ରାଉରକେଲା,୧୨।୧୦ (ବିପ୍ଳବ ରଞ୍ଜନ ଦାଶ): ରାଉରକେଲା ସହରରେ ୨ଟି ବୃହତ୍ତ ଜଳଯୋଗାଣ ପ୍ରକଳ୍ପର କାର୍ଯ୍ୟ ମନ୍ଥର ଗତିରେ ଚାଲିଛି। ଫଳରେ ୩ଲକ୍ଷ ଲୋକଙ୍କ ପାଖକୁ ବିଶୁଦ୍ଧ ପାନୀୟଜଳ ପହଞ୍ଚାଇବା ଉଦ୍ଦେଶ୍ୟ ସଫଳ ହୋଇପାରିନାହିଁ। ରାଜ୍ୟ ସରକାର ସହରରୁ ଗ୍ରାମାଞ୍ଚଳ ଯାଏ ପ୍ରତ୍ୟେକ ଘରକୁ ଯେଭଳି ବିଶୁଦ୍ଧ ପାନୀୟଜଳ ପହଞ୍ଚିବ ସେଥିପାଇଁ ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ପ୍ରତି ଘରକୁ ଘର ଟ୍ୟାପ ଏବଂ ପାଇପ ମାଧ୍ୟମରେ ବିଶୁଦ୍ଧ ପାନୀୟଜଳ କିଭଳି ସୁରକ୍ଷିତ ଏବଂ ନିରବଚ୍ଛିନ୍ନ ଭାବରେ ପହଞ୍ଚି ପାରିବ ସେଥିପାଇଁ ବହୁ ବୃହତ୍ତ ଜଳପ୍ରକଳ୍ପ ନିର୍ମାଣ ହେଉଛି। ରାଉରକେଲାରେ ଦୁଇ ବୃହତ୍ତ ଜଳପ୍ରକଳ୍ପ ନିର୍ମାଣ କାର୍ଯ୍ୟ ଶେଷ ହୋଇପାରୁନାହିଁ। ଜଳନିଗମକୁ ଆର୍ଥିକ ବର୍ଷ ୨୦୨୦-୨୧ରେ ବିଶୁଦ୍ଧ ପାନୀୟ ଜଳ ସୁରକ୍ଷିତ ଭାବରେ ସହରର ୨୨ଟି ଜୋନକୁ ପହଞ୍ଚାଇବା ନିମନ୍ତେ ଜଳପ୍ରକଳ୍ପ ନିର୍ମାଣ ପାଇଁ ୧୨୯କୋଟି ୬୪ ଲକ୍ଷ ଟଙ୍କା ରାଜ୍ୟ ସରକାରଙ୍କ ଦ୍ୱାରା ମଞ୍ଜୁର ହୋଇଥିଲା। ୨୪ଘଣ୍ଟା ଟ୍ୟାପ ଯୋଗେ ମହାନଗର ନିଗମର ୩ଲକ୍ଷ ଲୋକଙ୍କୁ ଦୈନିକ ବିଶୁଦ୍ଧ ପାନୀୟ ଜଳ ଯୋଗାଇବା ନିମନ୍ତେ ଆର୍ଥିକ ବର୍ଷ ୨୦୨୨-୨୩ରେ ଏକ୍ସ-୭ ଜଳ ବିତରଣ ଯୋଜନାରେ ୬କୋଟି ୫୮ଲକ୍ଷ ଟଙ୍କା ବ୍ୟୟବରାଦ ହୋଇଥିଲାା ମାତ୍ର ଏହା ମଧ୍ୟେ ବିଭାଗ ତରଫରୁ ଜଳ ପ୍ରକଳ୍ପ ନିର୍ମାଣ ସମ୍ପାଦନର ୨୮ଟି ଗୁରୁତ୍ୱପୂର୍ଣ୍ଣ ଉନ୍ନୟନ କାର୍ଯ୍ୟ ସମ୍ପାଦିତ ହୋଇ ସାରିଥିବାବେଳେ,ଜଳ ବିଶୋଧନ ପ୍ଲାଣ୍ଟ ଫିଲ୍ଟର ହାଉସ ସହିତ ଅନେକ ଗୁରୁତ୍ୱପୂର୍ଣ୍ଣ କାମ ମନ୍ଥର ଗତିରେ ଚାଲିଛି। ରାଉରକେଲାର ଦହିପୋଷ, ପାନପୋଷର ଜୋନ-୧୧, ଛେଣ୍ଡ-୧, ନବକୃଷ୍ଣନଗର ଜୋନ-୩୦, ବେଦବ୍ୟାସ ଜୋନ-୩୫, ଝାଡତରଙ୍ଗ ଜୋନ-୩୬, ଟିମ୍ବର କଲୋନୀ ଜୋନ-୧୫, ମଧୁସୂଦନପାଲ୍ଲୀ ଜୋନ-୧୬, ଜବାହାରନଗର ଜୋନ-୨୭ ପ୍ରମୁଖ ସ୍ଥାନରେ ଜଳପ୍ରକଳ୍ପ ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲିଛି। ଏହିଭଳି ଭାବେ ଏକ୍ସ-୭ ଜଳ ବିତରଣ ଯୋଜନାରେ ଆରଏମ୍ସି ଅଧିନ ୪୦ଟି ଓ୍ବାଡରେ ଟ୍ୟାପ ଯୋଗେ ୨୪ଘଣ୍ଟା ବିଶୁଦ୍ଧ ପାନୀୟ ଜଳ ପ୍ରଦାନ ହେବା ଧାର୍ଯ୍ୟ ଥିବାବେଳେ ପ୍ରକଳ୍ପର ଆନୁସାଙ୍ଗିକ କାର୍ଯ୍ୟମାନ ବାକି ରହିଛି। ଏକ୍ସ-୭ ଯୋଜନା ମୁତାବକ ପ୍ରକଳ୍ପ କାର୍ଯ୍ୟାରମ୍ଭ ୩୦।୪।୨୩ରିଖରେ ହୋଇଥିବାବେଳେ ନିର୍ମାଣ ସମ୍ପୂର୍ଣ୍ଣ ଅବଧି ୨୮।୯।୨୩ରିଖ ଯାଏଁ ରହିଥିଲା। ମାତ୍ର ଇତିମଧ୍ୟେ ପ୍ରକଳ୍ପର ସମ୍ପୂର୍ଣ୍ଣ ହେବା ଅବଧି ପୁରି ସାରିଥିବାବେଲେ ଆର୍ଏମସିର ୩ଲକ୍ଷ ଲୋକଙ୍କ ପାନୀୟ ଜଳ ଜନିତ ସମସ୍ୟାଦି ଦୂରୀକରଣ କରିବା ସରକାରଙ୍କ ଉଦ୍ଦେଶ୍ୟ ପ୍ରକଳ୍ପ ନିର୍ମାଣ କାର୍ଯ୍ୟରେ ମନ୍ଥରତା ପ୍ରତିବନ୍ଧକ ସାଜୁଥିବା ଅଭିଯୋଗ ହେଉଛି। ଏନେଇ ରାଉରକେଲା ଓ୍ବାଟକୋ ମୁଖ୍ୟ ପରିଚାଳକ ପ୍ରତାପ କେଶରୀ ମହାନ୍ତିଙ୍କୁ ପଚାରିବାରୁ କହିଲେ, ଉଭୟ ପ୍ରକଳ୍ପ ମହାନଗର ନିଗମବାସୀଙ୍କ ପାନୀୟଜଳ ଜନିତ ହିତ ସାଧନ ନେଇ ହେଉଛି। ନିର୍ମାଣ କାର୍ଯ୍ୟ ଠିକ ଓ ଉକୃଷ୍ଟ ମାନର ହେବା ସହିତ ଯେଭଳି ଦୀର୍ଘସ୍ଥାୟୀ ରହିବ ସେ ଉପରେ ବିଶେଷ ଗୁରୁତ୍ୱ ଦିଆଯାଇ ଉଭୟ ପ୍ରକଳ୍ପ ନିର୍ମାଣ କାର୍ଯ୍ୟକୁ ଯତ୍ନଶୀଳ ଭାବେ କରାଯାଉଛି। ତୁରନ୍ତ ଉଭୟ ପ୍ରକଳ୍ପ ସମ୍ପୂର୍ଣ୍ଣ କରିବାରେ ବିହିତ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।
