କୋଲକତା,୨୫।୧୧: ଆସନ୍ତା ବର୍ଷ ପଶ୍ଚିମବଙ୍ଗ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏହାପୂର୍ବରୁ ଭାରତୀୟ ଜନତା ପାର୍ଟି ଏବଂ ଶାସକ ଦଳ ତୃଣମୂଳ କଂଗ୍ରେସ ମଧ୍ୟରେ ଆରୋପପ୍ରତ୍ୟାରୋପ ଲାଗି ରହିଛି। ପଶ୍ଚିମବଙ୍ଗର ଭାଜପା ଉପାଧ୍ୟକ୍ଷ ରାଜୁ ବାନାର୍ଜୀ ପଶ୍ଚିମବଙ୍ଗ ସରକାର ଏବଂ ପୋଲିସକୁ ନେଇ ବିବାଦୀୟ ମନ୍ତବ୍ୟ ଦେଇଛନ୍ତି। ରାଜୁ କହିଛନ୍ତି, ପଶ୍ଚିମବଙ୍ଗରେ ପୋଲିସ ଗୁଣ୍ଡାରାଜକୁ ରୋକିବା ପାଇଁ ମମତା ସରକାର କୌଣସି ପଦକ୍ଷେପ ନେଉନାହାଁନ୍ତି। ଯଦି ଭାରତୀୟ ଜନତା ପାର୍ଟି କ୍ଷମତାକୁ ଆସେ ତେବେ ପୋଲିସକୁ ଜୋତା ଚାଟିବାକୁ ବାଧ୍ୟ କରିବ। ଦୁର୍ଗାପୁରରେ ଏକ କାର୍ଯ୍ୟକ୍ରମରେ ଯୋଗ ଦେଇ ରାଜୁ ବାନାର୍ଜୀ ଏହି ସୂଚନା ଦେଇଛନ୍ତି। ସେ କହିଥିଲେ, ଆଜିକାଲି ପଶ୍ଚିମବଙ୍ଗରେ କଣ ଘଟୁଛି ଦେଖନ୍ତୁ? ରାଜ୍ୟରେ ଗୁଣ୍ଡାରାଜ ଜାରି ରହିବ କି? ପୋଲିସ କୌଣସି ପ୍ରକାରେ ସାହାଯ୍ୟ କରୁନାହିଁ। ଏପରି ପୋଲିସ ସହିତ କ’ଣ କରିବା ଉଚିତ୍? ଆମେ ସେମାନଙ୍କୁ ଜୋତା ଚଟାଇବୁ ବୋଲି ସେ କହିଛନ୍ତି। ଏହାପୂର୍ବରୁ ରାଜୁ ବାନାର୍ଜୀ ଏକ ସାଧାରଣ ସଭାରେ ଭାଜପା ନେତା ଓ ଶ୍ରମିକଙ୍କ ହତ୍ୟା ମାମଲା ଉଠାଇଥିଲେ। ରାଜ୍ୟ ସରକାରଙ୍କ ଉପରେ ବର୍ଷି ସେ କହିଛନ୍ତି ଯେ ଭାଜପା କାଉନସିଲରଙ୍କୁ ସର୍ବସାଧାରଣରେ ହତ୍ୟା କରାଯାଇଛି ଏବଂ ପୋଲିସ କାହାକୁ ଗିରଫ କରିପାରିବ ନାହିଁ। ଯଦି ଆମେ ଚାହଁିବୁ ତେବେ ରାଜ୍ୟର ସମସ୍ତ ପୋଲିସ ଷ୍ଟେଶନକୁ ଧ୍ୱଂସ କରିଦେବୁ, ଏହା ଏକ ମିନିଟ ଲାଗିବ। ସବୁ ପୋଲିସ ଷ୍ଟେଶନ ଧ୍ୱଂସ ହେବ ଏବଂ ପୋଲିସ ତୃଣମୂଳ କଂଗ୍ରେସ କାର୍ଯ୍ୟାଳୟରେ ବସିବ। ପୋଲିସ କର୍ମଚାରୀମାନେ ତୃଣମୂଳ କଂଗ୍ରେସର ଦଲାଲ ଏବଂ ଚାମ୍ଚା ପାଲଟିଛନ୍ତି ବୋଲି ରାଜୁ କହିଛନ୍ତି।
