କୋଲକାତା,୧୯ା୨: ଅଧିନାୟକ ଶାଇ ହୋପ୍ଙ୍କ ଅପରାଜିତ ଅର୍ଦ୍ଧଶତକ ଏବଂ ବୋଲରଙ୍କ ଶୃଙ୍ଖଳିତ ବୋଲିଂ ସହାୟତାରେ ଓ୍ବେଷ୍ଟଇଣ୍ଡିଜ ଚଳିତ ଟି୨୦ କ୍ରିକେଟ ବିଶ୍ୱକପ୍ରେ ଇଟାଲିକୁ ୪୨ ରନରେ ପରାସ୍ତ କରିଛି। ଦଳ ଗ୍ରୁପ୍ ‘ସି’ରେ ଅପରାଜେୟ ରହି ଟୁର୍ନାମେଣ୍ଟର ସୁପର-୮ରେ ସ୍ଥାନ ପକ୍କା କରିଛି।
ଗୁରୁବାର ଖେଳାଯାଇଥିବା ମ୍ୟାଚ୍ରେ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଓ୍ବେଷ୍ଟଇଣ୍ଡିଜ ଆରମ୍ଭରେ ଅସ୍ଥିରତା ପରିଲକ୍ଷିତ ହୋଇଥିଲା। ଇଟାଲିର ଅଭିଜ୍ଞ ସ୍ପିନର ବେନ୍ ମାନେଣ୍ଟି (୨/୩୭) ଓ କ୍ରିଶାନ କାଲୁଗାମେଜ (୨/୨୫) ରନ ସଂଗ୍ରହରେ ଅଙ୍କୁଶ ଲଗାଇଥିଲେ। ତେବେ ପ୍ଲେୟର ଅଫ୍ ଦି ମ୍ୟାଚ୍ ଶାଇ ହୋପ୍ଙ୍କ ଆକର୍ଷଣୀୟ ୭୫ରନ (୪୬ ବଲ୍, ୬ ଚୌକା ଓ ୪ ଛକା) ସହାୟତାରେ ଦଳ ନିର୍ଦ୍ଧାରିତ ଓଭରରେ ୬ ଉଇକେଟ ବିନିମୟରେ ୧୬୫ ରନ କରିଥିଲା। ୧୬୬ ରନର ବିଜୟ ଲକ୍ଷ୍ୟକୁ ପିଛା କରି ଇଟାଲି ୧୮ ଓଭରରେ ୧୨୩ ରନ କରି ଅଲଆଉଟ ହୋଇଯାଇଥିଲା।
ଓ୍ବେଷ୍ଟଇଣ୍ଡିଜର ମାଥ୍ୟୁ ଫୋର୍ଡ (୩/୧୯), ଶମର ଯୋଶେଫ (୪/୩୦) ଓ ଗୁଡାକେଶ ମୋତି (୨/୨୪) ଚମତ୍କାର ବୋଲିଂ କରି ଇଟାଲିର ବ୍ୟାଟିଂ ବିପର୍ଯ୍ୟୟ ସୃଷ୍ଟି କରିଥିଲେ।
