ଭୁବନେଶ୍ୱର,୧୮ା୧୨(ଅନିଲଦାସ):ବିଜେଡି ନେତା ସୁଜିତ କୁମାର ଓ ମମତା ମହାନ୍ତ ଭାଜପାରେ ସାମିଲ ହେବା ପରେ ଦଳର ଆହୁରି କେତେକ ଏମ୍ପି ଦଳ ଛାଡ଼ିବା ନେଇ ବିଭିନ୍ନ ସମୟରେ ଭାଜପା ନେତାମାନେ ଗଣମାଧ୍ୟମରେ କହୁଛନ୍ତି। ଏହାକୁ ନେଇ ରାଜନୈତିକ ମହଲରେ ମଧ୍ୟ ଚର୍ଚ୍ଚା ହେଉଛି। ତେବେ ଏଭଳି ଆଲୋଚନା ଭିତରେ ବିଜେଡିର ୭ ଜଣ ରାଜ୍ୟ ସଭା ସଦସ୍ୟ ମଙ୍ଗଳବାର ନୂଆଦିଲ୍ଲୀରେ ଖବରଦାତା ସମ୍ମିଳନୀ ଡାକି ଏଭଳି ଖବରକୁ କଡ଼ା ବିରୋଧ କରିଛନ୍ତି। ସେମାନେ କହିଛନ୍ତି, ବିଜେଡି ଓ ନବୀନ ପଟ୍ଟନାୟକଙ୍କ ସହ ଅଛନ୍ତି ଓ ଶେଷ ଯାଏ ରହିବେ। ଦଳ ଛାଡ଼ିବାର ପ୍ରଶ୍ନ ଉଠୁନାହିଁ। କେତେକ ଗଣମାଧ୍ୟମରେ ଅପପ୍ରଚାର ହେଉଛି। ଉଦ୍ଦେଶ୍ୟମୂଳକ ଭାବେ ବିଜେଡି ଏମ୍ପିଙ୍କ ଚରିତ୍ର ସଂହାର କରାଯାଉଛି। ଏଭଳି ମନଗଢ଼ା ଖବର ପ୍ରସାରଣ ବନ୍ଦ ନ ହେଲେ ଆଇନର ଆଶ୍ରୟ ନିଆଯିବ ବୋଲି ବିଜେଡି ଏମ୍ପିମାନେ ଚେତାଇ ଦେଇଛନ୍ତି।
ବିଜେଡି ରାଜ୍ୟ ସଭା ସଦସ୍ୟ ଅଭିଯୋଗ କରିଛନ୍ତି ଯେ, ରାଜ୍ୟ ସଭା ଅଧ୍ୟକ୍ଷଙ୍କୁ ଭେଟିବା ଘଟଣାକୁ ମିଛ ରାଜନୀତିର ରଙ୍ଗ ଦିଆଯାଉଛି। ମିଳିତ ଖବରଦାତା ସମ୍ମିଳନୀରେ ରାଜ୍ୟ ସଭା ସଦସ୍ୟ ମାନସ ମଙ୍ଗରାଜ ଅଭିଯୋଗ କରିଛନ୍ତି ଯେ, କିଛି ନିର୍ଦ୍ଦିିଷ୍ଟ ଗଣମାଧ୍ୟମ ବିଜେଡିକୁ ବଦନାମ କରିବାକୁ ଉଦ୍ୟମ କରୁଛନ୍ତି। ରାଜ୍ୟ ସଭା ଅଧ୍ୟକ୍ଷଙ୍କୁ ସବୁ ଦଳର ଏମ୍ପିମାନେ ଦୈନିକ ଭେଟି ରାଜ୍ୟ ସମସ୍ୟା କଥା କହିଥାନ୍ତି। ବିଜେଡି ଏମ୍ପିମାନେ ମଧ୍ୟ ସେହିଭଳି ରାଜ୍ୟର କିଛି ସମସ୍ୟାକୁ ନେଇ ତାଙ୍କ ସହ ଆଲୋଚନା କରିଥିଲେ। କିନ୍ତୁ ଏହାକୁ ଏକ ଭିନ୍ନ ଢଙ୍ଗରେ ଚିତ୍ରଣ କରାଯାଉଛି। ଏଥିରେ ସମ୍ପୃକ୍ତ ଏମପିଙ୍କ ମତାମତ ମଧ୍ୟ ନିଆଯାଉ ନାହିଁ ବୋଲି ସେ ଅଭିଯୋଗ କରିଛନ୍ତି। ସେହିଭଳି ଭୁଲ୍ ଖବର ପ୍ରସାରଣ ନ କରିବାକୁ ସାଂସଦ ଦେବାଶିଷ ସାମନ୍ତରାୟ ଓ ମୁନ୍ନା ଖାଁ ଦାବି କରିଛନ୍ତି। ବିଜେଡି ଏକ ଅଛି ଓ ରହିବ। ନବୀନ ପଟ୍ଟନାୟକଙ୍କ ସହ ସବୁ ଏମ୍ପି ଅଛନ୍ତି। ଏହାକୁ ନେଇ ଅପପ୍ରଚାର ନ କରିବାକୁ ସେ କହିଛନ୍ତି। ବିଜେଡି ଏମ୍ପି ସସ୍ମିତ ପାତ୍ର ଅଭିଯୋଗ କରିଛନ୍ତି ଯେ, କିଛି ନ୍ୟସ୍ତସ୍ବାର୍ଥ ଗୋଷ୍ଠୀ ରାଜନୈତିକ ଉଦ୍ଦେଶ୍ୟ ରଖି ଭୁଲ୍ ଖବର ଦେଉଛନ୍ତି। ସେମାନେ ଚାହୁଁଛନ୍ତି ରାଜ୍ୟର ସ୍ବାର୍ଥ କଥା ଦିଲ୍ଲୀରେ ନ ଉଠୁ।
ବିଜେଡି ଏମ୍ପିମାନେ କହିଛନ୍ତି, ଗତ ନିର୍ବାଚନରେ ଭାଜପା ସରକାର ଗଠନର ସଂଖ୍ୟା ଗଣତିରେ ଆଗୁଆ ଥିଲେ ବି ସାମଗ୍ରିକ ଭୋଟ ହାରରେ ବିଜେଡି ଆଗୁଆ ରହିଥିଲା। ସେହିପରି ଏବେ ବି ନବୀନଙ୍କ କ୍ରେଜ୍ କାହିଁରେ କ’ଣ। ତେଣୁ ଏମ୍ପିଙ୍କ ବିରୋଧରେ ମନଗଢ଼ା ଖବର ପ୍ରସାରଣ କରି ବିଜେଡିକୁ ବଦନାମ କରିବାକୁ ଷଡ଼ଯନ୍ତ୍ର କରାଯାଉଛି।
