କୋଲକାତା,୩୦।୯: କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ପଶ୍ଚିମବଙ୍ଗର ଭବାନୀପୁର ବିଧାନସଭା ଆସନରେ ଗୁରୁବାର ମତଦାନ ଆରମ୍ଭ ହୋଇଛି। ନିର୍ବାଚନର ଫଳାଫଳ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଭିବିଷ୍ୟତ ନିର୍ଦ୍ଧାରଣ କରିବ। ଭବାନୀପୁରରେ ମୁଖ୍ୟତଃ ତୃଣମୂଳ କଂଗ୍ରେସ(ଟିଏମ୍ସି) ଏବଂ ଭାଜପା ମଧ୍ୟରେ ମୁକାବିଲା ହେଉଛି। ମମତାଙ୍କ ବିରୋଧରେ ଭାଜପା ପକ୍ଷରୁ ପ୍ରିୟଙ୍କା ଟିବରିଓ୍ବାଲଙ୍କୁ ପ୍ରାର୍ଥୀ କରାଯାଇଛି।
ଶାନ୍ତିପୂର୍ଣ୍ଣ ଏବଂ ନିରପେକ୍ଷ ନିର୍ବାଚନ ତଥା ସୁରକ୍ଷାକୁ ଦୃଷ୍ଟିରେ ରଖି ଭବାନୀପୁରରେ ନିର୍ବାଚନ କମିଶନଙ୍କ ପକ୍ଷରୁ ଅତିରିକ୍ତ ୨୦ କମ୍ପାନୀ କେନ୍ଦ୍ରୀୟ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି।
ତେବେ ଟିଏମ୍ସି ଏବଂ ଭାଜପା ମଧ୍ୟରେ କାଦୁଅ ଫିଙ୍ଗା ଏବେ ବି ଜାରି ରହିଛି। ଟିଏମ୍ସି ବୁଥ୍ କ୍ୟାପଚରିଂ କରିବାକୁ ଚାହୁଁଥିବା ଭାଜପା ପକ୍ଷରୁ ଅଭିଯୋଗ ଅଣାଯାଇଛି। ଓ୍ବାର୍ଡ ନମ୍ବର ୭୨ର ମତଦାନ କେନ୍ଦ୍ରରେ ପହଞ୍ଚି ପ୍ରିୟଙ୍କା କହିଛନ୍ତି ଯେ, ଟିଏମ୍ସି ବିଧାୟକ ମଦନ ମିତ୍ରା ଜାଣିଶୁଣି ବୁଥ୍ରେ ଭୋଟିଂ ମେଶିନ୍ ବନ୍ଦ କରିଦେଇଛନ୍ତି, ଯାହାଦ୍ୱାରା ସେ ବୁଥ୍ କ୍ୟାପଚରିଂ କରିପାରିବେ।
