ବେତନଟୀ,୪ା୧୧(ସ୍ବ.ପ୍ର.): ଗତ କିଛି ଦିନ ହେଲା ଗୋଡ଼ରେ ଆଘାତପ୍ରାପ୍ତ ହୋଇ ପଶ୍ଚିମବଙ୍ଗ ବନବିଭାଗ ଦ୍ୱାରା ଚିକିତ୍ସିତ ଏକ ଦନ୍ତା ବୁଧବାର ଓଡ଼ିଶା ସୀମା ଅତିକ୍ରମ କରି ବେତନଟୀ ରେଞ୍ଜରେ ପ୍ରବେଶ କରିଛି। ଏହି ଦନ୍ତା ଏବେ ମୟୂରଭଞ୍ଜ ବନ ବିଭାଗର ଚିନ୍ତା ବଢ଼ାଇଛି। ଅସୁସ୍ଥ ଦନ୍ତାର ଆବଶ୍ୟକ ଚିକିତ୍ସା ପାଇଁ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଡାକ୍ତର ପୀୟୂଷ ସୋରେନ ଏବଂ ଏସିଏଫ୍ ରବିନାରାୟଣ ମହାନ୍ତି ପହଞ୍ଚି ତାହାର ଗତିବିଧି ଅନୁଧ୍ୟାନ କରିଛନ୍ତି। ଅସୁସ୍ଥ ଦନ୍ତା ବେତନଟୀ ରେଞ୍ଜ ଅଧୀନ ବଡ଼ାମପୁର ସଂରକ୍ଷିତ ଜଙ୍ଗଲ ଅଞ୍ଚଳରେ ରହୁଥିବା ବେଳେ ଠିକ୍ ଭାବେ ଚଳପ୍ରଚଳ କରିପାରୁନାହିଁ। ଏନେଇ ଡାକ୍ତରୀ ଟିମ୍ ସ୍ଥିତି ଅନୁଧ୍ୟାନ କରି ଫେରିଥିବା ବେଳେ ଅସୁସ୍ଥ ଦନ୍ତାର ଚିକିତ୍ସା କରୁଥିବା ପଶ୍ଚିମବଙ୍ଗ ଡାକ୍ତରୀ ଟିମ୍ ସହିତ ମୟୂରଭଞ୍ଜ ବନବିଭାଗ ସମ୍ପର୍କ ସ୍ଥାପନ କରିଛି। ପଶ୍ଚିମବଙ୍ଗରେ ଚାଲିଥିବା ଚିକିତ୍ସା ପଦ୍ଧତି ମୁତାବକ ଏଠାରେ ମଧ୍ୟ ଚିକିତ୍ସା କରାଯିବ ବୋଲି ଏସିଏଫ୍ ମହାନ୍ତି ସୂଚନା ଦେଇଛନ୍ତି। ତେବେ ହାତୀର ଚିକିତ୍ସା ପାଇଁ ଟ୍ରଙ୍କୁଲାଇଜ କରାଯିବାର ଆବଶ୍ୟକତା ନ ଥିବା ବେଳେ ଖାଦ୍ୟରେ ଔଷଧ ମିଶାଇ ଚିକିତ୍ସା କରାଯାଉଛି। ତେବେ ବନ ବିଭାଗର ଏକ ସ୍ବତନ୍ତ୍ର ଟିମ ୨୪ଘଣ୍ଟା ଧରି ଅସୁସ୍ଥ ଦନ୍ତାର ଗତିବିଧି ଏବଂ ସ୍ବାସ୍ଥ୍ୟାବସ୍ଥା ଉପରେ ନଜର ରଖିଥିବା ଏସିଏଫ୍ କହିଛନ୍ତି। ଅନ୍ୟପକ୍ଷରେ ଅସୁସ୍ଥ ଦନ୍ତା ବିଚରଣ କରୁଥିବା ଜଙ୍ଗଲର ଅପରପାର୍ଶ୍ୱରେ ଶିମିଳିପାଳ ହାତୀପଲ ରହୁଥିବାରୁ ସେମାନଙ୍କ ସହ ମୁହଁାମୁହିଁ ସ୍ଥିତି ଉପୁଜିବାର ଯଥେଷ୍ଟ ଆଶଙ୍କା ରହିଛି। ଯାହାକି ଅସୁସ୍ଥ ଦନ୍ତାର ଜୀବନ ପ୍ରତି ବିପଦ ବଢ଼ିବାର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ।
