ଓ୍ବେଲିଂଟନ,୧୨।୧୧: ୧୪ ଦିନିଆ କ୍ୱାରାଣ୍ଟାଇନ୍ ନିୟମ ଭାଙ୍ଗିଥିବାରୁ ଓ୍ବେଷ୍ଟଇଣ୍ଡିଜ୍ କ୍ରିକେଟରମାନଙ୍କୁ ଦଣ୍ଡତ କରାଯାଇଛି। ଖେଳାଳିମାନଙ୍କୁ ଏଥିପାଇଁ ଟ୍ରେନିଂ ନେବାରୁ ବଞ୍ଚିତ କରାଯାଇଛି। ନ୍ୟୁଜିଲାଣ୍ଡ ସ୍ବାସ୍ଥ୍ୟ ମନ୍ତ୍ରଣାଳୟ ଏ ନେଇ ସୂଚନା ଦେଇଛି। ଖେଳାଳିମାନେ ଆଇସୋଲେଶନ ନିୟମ ଭାଙ୍ଗି ଖ୍ରୀଷ୍ଟଚର୍ଚ୍ଚସ୍ଥିତ ଟିମ୍ ହୋଟେଲରେ ମିଶି ଖାଦ୍ୟ ବାଣ୍ଟି ଖାଇଥିଲେ। ସିସିଟିଭି ଫୁଟେଜରୁ ଏହା ସ୍ପଷ୍ଟ ଭାବେ ଜଣାପଡୁଛି ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି। ଏହି ଘଟଣା ହୋଟେଲରେ ଘଟିଥିବାରୁ ସର୍ବସାଧାରଣଙ୍କ ପାଇଁ କୌଣସି ବିପଦ ନାହିଁ ବୋଲି ସ୍ପଷ୍ଟ କରାଯାଇଛି।
କୋଭିଡ୍-୧୯ ନିୟମ ଅନୁସାରେ ଓ୍ବେଷ୍ଟଇଣ୍ଡିଜ ଦଳ ୧୪ ଦିନିଆ ଆଇସୋଲେଶନରୁ ୧୨ ଦିନ କାଟି ସାରିଥିଲେ। ତେଣୁ ନିୟମ ଭାଙ୍ଗିଥିବାରୁ ଖେଳାଳିମାନେ ଏବେ ପୂରା ଆଇସୋଲେଶନ ଅବଧି ଶେଷ ନ ହେବା ଯାଏ ଟ୍ରେନିଂରେ ଅଂଶଗ୍ରହଣ କରିପାରିବେ ନାହିଁ। ଯଦି ପୁଣି ଏଭଳି କିଛି ଘଟଣା ଘଟେ ତା’ହେଲେ ଆଇସୋଲେଶନ ପିରିୟଡକୁ ଆହୁରି ବୃଦ୍ଧି କରାଯିବ ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି। ଖେଳାଳିମାନେ ଜାଣିଶୁଣି ନିୟମ ଭାଙ୍ଗିବା ଦୁର୍ଭାଗ୍ୟଜନକ ବୋଲି ଓ୍ବେଷ୍ଟଇଣ୍ଡିଜ କ୍ରିକେଟ ମୁଖ୍ୟ କାର୍ଯ୍ୟନିର୍ବାହୀ ଜୋନୀ ଗ୍ରେଭ୍ କହିଛନ୍ତି। କୋଭିଡ୍-୧୯କୁ ନିୟନ୍ତ୍ରଣ କରିବାରେ ନ୍ୟୁଜିଲାଣ୍ଡ ଦୃଷ୍ଟାନ୍ତମୂଳକ କାର୍ଯ୍ୟ କରିଛି। ତେଣୁ ଖେଳାଳିଙ୍କ ଏଭଳି ଆଚରଣ ଗ୍ରହଣୀୟ ନୁହେଁ ବୋଲି ସେ ସ୍ପଷ୍ଟ କରିଛନ୍ତି।
ନ୍ୟୁଜିଲାଣ୍ଡ ଗସ୍ତରେ ଓ୍ବେଷ୍ଟଇଣ୍ଡିଜ ୩ଟି ଟି୨୦, ୨ଟି ଟେଷ୍ଟ ମ୍ୟାଚ୍ ଖେଳିବ। ନ୍ୟୁଜିଲାଣ୍ଡ ଗସ୍ତରେ ଯିବା ପୂର୍ବରୁ ଅଧିକାଂଶ ଓ୍ବେଷ୍ଟଇଣ୍ଡିଜ ଖେଳାଳି ବିଭିନ୍ନ ଘରୋଇ ଟି୨୦ ଲିଗ୍ ଖେଳି ଏକାଠି ହୋଇଥିଲେ।
