ବିଶ୍ୱର ନମ୍ବର ୱାନ ବ୍ୟାଟ୍ସମ୍ୟାନ ବିରାଟ କୋହଲି ଆଜି ୩୨ତମ ଜନ୍ମଦିନ ପାଳନ କରୁଛନ୍ତି। ନଭେମ୍ବର ୫, ୧୯୮୮ରେ ନୂଆଦିଲ୍ଲୀରେ ଜନ୍ମଗ୍ରହଣ କରିଥିବା କୋହଲି ଆଜି ବିଶ୍ୱର ବିସ୍ଫୋରକ ବ୍ୟାଟ୍ସମ୍ୟାନଙ୍କ ମଧ୍ୟରେ ପରିଗଣିତ ହୋଇଛନ୍ତି। କଠିନ ପରିଶ୍ରମ ଏବଂ ପିତାଙ୍କ ସଂଘର୍ଷ ଯୋଗୁ ସେ ଆସି ଏହି ଶିଖରରେ ପହଞ୍ଚିଛନ୍ତି। କୋହଲିଙ୍କ ପିତା ପ୍ରେମ କୋହଲି ପୁଅର ସ୍ବପ୍ନକୁ ପୂରଣ କରିବା ପାଇଁ ସବୁକିଛି କରିବାକୁ ପ୍ରସ୍ତୁତ ଥିଲେ। ଚଳିତ ବର୍ଷ ମେ ମାସରେ ବିରାଟ କୋହଲି ନିଜ କ୍ୟାରିୟର୍ ବିଷୟରେ ଏକ ଖୁଲାସା କରିଥିଲେ। ସୁନୀଲ ଛେତ୍ରୀଙ୍କ ସହ ଏକ ଇନଷ୍ଟାଗ୍ରାମ ଲାଇଭରେ କୋହଲି କହିଥିଲେ ଯେ, ଏକଦା ରାଜ୍ୟ କ୍ରିକେଟ ଦଳରେ ଚୟନ ପାଇଁ ପିତାଙ୍କୁ ଟଙ୍କା ଲାଞ୍ଚ ମଗାଯାଇଥିଲା। ସେ ଭଲ ଖେଳୁଥିବାରୁ ଥରେ ରାଜ୍ୟ କ୍ରିକେଟର ଜଣେ ସଦସ୍ୟ ଆସି ତାଙ୍କ ପିତାଙ୍କୁ କହିଥିଲେ ଯେ ଚୟନରେ କୌଣସି ଅସୁବିଧା ନାହିଁ, କିନ୍ତୁ ଏଥିପାଇଁ ତାଙ୍କୁ ଅତିରିକ୍ତ କିଛି କରିବାକୁ ପଡିବ। ଅର୍ଥାତ୍ ସେମାନେ ଟଙ୍କା ମାଗୁଥିଲେ। ସେ ଯାହା ମାଗୁଥିଲେ ତାହା ବୁଝାପଡିଲା। କିନ୍ତୁ ତାଙ୍କ ପିତା କଠିନ ପରିଶ୍ରମରେ ଜଣେ ଓକିଲ ହୋଇଥିଲେ। ତେଣୁ କଠିନ ପରିଶ୍ରମ କରୁଥିବା ଲୋକେ ଲାଞ୍ଚ ଦେବାକୁ ବିଶ୍ୱାସ କରନ୍ତି ନାହିଁ। କୋହଲି କହିଥିଲେ ଯେ ତାଙ୍କ ପିତା କୋଚଙ୍କୁ ଏହା ସ୍ପଷ୍ଟ କରିଦେଇଥିଲେ ଯେ ତାଙ୍କ ପୁଅ ଯାହା କରିବ ନିଜ ପରିଶ୍ରମରେ କରିବ। ଅନ୍ୟ କୌଣସି ଲାଞ୍ଚ ନେଇ ସେ ଖେଳିବ ନାହିଁ। ସେତେବେଳେ ମୁଁ ଭୟରେ ବହୁତ କାନ୍ଦୁଥିଲି। କିନ୍ତୁ ପିତା ବୁଝାଇ କହିଥିଲେ ସେ ଏମିତି କିଛି କର ଯାହା ଅନ୍ୟ କେହି କରୁ ନ ଥିବେ। ସେବେଠାରୁ ମୋ ଚିନ୍ତାଧାରା ବଦଳିଯାଇଥିଲା ବୋଲି କୋହଲି କହିଥିଲେ।
