ମୁମ୍ବାଇ,୧୮।୩: ବଲିଉଡ୍ ଫିଲ୍ମ ‘ଦ କଶ୍ମୀର ଫାଇଲ’ ବର୍ତ୍ତମାନ ଚର୍ଚ୍ଚାରେ ରହିଛି। ବକ୍ସ ଅଫିସ୍ରେ ଧମାଲ୍ କରିଥିବା ଏହି ଫିଲ୍ମ ୬ଦିନରେ ପ୍ରାୟ ୮୦କୋଟି ଟଙ୍କା ଆୟ କରିସାରିଲାଣି। ଏହି ଫିଲ୍ମକୁ ଅନେକ ରାଜ୍ୟରେ ଟିକସମୁକ୍ତ କରାଯାଇଛି। କେବଳ ଏତିକି ନୁହେଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ଚଳଚ୍ଚିତ୍ରର ପ୍ରଶଂସା କରିଛନ୍ତି। ଇତିମଧ୍ୟରେ ଏହି ଫିଲ୍ମର ନିର୍ଦ୍ଦେଶକ ବିବେକ ଅଗ୍ନିହୋତ୍ରୀଙ୍କୁ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଓ୍ବାଇ ବର୍ଗର ସୁରକ୍ଷା ପ୍ରଦାନ କରାଯାଇଛି। ଇଣ୍ଟେଲିଜେନ୍ସ ବ୍ୟୁରୋର ଥ୍ରେଟ୍ ପରସେପଶନ୍ ରିପୋର୍ଟକୁ ଆଧାର କରି ସ୍ବରାଷ୍ଟ୍ର ମନ୍ତ୍ରଣାଳୟ ବିବେକଙ୍କୁ ଏହି ସୁରକ୍ଷା ପ୍ରଦାନ କରିଛି। ଅର୍ଥାତ୍ ବିବେକ ଅଗ୍ନିହୋତ୍ରୀ ଭାରତର ଯେଉଁ ସ୍ଥାନକୁ ଯିବେ ସେଠାକୁ ସିଆରପିଏଫ୍ ଯବାନ ମଧ୍ୟ ତାଙ୍କ ସାଙ୍ଗରେ ରହିବେ। ସୂଚନାଯୋଗ୍ୟ, ଓ୍ବାଇ ବର୍ଗର ସୁରକ୍ଷାରେ ମୋଟ ୮ଜଣ ସୁରକ୍ଷାକର୍ମୀ ନିୟୋଜିତ ହୋଇଥାନ୍ତି। ଏଥିରେ ଯେଉଁ ଭିଆଇପିଙ୍କୁ ସୁରକ୍ଷା ଦିଆଯାଇଥାଏ, ତାଙ୍କ ଘରେ ୫ଟି ଆମର୍ଡ ଷ୍ଟାଟିକ ଗାର୍ଡ ଲଗାଯାଇଥାଏ। ଏଥିସହ ତିନୋଟି ସିଫ୍ଟରେ ୩ପିଏସ୍ଓ ସୁରକ୍ଷା ପ୍ରଦାନ କରାଯାଇଥାଏ। ସୂଚନା ମୁତାବକ, ବିବେକ ଅଗ୍ନିହୋତ୍ରୀଙ୍କ ନିର୍ଦ୍ଦେଶରେ ନିର୍ମାଣ ହୋଇଥିବା ଏହି ଫିଲ୍ମରେ କଶ୍ମୀରୀ ପଣ୍ଡିତମାନଙ୍କ ଉପରେ ହୋଇଥିବା ଅତ୍ୟାଚାର ଏବଂ ଉପତ୍ୟକାରୁ ପଳାୟନ କରିଥିବା କାହାଣୀ ଉପରେ ଆଧାରିତ। ଏଥିରେ କଶ୍ମୀରୀ ପଣ୍ଡିତଙ୍କ କାହାଣୀକୁ ଦେଖିବା ପରେ ଦର୍ଶକମାନେ ଭାବପ୍ରବଣ ହୋଇପଡିଛନ୍ତି। ଅନ୍ୟପଟେ ଏହି ଫିଲ୍ମକୁ ନେଇ ରାଜନୀତି ସରଗରମ ମଧ୍ୟ ହୋଇଛି। ଅନେକ ନେତା ଏବଂ ରାଜନେତାମାନେ ଏହାକୁ ନେଇ ପ୍ରତିକ୍ରିୟାଶୀଳ ହୋଇପଡ଼ିଥିବା ବେଳେ ଆଉ କେତେକ ଏହାକୁ ବିରୋଧ କରୁଛନ୍ତି।
