ମେଲବୋର୍ନ,୨୪।୧୦: ଟି-୨୦ ବିଶ୍ୱକପ୍ ୨୦୨୨ର ପ୍ରଥମ ମ୍ୟାଚ୍ରେ ଭାରତ ପାକିସ୍ତାନକୁ ଚାରି ଉଇକେଟ୍ରେ ପରାସ୍ତ କରିଛି। ଏହି ମ୍ୟାଚରେ ଆର୍. ଅଶ୍ୱିନ ଶେଷ ବଲରେ ଏକ ରନ ନେଇ ଭାରତକୁ ବିଜୟ ଦେଇଥିଲେ। ଏହି ବିଜୟ ପରେ ପଡ଼ିଆରେ ଉପସ୍ଥିତ ଥିବା ଭାରତର ଭେଟେରାନ ଖେଳାଳିମାନେ ମଧ୍ୟ ବିଜୟ ଉତ୍ସବରେ ବୁଡ଼ି ଯାଇଥିଲେ।
ଭାରତର ରୋମାଞ୍ଚକର ବିଜୟ ପରେ ଲିଟିଲ ମାଷ୍ଟର ଭାବରେ ଜଣାଶୁଣା ସୁନୀଲ ଗାଭାସ୍କର ମଧ୍ୟ ନାଚିବା ଆରମ୍ଭ କରିଥିଲେ। ସେ ଛୋଟ ପିଲାଙ୍କ ପରି ଡେଇଁଥିଲେ। ଇରଫାନ ପଠାନ ଏବଂ କେ ଶ୍ରୀକାନ୍ତଙ୍କ ପରି କିମ୍ବଦନ୍ତୀ ମଧ୍ୟ ତାଙ୍କ ସହ ପଡ଼ିଆରେ ଉପସ୍ଥିତ ଥିଲେ ଏବଂ ବିଜୟ ଉତ୍ସବରେ ଡେଇଁ ପଡିଥିଲେ। ଏଥି ସହିତ, ଇରଫାନ ଅନ୍ୟ ଲୋକଙ୍କ ସହ ହାତ ମିଳାଇ ନିଜର ଖୁସି ବ୍ୟକ୍ତ କରିଥିଲେ। କ୍ରୀଡ଼ା ଆଙ୍କର୍ ଜଟିନ ସପ୍ରୁ ମଧ୍ୟ ଭାରତର ବିଜୟ ଉତ୍ସବ ପାଳନ କରୁଥିଲେ।
ଟସ ହାରିବା ପରେ ପ୍ରଥମେ ବ୍ୟାଟିଂ କରି ପାକିସ୍ତାନ ୮ ଉଇକେଟ ହରାଇ ୧୫୯ ରନ ସଂଗ୍ରହ କରିଥିଲା। ଶାନ ମାସୁଦ ୫୨ ଏବଂ ଇଫ୍ଟିକର ଅହମ୍ମଦ ୫୧ ରନ ସ୍କୋର କରିଥିଲେ। ଭାରତ ପାଇଁ ଅର୍ଶଦୀପ ସିଂ ଏବଂ ହାର୍ଦ୍ଦିକ ପାଣ୍ଡ୍ୟା ପ୍ରତ୍ୟେକ ତିନିଟି ଉଇକେଟ ନେଇଥିଲେ। ଭୁବନେଶ୍ୱର ଏବଂ ଶାମି ଗୋଟିଏ ଲେଖାଏ ଉଇକେଟ ନେଇଥିଲେ।
ଏହାର ଜବାବରେ ଭାରତ ୬ ଉଇକେଟ ହରାଇ ଲକ୍ଷ୍ୟ ହାସଲ କରିଥିଲା। ବିରାଟ କୋହଲି ୮୨ ରନର ଅପରାଜିତ ଇନିଂସ ଖେଳିଥିଲେ। ସେ ହାର୍ଦ୍ଦିକଙ୍କ ସହ ୧୧୩ ରନର ଭାଗିଦାରୀ କରିଥିଲେ। ହାର୍ଦ୍ଦିକ ୪୦ ରନ ସଂଗ୍ରହ କରିଥିଲେ। ପାକିସ୍ତାନ ପାଇଁ ହରିସ ରୌଫ ଏବଂ ମହମ୍ମଦ ନୱାଜ ଦୁଇଟି ଲେଖାଏ ଉଇକେଟ ନେଇଥିଲେ।
