ନୂଆଦିଲ୍ଲୀ,୧୮।୨: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ଦ୍ୱିତୀୟ ଟେଷ୍ଟ ମ୍ୟାଚ୍ରେ ଏକ ବଡ଼ ବିବାଦ ଦେଖାଦେଇଛି। ପୂର୍ବତନ ଅଧିନାୟକ ତଥା ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କୁ ଯେଉଁଭଳି ଭାବେ ଆଉଟ୍ ଦିଆଯାଇଛି, ତାହା ଉପରେ ପ୍ରଶ୍ନ ଉଠିଛି। କେବଳ ପ୍ରଶଂସକ ନୁହନ୍ତି କୋହଲି ଏବଂ ଟିମ୍ ଇଣ୍ଡିଆ ପରିଚାଳନା ବିଭାଗ ଏହି ଉଇକେଟକୁ ନେଇ ନିରାଶ ନଜର ଆସିଛନ୍ତି।
ଭାରତ ଇନିଂସର ୫୦ତମ ଓଭରରେ ମାଥ୍ୟୁ କୁନ୍ହେମାନ କୋହଲିଙ୍କୁ ବୋଲିଂ କରିଥିଲେ, ତାହା ପ୍ୟାଡ୍ରେ ବାଜିଥିଲା। ଅମ୍ପାୟାର ଏହାକୁ ଆଉଟ୍ ଦେଇଥିଲେ। ପରେ ବିରାଟ ଏହାର ରିଭ୍ୟୁ ନେଇଥିଲେ। ସେଥିରେ ମଧ୍ୟ କୌଣସି ସ୍ପଷ୍ଟ ଚିତ୍ର ମିଳି ନ ଥିଲା। ଏଣୁ ଅମ୍ପାୟାରଙ୍କ କଲ୍ ଯୋଗୁ ତାଙ୍କୁ ଆଉଟ୍ ଦିଆଯାଇଥିଲା।
ଥର୍ଡ ଅମ୍ପାୟାର ଆଉଟ୍ ଦେବା ପରେ କୋହଲି ରାଗିଯାଇ ନିଷ୍ପତ୍ତିରେ ନିରାଶ ହୋଇ ପ୍ୟାଭିଲିୟନ ଫେରିଥିଲେ। ଡ୍ରେସିଂ ରୁମ୍ରେ ବସିଥିବା ଟିମ୍ ଇଣ୍ଡିଆର ପରିଚାଳନା ନିଷ୍ପତ୍ତିରେ ଖୁସି ନ ଥିଲା। କୋଚ୍ ରାହୁଲ ଦ୍ରାବିଡ ଏବଂ ବ୍ୟାଟିଂ ପ୍ରଶିକ୍ଷକ ବିକ୍ରମ ରାଠୋର ମଧ୍ୟ ଖୁସି ନ ଥିଲେ। କାରଣ ଦଳର ଖରାପ ଇନିଂସ ବେଳେ ମଙ୍ଗ ସମ୍ଭାଳିଥିଲେ କୋହଲି।
କୋହଲିଙ୍କ ଏହି ଉଇକେଟ ନେଇ ଅନେକ ହଙ୍ଗାମା ହୋଇଛି। ଅନେକ ଭେଟେରାନ ଏଥିନେଇ ଅମ୍ପାୟାରଙ୍କୁ ପ୍ରଶ୍ନ କରିଛନ୍ତି। ଓ୍ବାସିମ ଜାଫର ଟୁଇଟ କରି ଏହା ତାଙ୍କ ପାଇଁ ନଟ୍ ଆଉଟ୍ ବୋଲି କହିଛନ୍ତି।
