ନୂଆଦିଲ୍ଲୀ,୨୧।୧୨ : ଲୋକସଭାରେ ଡ୍ରଗ୍ସ ପ୍ରସଙ୍ଗରେ ପ୍ରତିକ୍ରିୟା ରଖି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା କହିଛନ୍ତି ଯେ ଡ୍ରଗ୍ସ ଦେଶ ପାଇଁ ଏକ ଗୁରୁତର ସମସ୍ୟା। ଡ୍ରଗ୍ଟ ବିରୋଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର କଠୋର ନୀତି ଆପଣାଇଛନ୍ତି। ଡ୍ରଗ୍ସ ସମ୍ବନ୍ଧରେ କୌଣସି ରାଜନୀତି ହେବା ଉଚିତ ନୁହେଁ।
ଡ୍ରଗ୍ସ ଉପରେ ସରକାରଙ୍କ ଶୂନ୍ୟ ସହନଶୀଳତା ନୀତି ରହିଛି। ଦେଶକୁ ଡ୍ରଗ ମୁକ୍ତ କରିବା ପ୍ରଧାନମନ୍ତ୍ରୀ ମୋଦିଙ୍କ ସଂକଳ୍ପ। ଶାହା କହିଛନ୍ତି ଯେ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ଡ୍ରଗ୍ସ ବିରୋଧରେ ଏକଜୁଟ ହୋଇ ଲଢ଼େଇ କରିବାକୁ ପଡ଼ିବ। ସୀମା, ବନ୍ଦର ଏବଂ ବିମାନବନ୍ଦର ମାଧ୍ୟମରେ ଡ୍ରଗ୍ସର ପ୍ରବେଶକୁ ବନ୍ଦ କରିବା ଆବଶ୍ୟକ।
ଆୟକର ବିଭାଗ, ଏନସିବି ଏବଂ ନିଶା ନିବାରଣ ଏଜେନ୍ସିଗୁଡ଼ିକୁ ମିଳିତ ଭାବେ ଡ୍ରଗ କାରବାର ବିରୋଧରେ କାର୍ଯ୍ୟ କରିବା ଲାଗି ଯୋଜନା ପ୍ରସ୍ତୁତ କରିବା ଅପରିହାର୍ଯ୍ୟ। ଆମ ଦେଶରେ ଆତଙ୍କବାଦକୁ ପ୍ରୋତ୍ସାହିତ କରୁଥିବା ଦେଶମାନେ ଡ୍ରଗ୍ସରୁ ମିଳୁଥିବା ଲାଭକୁ ସମାନ ଭାବରେ ବ୍ୟବହାର କରୁଛନ୍ତି। ଏପରିକି ଏହି କଳାଧନର ଉପସ୍ଥିତି ଆମ ଅର୍ଥନୀତିକୁ ଧୀରେ ଧୀରେ ଫମ୍ପା କରିଦିଏ।
