ଭାରତୀୟ ରେଳ ଇତିହାସ ଯେତିକି ଚର୍ଚ୍ଚିତ, ସେତିକି ଘଟଣାବହୁଳ ଏହାର କ୍ରମବିକାଶ। ବ୍ରିଟିଶ ଅମଳର ଷ୍ଟିମ୍ ଇଞ୍ଜିନ୍ରୁ ପ୍ରସ୍ତାବିତ ବୁଲେଟ୍ ଟ୍ରେନ୍ ଯାଏ ଏହି ଦୀର୍ଘ ଯାତ୍ରା ଭିତରେ ବଦଳିଯାଇଛି ଦେଶର ଅର୍ଥନୀତିର ରୂପରେଖ। ଏତେ ସବୁ ସତ୍ତ୍ୱେ ସେବା, ସମୟାନୁବର୍ତ୍ତିତାକୁ ନେଇ ଭାରତୀୟ ରେଳସେବା ସମାଲୋଚନାର ଶିକାର ହେଉଛି। ହେଲେ ଆଗାମୀ କିଛିବର୍ଷ ଭିତରେ ଭାରତୀୟ ରେଳର ଚିତ୍ର ବଦଳିଯିବ। ପୁରୁଣାକାଳିଆ କୋଚ୍ର ସ୍ଥାନ ନେବ ୟୁରୋପୀୟାନ୍ ଷ୍ଟାଇଲ୍ର ଭିଷ୍ଟାଡୋମ୍ କୋଚ୍ । ଅତ୍ୟାଧୁନିକ ସୁବିଧାଯୁକ୍ତ ଏହି ମଡର୍ନ କୋଚ୍ ଯାତ୍ରୀ ତଥା ପର୍ଯ୍ୟଟକଙ୍କ ଟ୍ରେନ୍ଯାତ୍ରାକୁ ସ୍ମୃତିମଧୁର କରିବ।
ନୂଆଦିଲ୍ଲୀ: ଭାରତୀୟ ରେଳ ଇତିହାସରେ ଯୋଡ଼ି ହୋଇଛି ଆଉ ଏକ ନୂଆ ଫର୍ଦ୍ଦ। ନିକଟରେ ରେଳ ବିଭାଗ ପକ୍ଷରୁ ନିର୍ମାଣ କରାଯାଇଛି ଅତ୍ୟାଧୁନିକ ଭିଷ୍ଟାଡୋମ୍ କୋଚ୍। ଏହି କୋଚ୍ରେ ଯାତ୍ରା କେବଳ ଆରାମଦାୟକ ହେବନାହିଁ, ବରଂ ସ୍ମୃତିମଧୁର ମଧ୍ୟ ହେବ। ଏହି ଉନ୍ନତମାନର ରେଳଡବାର ଛାତ କାଚରେ ନିର୍ମିତ। ଏଥିରେ ଚଉଡ଼ା ଝରକା ଲଗାଯାଇଛି। ବସିବା ଲାଗି ରହିଥିବା ଚେୟାର ୩୬୦ ଡିଗ୍ରୀ ଘୂରିପାରିବା ଭଳି ବ୍ୟବସ୍ଥା କରାଯାଇଛି। ସ୍ନାନ, ଶୌଚ କରିବା ଲାଗି ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗ କରି ନିର୍ମିତ ହୋଇଛି ବାୟୋ ଟଏଲଟ। ପୂର୍ବତନ ରେଳମନ୍ତ୍ରୀ ପୀୟୂଷ ଗୋୟଲ ନିକଟରେ ଏକ ଟୁଇଟ୍ କରି ଏହି କୋଚ୍୍ ବିଷୟରେ ସୂଚନା ଦେଇଛନ୍ତି। ବିଶେଷ କରି ପର୍ଯ୍ୟଟକଙ୍କୁ ରେଳଯାତ୍ରା ପ୍ରତି ଆକର୍ଷିତ କରିବା ଲାଗି ଭିଷ୍ଟାଡୋମ୍ କୋଚ୍ର ପରିକଳ୍ପନା କରାଯାଇଥିବା ଜଣାପଡ଼ିଛି।
କୋଚ୍ରେ ଏକାସଙ୍ଗରେ ୪୪ ଯାତ୍ରୀ ବସିପାରିବେ। ଆରାମଦାୟକ ଚେୟାରଗୁଡ଼ିକ ୩୬୦ ଡିଗ୍ରୀ ଘୂରିପାରିବ। ଫଳରେ ଯାତ୍ରୀ କେବଳ ସମ୍ମୁଖ ଭାଗକୁ ମୁହଁ କରି ବସିବାକୁ ବାଧ୍ୟ ହେବେନାହିଁ। କୋଚ୍ରେ ପାସେଞ୍ଜରଙ୍କ ସମ୍ପର୍କରେ ସବିଶେଷ ସୂଚନା ରହିବ। ଓ୍ବାଇଫାଇ ସୁବିଧା ଉପଲବ୍ଧ ହେବ। ଟ୍ରେନ୍ର ଡୋର୍ଗୁଡ଼ିକ ସେନ୍ସର ସହାୟତାରେ ସ୍ବୟଂକ୍ରିୟ ଭାବେ କାର୍ଯ୍ୟକରିବ। ଦିବ୍ୟାଙ୍ଗ ଲୋକଙ୍କ ସୁବିଧାରେ ପ୍ରବେଶ, ପ୍ରସ୍ଥାନ ଲାଗି ଗେଟ୍ଗୁଡ଼ିକୁ ଅଧିକ ଚଉଡ଼ା କରାଯାଇଛି। ଏହା ମାଧ୍ୟମରେ ସେମାନେ ହୁଇଲ୍ ଚେୟାରରେ ମଧ୍ୟ ଯାତାୟାତ କରିପାରିବେ। ମନୋରଞ୍ଜନ ଲାଗି ଡିଜିଟାଲ ଡିସ୍ପ୍ଲେ ଟେକ୍ନିକ୍ର ଉପଯୋଗ କରାଯାଇଛି। ଏଥିରେ ମ୍ୟୁଜିକ୍ର ମଜା ନେବା ଲାଗି ସ୍ପିକର ଲାଗିଛି। ଏହାକୁ ବାଦ୍ ଦେଲେ ସମଗ୍ର କୋଚ୍ ସିସିଟିଭି ନଜରରେ ରହିବ। ଯାତ୍ରୀମାନେ ବୋର୍ ନ ହେବା ଲାଗି ଲାଉଞ୍ଜ ଏରିଆ ରଖାଯାଇଛି। ଯାତ୍ରୀଙ୍କ ଖାଇବା ପିଇବା ଲାଗି ସ୍ବତନ୍ତ୍ର ରିଫ୍ରେଶମେଣ୍ଟ ଏରିଆ ରହିଛି। ଏଠାରେ ଯାତ୍ରୀମାନେ ଗରମ ଖାଦ୍ୟ ଖାଇବାର ମଜା ନେଇପାରିବେ। ଏଥିଲାଗି ମାଇକ୍ରେଓ୍ବେଭ୍ ଏବଂ ହଟ୍କେସ୍ ସୁବିଧା କରାଯାଇଛି। ଏଥିସହ କଫିମେକର, ଫ୍ରିଜ୍ ମଧ୍ୟ ଉପଲବ୍ଧ। ଭାରତୀୟ ଟ୍ରେନ୍ରେ ଉପଲବ୍ଧ ଶୌଚାଳୟକୁ ନେଇ ଅଧିକାଂଶ ସମୟରେ ଯାତ୍ରୀମାନେ ଅସନ୍ତୋଷ ବ୍ୟକ୍ତ କରିଥାଆନ୍ତି। ହେଲେ ଭିଷ୍ଟାଡୋମ୍ କୋଚ୍ରେ ଏଥିପ୍ରତି ସ୍ବତନ୍ତ୍ର ଧ୍ୟାନ ରଖାଯାଇଛି। ଏହି ମଡର୍ନ ମଡ୍ୟୁଲର କୋଚ୍ର ଟଏଲଟ୍ ଇକୋ ଫ୍ରେଣ୍ଡଲି ହେବ। ମଳ ଯେପରି ଟ୍ରାକ୍ରେ ନ ପଡ଼େ, ସେଥିଲାଗି କୋଚ୍ର ତଳଭାଗରେ ଏକ ବାୟୋ ଟ୍ୟାଙ୍କ୍ ଲଗାଯାଇଛି।
