ଅହମ୍ମଦାବାଦ,୯।୧୦: ୨୦୩୬ ସମର ଅଲିମ୍ପିକ୍ସ ଭାରତରେ ଆୟୋଜିତ ହୋଇପାରେ। ଏହି ଅଲିମ୍ପିକ୍ସ ଆୟୋଜନ ଅଧିକାର ହାସଲ କରିବା ପାଇଁ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ସହ ଆଲୋଚନା ଚାଲିଛି। ଅଲିମ୍ପିକ୍ସ ଆୟୋଜନ ପାଇଁ ଅହମ୍ମଦାବାଦର ମୋଟେରା ଷ୍ଟାଡିୟମ ଶ୍ରେଷ୍ଠ ଭେନ୍ୟୁ ବୋଲି କହିଛନ୍ତି ଇଣ୍ଡିଆନ ଅଲିମ୍ପିକ୍ ଆସୋସିଏଶନ (ଆଇଓଏ) ସଭାପତି ନରିନ୍ଦର ବାତ୍ରା।
ବିଶ୍ୱର ବୃହତ୍ କ୍ରିକେଟ ଷ୍ଟାଡିୟମ ଭାବେ ଜଣାଶୁଣା ମୋଟେରା ଗ୍ରାଉଣ୍ଡକୁ ଚଳିତ ଫେବୃୟାରୀରେ ନରେନ୍ଦ୍ର ମୋଦି ଷ୍ଟାଡିୟମ ନାମରେ ନାମିତ କରାଯାଇଥିଲା।
“ମୋ ମତରେ ଅଲିମ୍ପିକ୍ସର ଉଦ୍ଘାଟନ ଉତ୍ସବ ଲାଗି ମୋଟେରା ଷ୍ଟାଡିୟମ ଶ୍ରେଷ୍ଠ ଭେନ୍ୟୁ। ଅଲିମ୍ପିକ୍ସ ଭଳି ଇଭେଣ୍ଟ ଆୟୋଜନ କରିବା ପାଇଁ ପୂରା ଭାରତରେ ସେଭଳି ଦକ୍ଷତା ଥିବା ଷ୍ଟାଡିୟମ ନାହିଁ। ୨୦୩୬ ସୁଦ୍ଧା କ’ଣ ହେବ, ମୁଁ କହି ପାରିବି ନାହିଁ। କିନ୍ତୁ ଓପନିଂ ସେରିମନି ଲାଗି ମୁଁ ଭେନ୍ୟୁ ଭାବେ ଅହମ୍ମଦାବାଦର ପ୍ରସ୍ତାବ ଦେବି। ଅଲିମ୍ପିକ୍ ଖେଳ ଭାରତର ୩ରୁ ୪ଟି ସହରରେ ଆୟୋଜିତ ହୋଇପାରିବ” ବୋଲି ଆଇଓଏ ମୁଖ୍ୟ କହିଛନ୍ତି।
୨୦୩୬ ଅଲିମ୍ପିକ୍ସ ଗେମ୍ସ ଆୟୋଜନ କରିବାକୁ ଚାହୁଁଛୁ। ଏ ନେଇ ଆମେ ଆଇଓସି ସହ କଥା ହେଉଛୁ। ଏହି ଅଲିମ୍ପିକ୍ସ କେଉଁଠାରେ ହେବ, ତାହା ଆସନ୍ତା ୨ରୁ ୩ ବର୍ଷ ମଧ୍ୟରେ ଜଣାପଡ଼ିବ ବୋଲି ବାତ୍ରା କହିଛନ୍ତି।
