ମଙ୍ଗୁଳି-ଜଗତପୁର,୨୪।୯(ମାନସ ସାମଲ): ରନ୍ଧନ ଗ୍ୟାସ୍ରେ ବିଭିନ୍ନ ପ୍ରକାର ଠକେଇର ଶିକାର ହେଉଛନ୍ତି ଉପଭୋକ୍ତା। ସିଲିଣ୍ଡରରୁ ଲିଟର ଲିଟର ପାଣି ବାହାରୁଥିବାବେଳେ ନିର୍ଦ୍ଧାରିତ ଦରଠାରୁ ଅଧିକ ଟଙ୍କା ନିଆଯାଉଛି। । ଏହି ଘଟଣାକୁ ନେଇ ଉପଭୋକ୍ତାଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଅଭିଯୋଗ ଅନୁସାରେ, କଟକ ଜିଲା ଟାଙ୍ଗୀ ଥାନା ଅନ୍ତର୍ଗତ ଭାଟିମୁଣ୍ଡି ପଞ୍ଚାୟତ ଅନ୍ତର୍ଗତ ସାରଙ୍ଗି ଗ୍ରାମର ଭାଗ୍ୟଧର ସାମଲଙ୍କ ଇଣ୍ଡେନ ଗ୍ୟାସ୍ ଟାଙ୍କିରୁ ଗ୍ୟାସ୍ ବାହାରିବା ପରିବର୍ତ୍ତେ ପାଣି ବାହାରୁଛି। ଫଳରେ ରୋଷେଇ କରି ନ ପାରି ପୂରା ପରିବାର ଭୋକରେ ରହିଛନ୍ତି। ଏନେଇ ଅଭିଯୋଗ କରିବାରୁ ଗ୍ୟାସ୍ ଏଜେନ୍ସି ମାଲିକ ଦୁର୍ବ୍ୟବହାର କରିବା ସହ ଇଣ୍ଡେନ ଗ୍ୟାସ୍ କମ୍ପାନୀର ଭୁବନେଶ୍ୱର ଅଫିସକୁ ଯାଇ ଅଭିଯୋଗ କରିବାକୁ କହୁଥିବା ଭାଗ୍ୟଧର କହିଛନ୍ତି। ସେ ଜଗତପୁର ଥାନା ଅଧୀନ ଗୋପୀନାଥ ବଜାରସ୍ଥିତ ଗୋପୀନାଥ ଇଣ୍ଡେନ ଗ୍ରାମୀଣ ବିତରକ ଗ୍ୟାସ୍ ପଏଣ୍ଟରୁ ଗ୍ୟାସ୍ ଆଣିଥିଲେ। ଏହି ପଏଣ୍ଟରୁ ସାଲେପୁର ନିର୍ବାଚନମଣ୍ଡଳୀର ଅଧିକାଂଶ ପଞ୍ଚାୟତକୁ ସାଧାରଣ ଓ ଉଜ୍ଜ୍ୱଳା ଉପଭୋକ୍ତାଙ୍କ ସହ ଅଙ୍ଗନଓ୍ବାଡ଼ି କେନ୍ଦ୍ରକୁ ଗ୍ୟାସ୍ ବିତରଣ କରାଯାଉଛି। ସିଲିଣ୍ଡର ପିଛା ଦର ନିର୍ଦ୍ଧାରଣ କରାଯାଇଥିଲେ ମଧ୍ୟ ଘର ପାଖରେ ଗ୍ୟାସ୍ ପହଞ୍ଚାଇବାକୁ ଏଜେନ୍ସି ଲୋକଙ୍କଠାରୁ ୩୦ରୁ ୫୦ଟଙ୍କା ଅଧିକ ନେଉଥିବା ଭାଗ୍ୟଧରଙ୍କ ସମେତ ବହୁ ଉପଭୋକ୍ତା ଅଭିଯୋଗ କରିଛନ୍ତି। ସବୁଠାରୁ ବଡ଼ କଥା ହେଉଛି, ୧୪.୫ ଲିଟର ଗ୍ୟାସ୍ ଆଣିଲେ ସିଲିଣ୍ଡରରୁ ୩ରୁ ୪ଲିଟର ପାଣି ବାହାରୁଥିବା ଦୀର୍ଘଦିନ ହେବ ଅଭିଯୋଗ ହୋଇ ଆସୁଛି। ଏଜେନ୍ସି ଭୁବନେଶ୍ୱରରେ ଅଭିଯୋଗ କରିବାକୁ କହୁଥିବାରୁ ସେମାନେ ଚିନ୍ତାରେ ପଡିଛନ୍ତି। ଖବର ପାଇବା ପରେ ଧରିତ୍ରୀ ପ୍ରତିନିଧି ବାସ୍ତବତା ଜାଣିବାକୁ ଉକ୍ତ ଏଜେନ୍ସିକୁ ଯାଇଥିଲେ। ସେହି ସମୟରେ ଭାଗ୍ୟଧର ପାଣି ବାହାରୁଥିବା ଉକ୍ତ ଟାଙ୍କିକୁ ଧରି ଏଜେନ୍ସିରେ ଅଭିଯୋଗ କରିବା ସହ ବଦଳାଇବାକୁ କହୁଥିଲେ। ହେଲେ ଏଜେନ୍ସି ମାଲିକ ଉକ୍ତ ଟାଙ୍କିକୁ ଗ୍ରହଣ ନ କରି ଅନ୍ୟ କାହାର କହି ଫେରାଇ ଦେଇଥିଲେ। ଏନେଇ ଏଜେନ୍ସି ମ୍ୟାନେଜର ଲୋକନାଥ ରାଉତ କହିଛନ୍ତି, କୌଣସି ଗ୍ରାହକଙ୍କ ଟାଙ୍କିରେ ପାଣି ଥିବାର ଅଭିଯୋଗ ଆସିଲେ ସେମାନଙ୍କୁ ଅନ୍ୟଏକ ଟାଙ୍କି ଦିଆଯିବାର ନିୟମ ରହିଛି। କିନ୍ତୁ ଭାଗ୍ୟଧରଙ୍କୁ ଏଜେନ୍ସି ମାଲିକ ଉକ୍ତ ଟାଙ୍କି ଆଉ କାହାର କହି ଫେରସ୍ତ କରିବା ପଛରେ କିଛି ମନ୍ଦ ଉଦ୍ଦେଶ୍ୟ ରହିଥିବା ବାରି ହୋଇପଡୁଛି। ଘଟଣାର ତଦନ୍ତ କରାଯାଇ ଉକ୍ତ ଏଜେନ୍ସି ଓ ଯୋଗାଣକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଉପଭୋକ୍ତାମାନେ ଦାବି କରିଛନ୍ତି।
