ରାସୋଳ,୨୬।୪(ଡି.ଏନ୍.ଏ.): ନଳକୂପ ପାଣି ଦେହକୁ ହିତ ବୋଲି କହୁଛନ୍ତି। ହେଲେ ଆମ ଗାଁର ନଳକୂପରୁ ବାହାରୁ ଥିବା ପାଣି ବିଷ ପାଲଟିଛି। ଏହାକୁ ପିଇ ଲୋକେ ପୋକମାଛି ଭଳି ମରୁଛନ୍ତି। ଗଲା ୫ ବର୍ଷରେ କିଡ୍ନୀ ରୋଗରେ ୮ଜଣଙ୍କ ଜୀବନ ଗଲାଣି। ୪ଜଣ ଆକ୍ରାନ୍ତ ହୋଇ ଶେଯରେ ପଡ଼ିଛନ୍ତି। ନେତା, ଅଧିକାରୀ ଆମ କଥା କେହି ଶୁଣୁନାହାନ୍ତି। ଆଗକୁ ଯଦି କିଛି ଅସୁବିଧା ହୁଏ, ତେବେ ଏଥିପାଇଁ ପ୍ରଶାସନ ଦାୟୀ ରହିବ। ପ୍ରଚଣ୍ଡ ଗ୍ରୀଷ୍ମପ୍ରବାହ ସମୟରେ ପାଣି ମୁନ୍ଦାଏ ପାଇଁ ଡହଳବିକଳ ହେଉଥିବା ଢେଙ୍କାନାଳ ଜିଲା ହିନ୍ଦୋଳ ବ୍ଲକ ରାସୋଳ ପଞ୍ଚାୟତ ନୂଆପାଟଣା ତଅଁଳାସାହିବାସୀ ଦୂଷିତ ପାଣି ପିଇ ରୋଗାକ୍ରାନ୍ତ ହେଉଥିବାବେଳେ ପ୍ରଶାସନିକ ଅବହେଳା ବିରୋଧରେ ଏଭଳି ଚରମବାଣୀ ଶୁଣାଇଛନ୍ତି।
ଅଭିଯୋଗ ଅନୁଯାୟୀ, ପଞ୍ଚାୟତ ସଦରରୁ ମାତ୍ର ଦେଢ଼ କିଲୋମିଟର ଦୂରରେ ଅବସ୍ଥିତ ତଅଁଳାସାହିରେ ମୋଟ୍ ୪୦ ପରିବାର ବାସ କରୁଥିବାବେଳେ ଲୋକସଂଖ୍ୟା ପ୍ରାୟ ୩୦୦। ସାହିରେ ଥିବା ୪୦ ବର୍ଷ ପୁରୁଣା ଏକମାତ୍ର ନଳକୂପ ଏତେସଂଖ୍ୟକ ଗ୍ରାମବାସୀଙ୍କ ଦୈନନ୍ଦିନ ଚାହିଦା ମେଣ୍ଟାଇବାକୁ ଅସମର୍ଥ। ଯେଉଁ ପାଣି ବାହାରୁଛି, ତାହା ହଳଦିଆ ରଙ୍ଗର। ଏହାକୁ କିଛି ସମୟ ରଖିଦେବା ପରେ ତେଲିଆ ଆସ୍ତରଣ ପଡ଼ିଯାଉଛି। ଗ୍ରାମକୁ ପାଇପ୍ ଜଳ ଯୋଗାଣ ବ୍ୟବସ୍ଥା ଥିଲେ ମଧ୍ୟ ଦିନକୁ ମାତ୍ର ୧୦-୧୫ ମିନିଟ୍ ପାଣି ଆସୁଛି, ଯାହା ପର୍ଯ୍ୟାପ୍ତ ହେଉନାହିଁ। ଅନ୍ୟ ବିକଳ୍ପ ନ ଥିବାରୁ ସାହିବାସୀ ଦୂଷିତ ନଳକୂପ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି। ଫଳରେ ଗତ ୫ବର୍ଷରେ ଅରୁଣ ବେହେରା, ପ୍ରମୋଦ ବେହେରା, ଦୁଲେଇ ବେହେରା, କାଳିଆ ବେହେରା, ହେମଲତା ଦାସ, ସୁଗୁରି ଦାସ, ବୁଲୁ ବେହେରା, ଭଗବାନ ବେହେରା ପ୍ରମୁଖ ୮ଜଣଙ୍କ ମୃତ୍ୟୁ ଘଟିଲାଣି। ସେହିପରି ଭାସ୍କର ବେହେରା, ପବିତ୍ର ବେହେରା, କୃଷ୍ଣ ଦାସ, ନୀର ବେହେରା ରୋଗରେ ପୀଡ଼ିତ ହୋଇ ଚିକିତ୍ସାଧୀନ ଅଛନ୍ତି। ଅନ୍ୟପଟେ ଚଳିତବର୍ଷ ପ୍ରଚଣ୍ଡ ଗ୍ରୀଷ୍ମପ୍ରବାହ ସାହିବାସୀଙ୍କ ସମସ୍ୟାକୁ ଆହୁରି ବଢ଼ାଇଦେଇଛି। ଜନସାଧାରଣଙ୍କୁ ବାଦ୍ଦେଲେ ଗୃହପାଳିତ ପ୍ରାଣୀ ମଧ୍ୟ ପାଣି ପାଇଁ ନାହିଁ ନ ଥିବା ହିନସ୍ତା ହେଉଥିବା ଗ୍ରାମର ଜୟନ୍ତ ବେହେରା ଅଭିଯୋଗ କରିଛନ୍ତି। ସେହିପରି ସଞ୍ଜୁ ବେହେରା କୁହନ୍ତି, ସରପଞ୍ଚ ଦିବାକର ନାୟକ ଗ୍ରାମର ପୁଅ। ତାଙ୍କୁ ଅସୁବିଧା କହିଲେ, ସେ ବିଭାଗକୁ ଲେଖି ଜଣାଇବାକୁ କହୁଛନ୍ତି। ପ୍ରଶାସନିକ ଅଧିକାରୀ ଏଥିପ୍ରତି ଦୃଷ୍ଟି ଦେବା ସହ ପାଣି ଯୋଗାଣ ବ୍ୟବସ୍ଥା କରିବା ଜରୁରୀ। ସରପଞ୍ଚ ନାୟକ କୁହନ୍ତି, ସମସ୍ୟାର ସମାଧାନ ପାଇଁ ଚେଷ୍ଟା କରାଯାଉଛି।
ହିନ୍ଦୋଳ ଉପଜିଲାପାଳ ଶିବାନନ୍ଦ ସ୍ବାଇଁ କୁହନ୍ତି, ଅଭିଯୋଗ ପାଇଛି। ବିଭାଗୀୟ ଅଧିକାରୀଙ୍କ ସହ ଆଲୋଚନା କରି ସମସ୍ୟାର ତୁରନ୍ତ ସମାଧାନ କରାଯିବ।
