ଶାରଜା,୧୨।୧୦: ଟିମ ଇଣ୍ଡିଆର ଅଧିନାୟକ ବିରାଟ କୋହଲି କୋଲକାତା ନାଇଟ ରାଇଡର୍ସ (କେକେଆର୍) ବିପକ୍ଷରେ ଆଇପିଏଲ ଅଧିନାୟକତ୍ୱର ଶେଷ ମ୍ୟାଚ ଖେଳିଛନ୍ତି। ଏହି ଆଇପିଏଲ ସିଜନ ପରେ ସେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ର ଅଧିନାୟକ ପଦରେ ରହିବେ ନାହିଁ ବୋଲି ବିରାଟ କୋହଲି ପୂର୍ବରୁ ଘୋଷଣା କରିଛନ୍ତି। ତାଙ୍କ ଅଧିନାୟକତ୍ୱର ଶେଷ ଆଇପିଏଲ ମ୍ୟାଚରେ କୋହଲି ହୃଦୟ ଭାଙ୍ଗିଥିଲେ। ଆଇପିଏଲ ୨୦୨୧ର ଏଲିମିନେଟର ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳ କୋଲକାତା ନାଇଟ ରାଇଡର୍ସ (କେକେଆର୍)ଠାରୁ ୪ ଉଇକେଟରେ ପରାସ୍ତ ହୋଇ ଫାଇନାଲ ଦୌଡ଼ରୁ ବାହାରିଛି।
ବିରାଟ କୋହଲି ୭ ବର୍ଷ ଧରି ଆରସିବିର ଅଧିନାୟକ ରହିଆସିଛନ୍ତି, କିନ୍ତୁ ତାଙ୍କ ଅଧିନାୟକତ୍ୱରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳ ଗୋଟିଏ ବି ଆଇପିଏଲ ଟାଇଟଲ ଜିତି ନାହିଁ। ଟ୍ରଫି ଜିତିବାର ସ୍ବପ୍ନ ଭାଙ୍ଗିବା ପରେ ବିରାଟ କୋହଲି କହିଛନ୍ତି ଯେ, ଯେପର୍ଯ୍ୟନ୍ତ ସେ ଏହି ଆଇପିଏଲରେ ଖେଳିବେ, ସେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ଦଳ ସହ ଜଡିତ ହେବେ। ମୁଁ ଦଳରେ ଏଭଳି ସଂସ୍କୃତି ସୃଷ୍ଟି କରିବାକୁ ଚେଷ୍ଟା କରିଛି, ଯେଉଁଥିରେ ଯୁବକମାନେ ଆସି ଆକ୍ରମଣାତ୍ମକ ଖେଳ ପ୍ରଦର୍ଶନ କରିପାରିବେ। ମୁଁ ଭାରତୀୟ ଦଳ ପାଇଁ ମଧ୍ୟ କରିବାକୁ ଚେଷ୍ଟା କରିଛି। ମୁଁ କେବଳ କହିବି ଯେ ମୁଁ ମୋର ୧୨୦ ପ୍ରତିଶତ ଦଳକୁ ଦେଇଛି ଏବଂ ଏହା ପରେ ମଧ୍ୟ ଜଣେ ଖେଳାଳି ଭାବରେ ଦେବି।
ସେ ଆହୁରି ମଧ୍ୟ କହିଛନ୍ତି, ମୁଁ କେବଳ ଆରସିବି ପାଇଁ ଖେଳିବି। ବିଶ୍ୱସ୍ତତା ମୋ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଏହି ଦଳ ସହିତ ମୋର ସହଭାଗିତା ଆଇପିଏଲରେ ମୋର ଶେଷ ଦିନ ପର୍ଯ୍ୟନ୍ତ ଚାଲିବ। ଏହା ସହିତ ବିରାଟ କୋହଲିଙ୍କ ଆଇପିଏଲ ଟ୍ରଫି ଜିତିବାର ସ୍ବପ୍ନ ପୁଣି ଥରେ ଭାଙ୍ଗି ଯାଇଛି। ବିରାଟ ଗତ ୧୩ ବର୍ଷ ଧରି ଏହି ଟ୍ରଫି ଜିତିବାକୁ ଚେଷ୍ଟା କରୁଛନ୍ତି, କିନ୍ତୁ ପ୍ରତ୍ୟେକ ଥର ହାରିଯାଇଛନ୍ତି। ଏହି ଦଳ ମଧ୍ୟ ୩ ଥର ଫାଇନାଲ ଯାତ୍ରା କରିଛି, କିନ୍ତୁ ପ୍ରତ୍ୟେକ ଥର ଅନ୍ୟ ଦଳ ଆରସିବିକୁ ପରାସ୍ତ କରି ଟ୍ରଫି ଉଠାଇଛନ୍ତି।
