ବେଲାଗାଭି,୧୩।୯: କର୍ନାଟକରେ କଂଗ୍ରେସ ଓ ଜେଡିଏସ୍ ସରକାର ଭାଙ୍ଗିବା ପୂର୍ବରୁ କଂଗ୍ରେସ ଛାଡ଼ି ଭାଜପାରେ ଯୋଗଦେବା ପାଇଁ ମୋତେ ଟଙ୍କା ନେବାକୁ ପ୍ରସ୍ତାବ ଦିଆଯାଇଥିଲା। ରବିବାର ଏଭଳି ଦାବି ସହ ରାଜ୍ୟ ରାଜନୀତିରେ ହଟଚମଟ ସୃଷ୍ଟି କରିଛନ୍ତି ଭାଜପା ବିଧାୟକ ଶ୍ରୀମନ୍ତ ବାଲାସାହେବ ପାଟିଲ।
ମୁଁ ଟଙ୍କା ଲୋଭରେ ଭାଜପାରେ ଯୋଗ ଦେଇନାହିଁ। ଭାଜପାରେ ଯୋଗ ଦେବା ପାଇଁ ଟଙ୍କା ନେବାକୁ ପ୍ରସ୍ତାବ ଦିଆଯାଇଥିଲା। ମୋତେ ଯେତେ ଟଙ୍କା ଦରକାର ମୁଁ କହିପାରି ଥାନ୍ତି। କିନ୍ତୁ ମୁଁ ଟଙ୍କା ଚାହିଁ ନ ଥିଲି। ମୁଁ ଲୋକଙ୍କ ସେବା କରିବା ପାଇଁ ବାଛିଥିଲି ମନ୍ତ୍ରୀ ପଦ। ମୋତେ ବର୍ତ୍ତମାନ ସରକାରରେ କାହିଁକି ଯାଗା ମିଳି ନାହିଁ, ତାହା ମୁଁ ଜାଣି ନାହିଁ। କିନ୍ତୁ ମନ୍ତ୍ରିମଣ୍ଡଳ ସମ୍ପ୍ରସାରଣରେ ମୋତେ ମନ୍ତ୍ରୀ ପଦ ଦେବା ଲାଗି ପ୍ରତିଶ୍ରୁତି ଦିଆଯାଇଥିଲା। ଏ ସମ୍ପର୍କରେ କର୍ନାଟକ ମୁଖ୍ୟମନ୍ତ୍ରୀ ବସଭରାଜ ବୋମାଇଙ୍କ ସହ କଥା ହୋଇଥିଲି ବୋଲି ଗଣମାଧ୍ୟମ ଆଗରେ କହିଛନ୍ତି ଭାଜପା ବିଧାୟକ।
ପାଟିଲ କାଗ୍ବାଡ ବିଧାନସଭା ନିର୍ବାଚନ ମଣ୍ଡଳିରୁ ବିଧାୟକ ଅଛନ୍ତି। ଦୀର୍ଘ ଦିନ ଧରି ସେ କଂଗ୍ରେସ ସହ ଥିଲେ। କିନ୍ତୁ ୨୦୧୯ ଜୁଲାଇରେ ସେ କଂଗ୍ରେସ ଛାଡ଼ି ଧରିଥିଲେ ଭାଜପାର ହାତ। କଂଗ୍ରେସ ଓ ଜେଡିଏସ୍ ଛାଡ଼ି ଭାଜପାରେ ଯୋଗ ଦେଇଥିବା ୧୬ ବିଧାୟକଙ୍କ ମଧ୍ୟରେ ପାଟିଲ ଜଣେ। ବି ଏସ୍ ୟଦିୟୁରପ୍ପାଙ୍କ ସରକାରରେ ତାଙ୍କୁ ମନ୍ତ୍ରୀ ପଦ ଦିଆଯାଇଥିଲା। କିନ୍ତୁ ୟଦିୟୁରପ୍ପାଙ୍କ ଇସ୍ତଫା ପରେ ବସଭରାଜ ବୋମାଇଙ୍କ ନେତୃତ୍ୱାଧୀନ ସରକାରରେ ପାଟିଲଙ୍କୁ ମନ୍ତ୍ରୀ ପଦ ମିଳିନାହିଁ।
