ଢେଙ୍କାନାଳ ଅଫିସ, ୨୫।୨ ଦୀର୍ଘ ଦୁଇବର୍ଷ ପରେ କପିଳାସ କ୍ଷେତ୍ରାଧିପତି ଶ୍ରୀ ଚନ୍ଦ୍ରଶେଖର ମହାଦେବଙ୍କ ପ୍ରସିଦ୍ଧ ଜାଗରଯାତ୍ରା ଦେଖିବାର ସୌଭାଗ୍ୟ ଲାଭ କରିବେ ଢେଙ୍କାନାଳ ଜିଲାବାସୀ। କରୋନା ନିୟନ୍ତ୍ରଣରେ ଥିବାରୁ ଏଥିଲାଗି ପ୍ରଶାସନ ପକ୍ଷରୁ ଅନୁମତି ମିଳିଛି। ହେଲେ ସଂକ୍ରମଣ ଏଡ଼ାଇବାକୁ ଜିଲା ବାହାରର ଶ୍ରଦ୍ଧାଳୁଙ୍କୁ ଯାତ୍ରାରେ ସାମିଲ ହେବାକୁ ବାରଣ କରାଯାଇଛି।
କପିଳାସ ପୀଠରେ ଆସନ୍ତା ମାର୍ଚ୍ଚ ୧ରେ ପ୍ରସିଦ୍ଧ ମହାଶିବରାତ୍ରି ଉପଲକ୍ଷେ ଜାଗରଯାତ୍ରା ଅନୁଷ୍ଠିତ ହେବ। ଚଳିତବର୍ଷ ଜିଲାବାସୀଙ୍କୁ ଅନୁମତି ଦିଆଯାଇଥିବାରୁ ଗହଳି ବଢ଼ିବା ସମ୍ଭାବନା ରହିଛି। ଯାତ୍ରାକୁ ବିନା ବିଭ୍ରାଟରେ ପରିଚାଳନା କରିବା ଲାଗି ଗୁରୁବାର କପିଳାସ ପ୍ରାଣୀଉଦ୍ୟାନ ପରିସରରେ ଥିବା ବନ ବିଭାଗ ଡାକବଙ୍ଗଳାରେ ଜିଲାପାଳ ସରୋଜ କୁମାର ସେଠୀଙ୍କ ଅଧ୍ୟକ୍ଷତାରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ନିର୍ଦ୍ଧାରିତ ସମୟ ନିର୍ଘଣ୍ଟ ଅନୁଯାୟୀ ରାତି ୩ଟା ୫୫ରେ ବେଢ଼ାପୂଜା, ବେଢା ପରିକ୍ରମା ଏବଂ ପ୍ରାତଃ ୪ଟା ୨୦ ମଧ୍ୟରେ ମନ୍ଦିର ଚୂଡ଼ାକୁ ମହାଦୀପ ଉଠିବ। ସମସ୍ତ କାର୍ଯ୍ୟ କୋଭିଡ୍ ମାର୍ଗଦର୍ଶିକା ଅନୁଯାୟୀ କରାଯିବ। ଜିଲାର ଶ୍ରଦ୍ଧାଳୁଙ୍କୁ ପୀଠରେ ସମାଗମ ଲାଗି ସବୁଜ ସଙ୍କେତ ମିଳିଥିଲେ ମଧ୍ୟ ଆଧାରକାର୍ଡ ଆଣିବା ବାଧ୍ୟତାମୂଳକ କରାଯାଇଛି। ସରକାରୀ କାର୍ଯ୍ୟ ଏବଂ ଯାତ୍ରାରେ ନିୟୋଜିତ ଯାନବାହନ ବ୍ୟତୀତ ବିନା ଅନୁମତିରେ କୌଣସି ଗାଡ଼ିମୋଟର ପୀଠ ପରିସରକୁ ଯାଇପାରିବ ନାହିଁ। ଶ୍ରଦ୍ଧାଳୁଙ୍କ ଯାତାୟାତ ସୁବିଧା ଲାଗି ଉଭୟ ବାରବାଙ୍କ ଏବଂ ପାହାଚ ରାସ୍ତାରେ ଉଜ୍ଜ୍ୱଳ ଆଲୋକ ବ୍ୟବସ୍ଥା କରାଯିବ। ପୀଠରେ ପରିମଳ ପରିଚାଳନା ସାଙ୍ଗକୁ ସଫାସୁତରା ରଖିବାକୁ ପ୍ଲାଷ୍ଟିକ ଓ ପଲିଥିନ ବ୍ୟବହାର ସମ୍ପୂର୍ଣ୍ଣ ନିଷେଧ କରାଯାଇଛି। ଗହଳି ସମୟରେ ମନ୍ଦିରକୁ ନିୟମିତ ବିଶୋଧନ କରାଯିବ। ଆଶୁ ଚିକିତ୍ସା ଲାଗି ପୀଠ ପାଦଦେଶ ଏବଂ ମନ୍ଦିର ପରିସରରେ ଅସ୍ଥାୟୀ ଚିକିତ୍ସା କେନ୍ଦ୍ର ଖୋଲିବ। ୩ଟି ଟ୍ୟାଙ୍କରରେ ନିରବଚ୍ଛିନ୍ନ ପାନୀୟ ଜଳ ଯୋଗାଣ ହେବ। କଲେଜ ଛାତ୍ରୀଛାତ୍ରମାନେ ଶ୍ରଦ୍ଧାଳୁଙ୍କୁ ସହାୟତା ଯୋଗାଇଦେବାକୁ ସ୍ବେଚ୍ଛାସେବୀ ଭାବେ ନିୟୋଜିତ ହେବେ। ଜାଗର ଯାତ୍ରା ସମୟରେ ଯାନବାହନ ନିୟନ୍ତ୍ରଣ, ପାର୍କିଂ ବ୍ୟବସ୍ଥା, ଶାନ୍ତିଶୃଙ୍ଖଳା ରକ୍ଷା ଲାଗି ଆବଶ୍ୟକ ପୋଲିସ ମୁତୟନ କରାଯିବ ବୋଲି ଏସ୍ପି ଏଲ୍. ଦିବ୍ୟା ଭି. ସୂଚନା ଦେଇଛନ୍ତି।
ବୈଠକରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି, ପିଡି ଡିଆରଡିଏ ସାଫଲ୍ୟ ମଣ୍ଡିତ ପ୍ରଧାନ, ଜିଲା ଦେବୋତ୍ତର ଅଧିକାରୀ ତଥା ଢେଙ୍କାନାଳ ଉପଜିଲାପାଳ ସ୍ନିଗ୍ଧାରାଣୀ ଧଳ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ, ସଦର ଏସ୍ଡିପିଓ ବିକାଶ ବେଉରା, ଗଁଦିଆ ବିଡିଓ ଆଶିଷ ରଞ୍ଜନ ସାହୁ, ମନ୍ଦିର ସେବାୟତ ନିରଞ୍ଜନ ମହାପାତ୍ର ପ୍ରମୁଖ ଉପସ୍ଥିତ ଥିଲେ।