ମୁମ୍ବାଇ,୧୫।୩ : ଆଦାନୀ ପ୍ରସଙ୍ଗରେ ବିରୋଧୀ ଦଳ ସରକାରଙ୍କୁ ଘେରିବାକୁ ପ୍ରସ୍ତୁତ ହେଉଛନ୍ତି। ବୁଧବାର ୧୮ ବିରୋଧୀ ଦଳର ନେତାମାନେ ଏହି ପ୍ରସଙ୍ଗରେ ଆଲୋଚନା କରିଆଗକୁ ରଣନୀତି ପ୍ରସ୍ତୁତ କରିବେ। ବିରୋଧୀ ଦଳର ସମସ୍ତ ଏମ୍ପିଙ୍କ ଦ୍ୱାରା ଏକ ପ୍ରସ୍ତାବ ପ୍ରସ୍ତୁତ ହୋଇ ଦସ୍ତଖତ କରାଯିବ। ବିରୋଧୀ ଦଳ ମଧ୍ୟ ଇଡି କାର୍ଯ୍ୟାଳୟ ପର୍ଯ୍ୟନ୍ତ ଏକ ବିରୋଧ ପ୍ରଦର୍ଶନ ରାଲି କରିପାରନ୍ତି। ବିରୋଧୀ ଦଳର ପ୍ରସ୍ତୁତିକୁ ଦୃଷ୍ଟିରେ ରଖି ଦିଲ୍ଲୀର ବିଜୟ ଚୌକ ଅଞ୍ଚଳରେ ଅଧିକ ସଂଖ୍ୟକ ପୋଲିସ ଫୋର୍ସ ମୁତୟନ କରାଯାଇଛି।
ଅନ୍ୟପକ୍ଷରେ ଉଦ୍ଧବ ବାଲାସାହେବ ଠାକରେ ଦଳର ନେତା ସଞ୍ଜୟ ରାଉତ କହିଛନ୍ତି ଯେ ଭାଜପା ସରକାର ବିରୋଧୀଙ୍କୁ ଟାର୍ଗେଟ କରୁଛନ୍ତି। ଯେପରି ସେମାନେ ନିଜେ ପରିଷ୍କାର ଏବଂ ଦୁର୍ନୀତି ମୁକ୍ତ ଅଟନ୍ତି। ସରକାରଙ୍କୁ ପ୍ରଶ୍ନ କରୁଥିବା ବ୍ୟକ୍ତିଙ୍କୁ ଟାର୍ଗେଟ କରାଯାଉଛି। ନକଲି ମାମଲାରେ ବିରୋଧୀ ଦଳର ନେତାଙ୍କୁ ଜେଲ ପଠାଯାଉଛି। ଏତେ ବଡ ଦୁର୍ନୀତି ସହ ଜଡିତ ଗୌତମ ଆଦାନୀଙ୍କୁ ମଧ୍ୟ ସମନ ଜାରି କରାଯାଇ ନାହିଁ। ଆମେ ବିରୋଧୀ ଦଳମାନେ ଏକଜୁଟ ହୋଇ ଏହାର ପ୍ରମାଣ ଉପସ୍ଥାପନ କରିବୁ ଏବଂ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ ବୋଲି ସରକାରଙ୍କୁ ପଚାରିବୁ।
କଂଗ୍ରେସ ସମେତ ବିରୋଧୀ ଦଳମାନେ ଆଦାନୀ ମାମଲାର ତଦନ୍ତ ପାଇଁ ଜେପିସି ଦାବି କରୁଛନ୍ତି। ବର୍ତ୍ତମାନର ବଜେଟ ଅଧିବେଶନରେ ବିରୋଧୀ ଦଳ ଆଦାନୀ ପ୍ରସଙ୍ଗରେ ସ୍ବର ଉତ୍ତୋଳନ କରିଛନ୍ତି। ଏଥି ସହ ଶାସକ ଦଳ ଲଣ୍ଡନରେ ଦେଇଥିବା ବିବୃତ୍ତି ପାଇଁ ରାହୁଲ ଗାନ୍ଧୀଙ୍କଠାରୁ କ୍ଷମା ମାଗିବାକୁ ଦାବି କରୁଛନ୍ତି। ଯେଉଁ କାରଣରୁ ସଂସଦ କାର୍ଯ୍ୟ ଅଚଳ ହୋଇ ଯାଇଛି। କଂଗ୍ରେସ ଆଦାନୀ ମାମଲାକୁ ନେଇ ସକ୍ରିୟ ଭାବେ ଶାସକ ଦଳକୁ ବିରୋଧ କରୁଛି। ଏହି ପ୍ରସଙ୍ଗରେ କଂଗ୍ରେସ ସରକାରଙ୍କୁ ଘେରିବାକୁ ଚେଷ୍ଟା କରୁଛି ଏବଂ ସାରା ଦେଶରେ ପ୍ରଦର୍ଶନ କରାଯାଉଛି। ବିଭିନ୍ନ ରାଜ୍ୟରେ କଂଗ୍ରେସ କମିଟି ଆଦାନୀ ମାମଲାରେ ବିରୋଧ ପ୍ରଦର୍ଶନ କରୁଛନ୍ତି। ଏଥି ସହିତ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ମଧ୍ୟ ଲଗାତାର ଗୃହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଟାର୍ଗେଟ କରୁଛନ୍ତି।
