ଶାରଜା, ୧୩।୧୦: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଲିଗ୍ ଆଇପିଏଲ୍ର ତ୍ରୟୋଦଶ ସଂସ୍କରଣରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି)ର ଅଫ୍-ସ୍ପିନର ଓ୍ବାଶିଂଟନ ସୁନ୍ଦର ବେଶ୍ ଚମତ୍କାର ପ୍ରଦର୍ଶନ କରିଛନ୍ତି। ବର୍ତ୍ତମାନ ସୁଦ୍ଧା ସେ ୭ ମ୍ୟାଚ୍ରୁ ୫ ଉଇକେଟ୍ ହାସଲ କରିସାରିଛନ୍ତି। ପାଓ୍ବାର ପ୍ଲେ ଓ ଇନିଂସର ମଧ୍ୟଭାଗରେ ମଧ୍ୟ ସେ ବୋଲିଂ କରି ସଫଳତା ପାଇଛନ୍ତି। ଆର୍ସିବିର ବର୍ତ୍ତମାନ ସୁଦ୍ଧା ସଫଳ ଅଭିଯାନରେ ଓ୍ବାଶିଂଟନ୍ଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଛି। ସୋମବାର କୋଲକାତା ନାଇଟ୍ ରାଇଡର୍ସ ବିପକ୍ଷ ମୁକାବିଲାରେ ସେ ୨ଟି ପ୍ରମୁଖ ଉଇକେଟ୍ ନେଇଥିଲେ। ଯେଉଁଥିରେ ଇଂଲଣ୍ଡର ବିଶ୍ୱକପ୍ ବିଜେତା ଅଧିନାୟକ ଇଅନ ମୋର୍ଗାନଙ୍କ ଉଇକେଟ୍ ଅର୍ନ୍ତଭୁକ୍ତ ରହିଛି। ଏହି ହାଇସ୍କୋରିଂ ମ୍ୟାଚ୍ରେ ବାଙ୍ଗାଲୋର ୮୨ ରନର ବୃହତ୍ ବ୍ୟବଧାନରେ ବିଜୟୀ ହୋଇଥିଲା। ମ୍ୟାଚ୍ ପରେ ଅନୁଷ୍ଠତି ଖବରଦାତା ସମ୍ମିଳନୀରେ ସୁନ୍ଦର କହିଛନ୍ତି, ‘ମୁଁ କେବଳ ବୋଲିଂ ଉପରେ ଧ୍ୟାନ ଦେବାକୁ ଚାହୁଁଛି। ଚଳିତ ସିଜନ ମୋ ପାଇଁ ବେଶ୍ ପ୍ରଭାବୀ ସାବ୍ୟସ୍ତ ହୋଇଛି। କୋଲକାତା ବିପକ୍ଷ ବିଜୟ ଆମ ଲାଗି ମହତ୍ତ୍ୱପୂର୍ଣ୍ଣ ଥିଲା।’ ଏଠାରେ ଉଲ୍ଲେଖଯୋଗ୍ୟ, ଆଇପିଏଲ୍ର ଚଳିତ ସିଜନରେ ବର୍ତ୍ତମାନ ସୁଦ୍ଧା ଓ୍ବାଶିଂଟନ ୫୧ଟି ଡଟ୍ ବଲ୍ ବୋଲିଂ କରିସାରିଛନ୍ତି। ଅର୍ଥାତ୍ ତାଙ୍କର ୫୧ ବଲ୍ରୁ ବ୍ୟାଟ୍ସମ୍ୟାନ ରନ୍ ସଂଗ୍ରହ କରିବାରେ ବିଫଳ ରହିଛନ୍ତି। ୟୁଜବେନ୍ଦ୍ର ଚହଲଙ୍କ ସହ ମିଶି ଓ୍ବାଶିଂଟନ ମଧ୍ୟଭାଗରେ ବେଶ୍ ପ୍ରଭାବୀ ବୋଲିଂ କରିଛନ୍ତି।
