍ୟରୁ ୨୦ ଓ ୭ ମହାସଂଘକୁ ଚଳିତବର୍ଷ ଧାନ କ୍ରୟ ପାଇଁ ଜିଲା ଯୋଗାଣ ବିଭାଗ ପକ୍ଷରୁ ଦାୟିତ୍ୱ ପ୍ରଦାନ କରାଯାଇଛି। ହେଲେ ଅନୁବନ୍ଧିତ ହୋଇଥିବା ମିଲରମାନେ ବିଭିନ୍ନ ଆଳ ଦେଖାଇ ମଣ୍ଡିରୁ ଧାନ ଉଠାଉ ନାହାନ୍ତି। ଚାଷୀମାନେ ନିଜ ଖର୍ଚ୍ଚରେ ଧାନ ମିଲ୍କୁ ନେଲେ ମଧ୍ୟ ଲେବର ନାହାନ୍ତି କହି ୩/୪ ଦିନ ଗାଡ଼ି ଛିଡ଼ା କରାଉଛନ୍ତି। ଏଥିସହ ମନଇଚ୍ଛା ଧାନ କଟ୍ନୀ କରୁଛନ୍ତି। ସ୍ଥାନୀୟ ଗାଡ଼ି ଚାଳକମାନେ ଜୁଲମ କରି ଆଗ ମନଇଚ୍ଛା ନିଜ ଗାଡ଼ିକୁ ଅନ୍ଲୋଡ କରାଇବାରେ ସକ୍ଷମ ହେଉଛନ୍ତି। ଶୁକ୍ରବାର ବର୍ଷାରେ ବ୍ଲକର ବିଭିନ୍ନ ମଣ୍ଡି ଓ ମହାସଂଘ ଦ୍ୱାରା କିଣାଯାଇଥିବା ଏତେ ପରିମାଣର ଧାନ ଭିଜି ନଷ୍ଟ ହେବାକୁ ବସିଛି। ଏଥିପ୍ରତି କାହାର ନଜର ନାହିଁ। ବ୍ଲକର ୧୬ ସମିତି ଓ ୭ ମହାସଂଘର ଧାନ ରଖିବା ପାଇଁ ଗୋଦାମ ନାହିଁ। ମିଲ୍ ପକ୍ଷରୁ କୌଣସି ବସ୍ତା ବା ପଲିଥିନ ଦିଆଯାଇ ନାହିଁ। ଚାଷୀମାନେ ନିଜ ଟଙ୍କାରେ ପଲିଥିନ କିଣି ଧାନକୁ ଢାଙ୍କି ବର୍ଷାରେ ଭିଜି ରାତିସାରା ଜଗିଥିଲେ। କେତେକ ସମିତିର ସମ୍ପାଦକ ରିକୋଭରି ଭୟରେ ନିଜ ହାତରୁ ପଲିଥିନ କିଣି ଧାନ ଢାଙ୍କୁଥିବା ବେଳେ ଆଉ କେତେକ ସମିତି ବର୍ଷାରେ ଭିଜି ଯାଉଥିବା ଧାନକୁ ଅଫିସ ବାରଣ୍ଡା ଓ ଭିତରେ ରଖିଛନ୍ତି। ତୁରନ୍ତ ଜିଲା ଯୋଗାଣ ବିଭାଗ ଏ ବାବଦରେ ପଦକ୍ଷେପ ନ ନେଲେ ଆନ୍ଦୋଳନାତ୍ମକ ପନ୍ଥା ଆପଣାଇବେ ବୋଲି ଚାଷୀମାନେ ପ୍ରକାଶ କରିଛନ୍ତି। ଅପରପକ୍ଷେ ବିଭିନ୍ନ ସମିତିର ସମ୍ପାଦକ ଚାଷୀମାନଙ୍କ ଆକ୍ରୋଶର ଶିକାର ହେବା ସହ ଅଫିସକୁ ଭୟରେ ଆସୁ ନ ଥିବା ଜାଣିବାକୁ ମିଳିଛି। ଏ ସମ୍ପର୍କରେ ଜିଲା ସହକାରୀ ଯୋଗାଣ ଅଧିକାରୀ ଶରତ କୁମାର ବେହେରାଙ୍କୁ ପଚାରିବାରୁ ଶୀଘ୍ର ମଣ୍ଡିରୁ ଧାନ ଉଠାଇବା ପାଇଁ ନିର୍ଦ୍ଦେଶ ଦେବେ ବୋଲି କହିଛନ୍ତି।
