ଜୟପୁର, ୧୮ା୧୧: ସ୍ଥାନୀୟ ନହରଗଡ଼ ଦୁର୍ଗସ୍ଥିତ ଓ୍ବାକ୍ସ ମ୍ୟୁଜିୟମରେ କ୍ରିକେଟ ଷ୍ଟାର ବିରାଟ କୋହଲିଙ୍କ ଏକ ମହମ ପ୍ରତିମୂର୍ତ୍ତି ସ୍ଥାପନ କରାଯିବ। ଚଳିତ ଦିନିକିଆ କ୍ରିକେଟ ବିଶ୍ୱକପ୍ ସେମିଫାଇନାଲରେ ଭାରତର ବିଜୟ ପରେ ଏହି ନିଷ୍ପତ୍ତି ନିଆଯାଇଛି। ଏହି ମ୍ୟାଚରେ କୋହଲି ଦିନିକିଆ କ୍ରିକେଟରେ ତାଙ୍କର ୫୦ତମ ଶତକ ହାସଲ କରିଥିଲେ।
ଜୟପୁର ଓ୍ବାକ୍ସ ମ୍ୟୁଜିୟମର ପ୍ରତିଷ୍ଠାତା- ନିର୍ଦ୍ଦେଶକ ଅନୁପ ଶ୍ରୀବାସ୍ତବ କହିଛନ୍ତି, ବିରାଟ କୋହଲିଙ୍କ ପ୍ରତିମୂର୍ତ୍ତି ସ୍ଥାପନ ପାଇଁ ପର୍ଯ୍ୟଟକମାନଙ୍କ ବହୁଦିନର ଦାବି ରହିଥିଲା। କୋହଲି ବର୍ତ୍ତମାନ ବିଶ୍ୱ କ୍ରିକେଟର ଉଚ୍ଚତମ ସ୍ତରରେ ପହଞ୍ଚତ୍ୟାଇଛନ୍ତି। ପୁନଶ୍ଚ ଭାରତ ବିଶ୍ୱ ଚାମ୍ପିୟନଶିପ୍ ଟ୍ରଫିର ନିକଟତର ହୋଇଛି। ତାଙ୍କ ପ୍ରତିମୂର୍ତ୍ତି ସ୍ଥାପନ ପାଇଁ ଏହା ହେଉଛି ଶ୍ରେଷ୍ଠ ମୁହୂର୍ତ୍ତ।
ଶ୍ରୀବାସ୍ତବ କହିଛନ୍ତି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ପ୍ରତିମୂର୍ତ୍ତି ନିକଟରେ କୋହଲିଙ୍କ ପ୍ରତିମୂର୍ତ୍ତି ସ୍ଥାପନ କରାଯିବ, ଯାହାଙ୍କୁ ସେ ତାଙ୍କର ଆଦର୍ଶ ବୋଲି ମନେକରିଥାନ୍ତି। ଅନୁପ ଶ୍ରୀବାସ୍ତବଙ୍କ ଅନନ୍ୟ ନିର୍ଦ୍ଦେଶନାରେ ଦୁଇ ସ୍ଥପତି ଗଣେଶ ଓ ଲକ୍ଷ୍ମୀନାରାୟଣ ପ୍ରତିମୂର୍ତ୍ତି ନିର୍ମାଣ କରୁଛନ୍ତି। ମୂର୍ତ୍ତିଟିର ପୋଷାକ ବଲିଉଡ ଡିଜାଇନର ବୋଧ ସିଂ ପ୍ରସ୍ତୁତ କରୁଛନ୍ତି। ଜୟପୁର ଓ୍ବାକ୍ସ ମ୍ୟୁଜିୟମରେ କ୍ରିକେଟର ‘କ୍ୟାପଟେନ କୁଲ୍ ’ ଭାବେ ପରିଚିତ ମହେନ୍ଦ୍ର ସିଂ ଧୋନୀଙ୍କର ଏକ ମହମ ପ୍ରତିମୂର୍ତ୍ତି ସ୍ଥାପିତ ହୋଇଛି। ଶ୍ରୀବାସ୍ତବ କହିଛନ୍ତି, ଆମେ ମହାନ୍ ବ୍ୟକ୍ତିତ୍ୱଙ୍କ ପ୍ରତିମୂର୍ତ୍ତି ସ୍ଥାପନ କରିବାର ମୂଳ ଉଦ୍ଦେଶ୍ୟ ହେଲା ଏହା ଆଗାମୀ ପିଢ଼ିକୁ ପ୍ରେରଣା ଦେବ। ମ୍ୟୁଜିୟମରେ ମୋଟ ୪୩ଟି ପ୍ରତିମୂର୍ତ୍ତି ଇତିମଧ୍ୟରେ ସ୍ଥାପିତ ହୋଇସାରିଛି। ନିକଟରେ ସ୍ବାମୀ ବିବେକାନନ୍ଦଙ୍କ ଏକ ମହମ ପ୍ରତିମୂର୍ତ୍ତି ସ୍ଥାପିତ ହୋଇଛି।
