ମସ୍କୋ,୯।୫ : ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଏକ ବର୍ଷରୁ ଅଧିକ ସମୟ ଧରି ଚାଲିଆସୁଛି। ଏଥିରେ ଭ୍ଲାଡିମୀର ପୁଟିନଙ୍କ ସେନା ବହୁ କ୍ଷତି ସହିଛି। ରୁଷିଆର ସେନା ପାଖରେ ଅସ୍ତ୍ରଶସ୍ତ୍ରର ଅଭାବ ରହିଛି। ଏହି ସମୟରେ, ଖବର ମିଳିଛି ରୁଷିଆ ୭୦ ବର୍ଷ ପୁରୁଣା ସୋଭିଏତ ଯୁଗର ଟ୍ୟାଙ୍କକୁ ଯୁଦ୍ଧରେ ନିୟୋଜିତ କରିଛି। କେହିକେହି ଏହାକୁ ଏକ ମୂର୍ଖ ପଦକ୍ଷେପ ବୋଲି କହିପାରନ୍ତି। କିନ୍ତୁ ବିଶେଷଜ୍ଞମାନଙ୍କ ଅନୁସାରେ ଏହା ପ୍ରଭାବଶାଳୀ ହୋଇପାରିବ। ସମ୍ପ୍ରତି ଏଭଳି ଭିଡିଓ ସାମ୍ନାକୁ ଆସିଛି, ଯେଉଁଥିରେ ପୁରୁଣା ଟ୍ୟାଙ୍କଗୁଡ଼ିକ ଏକ କାର୍ଗୋ ଟ୍ରେନରେ ଲୋଡ ହୋଇଥିବା ଦେଖାଯାଉଛି ।
ଏଗୁଡ଼ିକ ହେଉଛି ଟି -୫୫ ଟ୍ୟାଙ୍କ, ଯାହା ଦ୍ୱିତୀୟ ବିଶ୍ୱଯୁଦ୍ଧ ପରେ ୧୯୪୮ ମସିହାରେ ରୁଷିଆ ସେନାରେ ସାମିଲ କରିଥିଲା। ଏହାକୁ ଦେଖିବାକୁ ଚାହିଁଲେ ସଂଗ୍ରହାଳୟକୁ ଯିବାକୁ ପଡିବ। ଏହି ଭିଡିଓକୁ ଜଣେ ମହିଳା ରେକର୍ଡ କରିଛନ୍ତି। ମାର୍ଚ୍ଚ ଶେଷରେ ଏହି ଭିଡିଓ ପ୍ରସ୍ତୁତ କରାଯାଇଥିଲା। ଐତିହାସିକ ଜନ ଡେଲାନି କହିଛନ୍ତି ଶୀତଯୁଦ୍ଧରେ ସୋଭିଏତ ୟୁନିଅନର ଏହା ମୁଖ୍ୟ ଟ୍ୟାଙ୍କ ଥିଲା।
ଡେଲାନି କହିଛନ୍ତି , ରେଡ ଆର୍ମି ପାଇଁ ଟି -୫୫ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ଟ୍ୟାଙ୍କ। ପରେ, ଏହାର ଅନ୍ୟାନ୍ୟ ସଂସ୍କରଣ ନିର୍ମାଣ ହୋଇଥିଲା, ଯାହାକି ବିଶ୍ୱରେ ଉତ୍ପାଦିତ ହୋଇଥିବା ସର୍ବାଧିକ ସଂଖ୍ୟକ ଟ୍ୟାଙ୍କ ଥିଲା। ଏହିପରି ଏକ ଲକ୍ଷରୁ ଅଧିକ ଟ୍ୟାଙ୍କ ତିଆରି କରାଯାଇଥିଲା। ସେଗୁଡ଼ିକ ଶସ୍ତା, ନିର୍ଭରଯୋଗ୍ୟ, ବ୍ୟବହାର ଏବଂ ରକ୍ଷଣାବେକ୍ଷଣ ପାଇଁ ସହଜ ଥିଲା। କିନ୍ତୁ ପାଶ୍ଚାତ୍ୟ ଦେଶର ଟ୍ୟାଙ୍କ ତୁଳନାରେ ଏହା ଶକ୍ତିଶାଳୀ ନ ଥିଲା। ୧୯୯୧ ରେ ପ୍ରଥମ ଗଲ୍ଫ ଯୁଦ୍ଧରେ ଆମେରିକୀୟ ଏବଂ ବ୍ରିଟିଶ ଟ୍ୟାଙ୍କଗୁଡିକ ୨୩ କିଲୋମିଟର ଦୂରରୁ ଇରାକୀ ଟି-୫୫ ଟ୍ୟାଙ୍କ କୁ ଧ୍ୱଂସ କରୁଥିଲେ।
ଡେଲାନି କହିଛନ୍ତି, ସୋଭିଏତମାନେ କିଛି ଫିଙ୍ଗନ୍ତି ନାହିଁ । ଏହା ସମ୍ଭବ ବହୁ ସଂଖ୍ୟକ ଟ୍ୟାଙ୍କ ଏପର୍ଯ୍ୟନ୍ତ କୌଣସି ସ୍ଥାନରେ ରଖାଯାଇଛି। ଏପ୍ରିଲରେ ଖବର ଆସିଥିଲା ଏହି ଟ୍ୟାଙ୍କଗୁଡିକ ସୀମା ନିକଟରେ ଦେଖାଯାଇଥିଲା। ୟୁକ୍ରେନର ଦାବି ଅନୁଯାୟୀ, ଯୁଦ୍ଧ ଆରମ୍ଭରୁ ୩,୭୦୦ରୁ ଅଧିକ ରୁଷିଆ ଟ୍ୟାଙ୍କ ନଷ୍ଟ ହୋଇଯାଇଛି। ବିଶେଷଜ୍ଞମାନେ କହିଛନ୍ତି, ରୁଷିଆ କ୍ରମାଗତ ଭାବରେ ଟି -୯୦ ଟ୍ୟାଙ୍କ ଉତ୍ପାଦନ କରୁଛି। ଏହାକୁ ତିଆରି କରିବାକୁ ସମୟ ଲାଗୁଛି, ଯେଉଁଥିପାଇଁ ରୁଷିଆ ପୁରୁଣା ଟାଙ୍କି ନିୟୋଜିତ କରିଛି। ଯଦି ୟୁକ୍ରେନ ପ୍ରତିପକ୍ଷ ଆକ୍ରମଣର ଜବାବ ଦେବା ପାଇଁ ଷ୍ଟାଟିକ ପ୍ରତିରକ୍ଷା ବାହିନୀ ପାଇଁ ବ୍ୟବହାର କରାଯାଏ ତେବେ ଏହା ଭଲ ହେବ। ଆଧୁନିକ ଟ୍ୟାଙ୍କ ଅପେକ୍ଷା ଏହା ବ୍ୟବହାର କରିବା ସହଜ।
