କେନ୍ଦୁଝର, ୨୪।୧ (ସ୍ବ.ପ୍ର.) ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ପ୍ରଚାର ଆରମ୍ଭ ହୋଇଯାଇଥିବା ବେଳେ ତେଲକୋଇ ବ୍ଲକ ତାଳପଦା ପଞ୍ଚାୟତର ବଡ଼ଖମଣ ଗ୍ରାମର ଲୋକ ମାନେ ରାସ୍ତା ଓ ପାଣି ପାଇଁ ନିର୍ବାଚନରେ ଭୋଟ ଦେବାରୁ ନିବୃତ୍ତ ରହିବାକୁ ଚେତାବନୀ ଦେଇଛନ୍ତି। ବଣପାହାଡ ଘେରା ଦୁର୍ଗମ ଗ୍ରାମରେ ପାଖାପାଖି ୮୦ ପରିବାର ରହୁଥିବାବେଳେ ଭୋଟର ସଂଖ୍ୟା ୨ ଶହରୁ ଅଧିକ ହେବ। ଏହି ଗ୍ରାମରେ ସବୁଦିନିଆ ରାସ୍ତା ନାହିଁ କିମ୍ବା ପିଇବା ପାଇଁ ପାନୀୟ ଜଳ ବ୍ୟବସ୍ଥା ନାହିଁ। ଏଣୁ ବହୁ କଷ୍ଟରେ ଯିବା ଆସିବା କରୁଥିବା ବେଳେ ନଦୀ ଓ ନାଳ ପାଣି ସେମାନଙ୍କ ସାହା ଭରସା ହୋଇଛି ା ବର୍ଷା ଦିନରେ ୪ ରୁ ୬ ମାସ ସେମାନେ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଆନ୍ତି। ଯାତାୟାତ ବନ୍ଦ ଯୋଗୁ ସେଠାରୁ ୪ କି.ମି. ଦୂରରେ ଥିବା ପଞ୍ଚାୟତ ମୁଖ୍ୟାଳୟକୁ ରାଶନ ସାମଗ୍ରୀ ଆଣିବାକୁ ମଧ୍ୟ ବାହାରି ପାରନ୍ତି ନାହିଁ। ପିଲା ମାନେ ପାଠ ପଢିବାକୁ ସ୍କୁଲକୁ ଯାଇ ପାରନ୍ତି ନାହିଁ। ପ୍ରତ୍ୟେକ ବର୍ଷ ପଞ୍ଚାୟତ ବା ସାଧାରଣ ନିର୍ବାଚନ ଆସିଲେ ପାଣି ଓ ରାସ୍ତା ସମସ୍ୟା ଦୂର ହୋଇଯିବ ବୋଲି ପ୍ରତିଶ୍ରୁତି ମିଳିଥାଏ। ନିର୍ବାଚନ ସରିଗଲେ ଆମ ସମସ୍ୟାକୁ ସରପଞ୍ଚ ଠାରୁ ଆରମ୍ଭ କରି ଅନ୍ୟମାନେ ଭୂଲିଯାଆନ୍ତି। ଏଣୁ ବାଧ୍ୟ ହୋଇ ଆମେ ଏଭଳି ନିଷ୍ପତ୍ତି ନେଉଛୁ ବୋଲି ସ୍ଥାନୀୟ ଲୋକେ କହିଛନ୍ତି। ରୋଗୀ ବା ଗର୍ଭବତୀ ମହିଳାଙ୍କୁ ଡାକ୍ତରଖାନା ନେବାକୁ ହେଲେ ବିପଦ ଶଙ୍କୁଳ ଅବସ୍ଥାରେ ବୋହିକି ନଦୀ ପାର କରି ନେବାକୁ ପଡେ ବୋଲି ମହିଳା ମାନେ କହିଛନ୍ତି ା
ତେଲକୋଇ ବିଡିଓ ପି.ଚାନ୍ଦ ଉକ୍ତ ଗ୍ରାମକୁ ଯାଇ ଲୋକଙ୍କ ସହିତ ଆଲୋଚନା କରିଥିଲେ ହେଁ ଲୋକମାନେ ଦୃଢ ପ୍ରତିଶ୍ରୁତିକୁ ଅପେକ୍ଷା କରି ନିଜ ନିଷ୍ପତ୍ତିରେ ଅଟଳ ରହିଛନ୍ତି। ଏବେ ନିର୍ବାଚନ ଆରମ୍ଭ ହୋଇ ସାରିଥିବାରୁ ନିର୍ବାଚନରେ ଭାଗ ନେଇଥିବା ଦଳ, ପ୍ରାର୍ଥୀ ତଥା ପ୍ରଶାସନ କିପରି ସେମାନଙ୍କୁ ମନାଇ ଭୋଟଦାନକୁ ନିଶ୍ଚିତ କରିବେ ସେ ଉପରେ ସମସ୍ତଙ୍କ ନଜର ରହିଛି। ଏନେଇ ତାଳପଦା ପଞ୍ଚାୟତ ନିର୍ବାହୀ ଅଧିକାରୀ କ୍ଷୀରୋଦ ନାୟକ କହିଛନ୍ତି, ଜଙ୍ଗଲ ଜମି ରାସ୍ତା ଥିବାରୁ ରାସ୍ତା ନିର୍ମାଣରେ ସମସ୍ୟା ଉପୁଜିଛି। ଏଥିପାଇଁ ପ୍ଲାନ ପ୍ରସ୍ତୁତ ସରିଛି। ରାସ୍ତା ହେଲେ ପୋଲ ନିର୍ମାଣ ହେବ ଏବଂ ଯାତାୟାତ ସୁବିଧା ହେବା ପରେ ନଳକୂପ ଖନନ ତଥା ଅନ୍ୟାନ୍ୟ ଉନ୍ନୟନ ମୂଳକ କାମ ହୋଇ ପାରିବ।
