ବେଙ୍ଗାଲୁରୁ,୯।୩: କର୍ନାଟକରେ ଭାଜପା ଏମ୍ପି ଏସ ମୁନିସ୍ବାମୀ ବିବାଦ ଘେରକୁ ଆସିଛନ୍ତି। ଅନ୍ତର୍ଜାତୀୟ ମହିଳା ଦିବସରେ ମୁନିସ୍ବାମୀ କୋଲାର ଜିଲାରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହି ସମୟରେ ସେ ଟିକିଲି ଲଗାଇ ନ ଥିବାରୁ ଜଣେ ମହିଳାଙ୍କୁ ଗାଳି ଦେଇଥିଲେ। ତାଙ୍କର ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭାଜପା ଏମ୍ପିଙ୍କ ଏଭଳି ଆଚରଣକୁ କଂଗ୍ରେସ ବିରୋଧ କରିଛି।
ମହିଳା ଦିବସରେ ଆୟୋଜିତ କାର୍ଯ୍ୟକ୍ରମରେ ପହଞ୍ଚିଥିବା ମୁନିସ୍ବାମୀ ବିଭିନ୍ନ ଷ୍ଟଲ ଯାଞ୍ଚ କରୁଥିଲେ। ଏହି ସମୟରେ ସେ ଏକ ଷ୍ଟଲରେ ପହଞ୍ଚି ସେଠାରେ ଉପସ୍ଥିତ ଥିବା ମହିଳା ବିକ୍ରେତାଙ୍କୁ ଦେଖି ରାଗି ଯାଇଥିଲେ। ମହିଳା ଜଣଙ୍କ ହସି ହସି ଏମ୍ପିଙ୍କୁ ତାଙ୍କ ଷ୍ଟଲ ବିଷୟରେ କହିବା ଆରମ୍ଭ କରିବା ମାତ୍ରେ ସେ ତାଙ୍କ ଉପରେ ଗାଳି କରିବାକୁ ଲାଗିଲେ। ଏମ୍ପି ତାଙ୍କୁ କହିଥିଲେ, ପ୍ରଥମେ ଟିକିଲି ଲଗାଆୟ। ତୁମର ସ୍ବାମୀ ଜୀବିତ ଅଛନ୍ତି … ନୁହେଁ କି? ତୁମର କୌଣସି ସାଧାରଣ ଜ୍ଞାନ ନାହିଁ କି?
ମହିଳା ଦିବସରେ ମୁନିସ୍ବାମୀ ମହିଳାଙ୍କୁ ଗାଳି କରିବା ନେଇ ବିବାଦରେ ଛନ୍ଦି ହୋଇପଡିଛନ୍ତି। ଭାଜପା ଏମ୍ପିଙ୍କ ଏହି ମନୋଭାବକୁ କଂଗ୍ରେସ ନିନ୍ଦା କରିଛି। କଂଗ୍ରେସ ନେତା ଅଳକା ଲାମ୍ବା ଲେଖିଛନ୍ତି, ସଂଘର ଅଗଣାରେ ସଂସ୍କାର କ୍ଲାସ୍।
