ମୁମ୍ବାଇ,୭।୪: ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ସୋମବାର IPL 2025ରେ ଏକ ମ୍ୟାଚ୍ରେ ବିରାଟ କୋହଲି ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଏକ ନୂତନ ମାଇଲଖୁଣ୍ଟ ହାସଲ କରିଛନ୍ତି। ସେ ଏବେ ଟି-୨୦ କ୍ରିକେଟର ଶ୍ରେଷ୍ଠ ୫ ବ୍ୟାଟସମ୍ୟାନଙ୍କ ତାଲିକାରେ ସାମିଲ ହୋଇଛନ୍ତି। ବିରାଟ କୋହଲି ଯେଉଁ ସଫଳତା ହାସଲ କରିଛନ୍ତି, ଭାରତର ଅନ୍ୟ କୌଣସି ବ୍ୟାଟସମ୍ୟାନ ଏପର୍ଯ୍ୟନ୍ତ ତାହା ହାସଲ କରିପାରି ନାହାଁନ୍ତି।
ଏପର୍ଯ୍ୟନ୍ତ କେବଳ ୫ ଜଣ ବ୍ୟାଟସମ୍ୟାନ ଟି-୨୦ କ୍ରିକେଟରେ ୧୩ ହଜାରରୁ ଅଧିକ ରନ କରିପାରିଛନ୍ତି। ଟି-୨୦ କ୍ରିକେଟ ଅର୍ଥ ହେଉଛି ଟି-୨୦ ଅନ୍ତର୍ଜାତୀୟ ଏବଂ ଆଇପିଏଲରେ ମିଳିତ ଭାବରେ ହୋଇଥିବା ରନ। ଭାରତୀୟ ଖେଳାଳିମାନେ କେବଳ IPLରେ ଖେଳନ୍ତି, କିନ୍ତୁ ଅନ୍ୟ ବ୍ୟାଟସମ୍ୟାନମାନେ ମଧ୍ୟ ବିଶ୍ୱର ଅନ୍ୟାନ୍ୟ ଲିଗରେ ଅଂଶଗ୍ରହଣ କରନ୍ତି। ସେହି ରନ ଗୁଡ଼ିକୁ ମଧ୍ୟ ଏଥିରେ ଯୋଡା ଯାଇଛି। କୋହଲି ଏବେ ଟି-୨୦ କ୍ରିକେଟରେ ୧୩ ହଜାର ରନ ଛୁଇଁ ସାରିଛନ୍ତି। ସେ ଏପରି ସଫଳତା ହାସଲ କରିବାରେ ପ୍ରଥମ ଭାରତୀୟ ବ୍ୟାଟସମ୍ୟାନ ହୋଇଛନ୍ତି।
ଟି-୨୦ କ୍ରିକେଟରେ ସର୍ବାଧିକ ରନ କରିଥିବା ବ୍ୟାଟସମ୍ୟାନ ହେଉଛନ୍ତି କ୍ରିସ ଗେଲ। ସେ ୪୬୩ଟି ମ୍ୟାଚ ଖେଳି ୧୪୫୬୨ ରନ କରିଛନ୍ତି। ଏହା ପରେ ଆଲେକ୍ସ ହେଲ୍ସ ଦ୍ୱିତୀୟ ସ୍ଥାନରେ ଅଛନ୍ତି। ସେ ୪୯୪ଟି ମ୍ୟାଚ ଖେଳି ୧୩୬୧୦ ରନ କରିଛନ୍ତି। ପାକିସ୍ତାନର ସୋଏବ ମଲିକ ୫୫୫ ଟି-୨୦ ମ୍ୟାଚ ଖେଳି ୧୩୫୫୭ ରନ କରିପାରିଛନ୍ତି। ଏହା ପରେ କିରନ ପୋଲାର୍ଡ ଅଛନ୍ତି, ଯିଏ ଏପର୍ଯ୍ୟନ୍ତ ୬୯୫ ଟି-୨୦ ମ୍ୟାଚ ଖେଳି ୧୩୫୩୭ ରନ କରିଛନ୍ତି।
ବିରାଟ କୋହଲିଙ୍କ ବିଷୟରେ କହିବାକୁ ଗଲେ, ସେ ଏପର୍ଯ୍ୟନ୍ତ ୪୦୩ଟି ମ୍ୟାଚ ଖେଳି ୧୩୦୦୦ ରନ ପୂରଣ କରିଛନ୍ତି। ଏହି ମ୍ୟାଚ ପୂର୍ବରୁ ତାଙ୍କ ନାମରେ ୧୨୯୮୩ ରନ ଥିଲା। ଏହି ମାଇଲଖୁଣ୍ଟରେ ପହଞ୍ଚିବା ପାଇଁ ତାଙ୍କୁ ଆଉ ମାତ୍ର ୧୭ ରନ ଆବଶ୍ୟକ ଥିଲା, ଯାହାକୁ ସେ ବହୁତ ଶୀଘ୍ର ପୂରଣ କରିଥିଲେ। କୌଣସି ଭାରତୀୟ ବ୍ୟାଟସମ୍ୟାନ ଏହି ମାଇଲଖୁଣ୍ଟ ଛୁଇଁ ନ ଥିଲେ। ବିରାଟ କୋହଲିଙ୍କ ପଛରେ ଡେଭିଡ ୱାର୍ନର ଅଛନ୍ତି, ଯିଏ ଏପର୍ଯ୍ୟନ୍ତ ୩୯୯ ଟି-୨୦ ମ୍ୟାଚ ଖେଳି ୧୨୯୧୩ ରନ କରିଛନ୍ତି। ୱାର୍ନର ଏବେ ଅନ୍ତର୍ଜାତୀୟ ମ୍ୟାଚ ଖେଳୁ ନାହାନ୍ତି, କିନ୍ତୁ ତାଙ୍କୁ ବିଭିନ୍ନ କ୍ରିକେଟ୍ ଲିଗ୍ରେ ଖେଳୁଥିବା ଦେଖାଯାଏ। ତାଙ୍କ ପାଖରେ ୧୩ ହଜାର ରନ କରିବାର ସୁଯୋଗ ମଧ୍ୟ ଅଛି।
