ମୁମ୍ବାଇ,୧୫ ।୧୦: ବଲିଉଡ୍ ଅଭିନେତା ବିବେକ ଓବରୟଙ୍କ ଘରେ ବେଙ୍ଗାଲୁରୁ ପୋଲିସ ଦ୍ୱାରା ଚଢାଉ କରାଯାଇଛି । ବେଙ୍ଗାଲୁରୁ ପୋଲିସର ୨ ଜଣ ଇନସ୍ପେକ୍ଟର ଗୁରୁବାର ଦିନ ପ୍ରାୟ ୧ଟା ବେଳେ ବିବେକଙ୍କ ଘର ଉପରେ ଚଢାଉ କରିଛନ୍ତି । ବିବେକଙ୍କ ଶଳା ଆଦିତ୍ୟ ଅଲୱାଙ୍କ ମାମଲାରେ ଏହି ଚଢାଉ କରାଯାଇଛି । ସର୍ଚ୍ଚ ୱାରେଣ୍ଟ ନେଇ ପୋଲିସ ବିବେକଙ୍କ ଜୁହୁ ସ୍ଥିତ ଘରେ ପହଞ୍ଚିଥିଲେ । ପୋଲିସର ସୂଚନା ଅନୁଯାୟୀ, ବିବେକଙ୍କ ଶଳା ଆଦିତ୍ୟ ଏବେ ଫେରାର ଅଛନ୍ତି । ତେବେ ସେ ବିବେକଙ୍କ ଘରେ ଥିବା ଜଣାପଡିବା ପରେ ତାଙ୍କ ଘରେ ଚଢାଉ କରାଯାଇଛି । ଆଦିତ୍ୟଙ୍କ ବେଙ୍ଗାଲୁରୁ ସ୍ଥିତ ଘରେ ମଧ୍ୟ ଚଢାଉ କରାଯାଇଛି । ସୂଚନାଯୋଗ୍ୟ, ଆଦିତ୍ୟ କର୍ନାଟକର ପୂର୍ବତନ ମନ୍ତ୍ରୀ ଜିବରାଜ ଅଲୱାଙ୍କ ପୁଅ । ତାଙ୍କ ଉପରେ କନ୍ନଡ ଫିଲ୍ମ ଇଣ୍ଡଷ୍ଟ୍ରିର ଗାୟକ ଓ କଳାକାରଙ୍କୁ ଡ୍ରଗ୍ସ ସପ୍ଲାଇ କରୁଥିବା ଅଭିଯୋଗ ରହିଛି । କନ୍ନଡ ଫିଲ୍ମ ଇଣ୍ଡଷ୍ଟ୍ରି ସ୍ୟାଣ୍ଡଲଉଡ ନାମରେ ମଧ୍ୟ ପରିଚିତ । ବଲିଉଡ୍ ଭଳି ଏଠାରେ ବି ଡ୍ରଗ୍ସ ମାମଲାକୁ ନେଇ କଥା ପଦାକୁ ଆସିଛି । ଏଥିରେ କେତେଜଣ ପେଡଲର୍ସ ବି ଗିରଫ ହୋଇଛନ୍ତି ।
