ସିମଲା,୧୫।୧୦(ପି.ଟି.): ହିମାଚଳପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସ କ୍ଷମତାକୁ ଫେରିଲେ ସରକାରୀ କର୍ମଚାରୀମାନଙ୍କ ପାଇଁ ପୁରୁଣା ପେନ୍ସନ ଯୋଜନା ଲାଗୁ ହେବ ବୋଲି ଦଳର ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ଶୁକ୍ରବାର ପ୍ରତିଶ୍ରୁତି ଦେଇଛନ୍ତି। ସୋଲାନ ଜିଲାର ଥୋଡୋ ମଇଦାନରେ ‘ପରିବର୍ତ୍ତନ ପ୍ରତିଜ୍ଞା ରାଲି’କୁ ସମ୍ବୋଧନ କରି ଏଆଇସିସି ସାଧାରଣ ସମ୍ପାଦିକା ଏହା କହିଛନ୍ତି। କେନ୍ଦ୍ରର ଭାଜପା ନେତୃତ୍ୱାଧୀନ ସରକାର ପୁରୁଣା ପେନ୍ସନ ଯୋଜନାକୁ ଉଚ୍ଛେଦ କରିଥିଲା। ଏହାକୁ ଫେରାଇ ଆଣିବା ଦାବିରେ ରାଜ୍ୟର ୨ ଲକ୍ଷ କର୍ମଚାରୀ ଦୁଇମାସ ଯାଏ ଧାରଣାରେ ବସିଥିଲେ। ଉକ୍ତ ପେନ୍ସନ ଯୋଜନା ସହ ଏକ ଲକ୍ଷ ନିଯୁକ୍ତି ସୃଷ୍ଟି ନିମନ୍ତେ କଂଗ୍ରେସ ସରକାରଙ୍କ ପ୍ରଥମ କ୍ୟାବିନେଟ ବୈଠକରେ ନିଷ୍ପତ୍ତି ନିଆଯିବ ବୋଲି ପ୍ରିୟଙ୍କା କହିଛନ୍ତି। ହିମାଚଳପ୍ରଦେଶରେ ୬୩,୦୦୦ ପଦବୀ ଖାଲି ପଡ଼ିଥିବାବେଳେ ବେରୋଜଗାରୀଙ୍କୁ ନିଯୁକ୍ତି ଦିଆଯାଉ ନାହିଁ। ୫ବର୍ଷ ମଧ୍ୟରେ କଂଗ୍ରେସ ସରକାର ୫ ଲକ୍ଷ ଲୋକଙ୍କୁ ନିଯୁକ୍ତି ଦେବା ସହ ମହିଳାମାନଙ୍କ ଜୀବନ ଧାରଣ ମାନ ବୃଦ୍ଧି ଲାଗି ସେମାନଙ୍କୁ ମାସିକ ୧,୫୦୦ ଟଙ୍କା ଭତ୍ତା ଦିଆଯିବ ବୋଲି ପ୍ରିୟଙ୍କା କହିଛନ୍ତି।
