ଅହମ୍ମଦାବାଦ,୧୪।୩ : ପ୍ରଥମ ମ୍ୟାଚ୍ରେ ଶୋଚନୀୟ ପରାଜୟ ପରେ ଦମଦାର ପ୍ରତ୍ୟାବର୍ତ୍ତନ କରିଛି ଭାରତ। ଇଂଲଣ୍ଡ ବିପକ୍ଷ ଦ୍ୱିତୀୟ ଟି୨୦ ମ୍ୟାଚ୍କୁ ୭ ଉଇକେଟରେ ଜିତି ନେଇଛି ବିରାଟ କୋହଲିଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ। ଅଧିନାୟକ କୋହଲି ଓ ପଦାର୍ପଣକାରୀ ବ୍ୟାଟ୍ସମ୍ୟାନ ଇଶାନ କିଷାନଙ୍କ ପାଓ୍ବାରଫୁଲ ଅର୍ଦ୍ଧଶତକ ବଳରେ ଭାରତକୁ ମିଳିଛି ଏହି ବିଜୟ। ଏହି ବିଜୟ ସହ ୫ ମ୍ୟାଚ୍ ବିଶିଷ୍ଟ ସିରିଜ୍ ଏବେ ୧-୧ର ବରାବର ସ୍ଥିତିରେ ପହଞ୍ଚିଛି।
ପ୍ରଥମ ମ୍ୟାଚ୍ ଭଳି କାକର ସମସ୍ୟାକୁ ଦୃଷ୍ଟିରେ ରଖି ପ୍ରଥମେ ବୋଲିଂ ବାଛିଥିଲେ ଟସ୍ ଜିତିଥିବା ଅଧିନାୟକ। ଏଥର ଭଲ ଥିଲା କୋହଲିଙ୍କ ଭାଗ୍ୟ। ନିୟମିତ ବ୍ୟବଧାନରେ ଉଇକେଟ ହରାଇବା ଯୋଗୁ ବଡ଼ ସ୍କୋର ଛିଡ଼ା କରିପାରି ନ ଥିଲା ଇଂଲଣ୍ଡ। ଭ୍ରମଣକାରୀ ଦଳ ୨୦ ଓଭରରେ ୬ ଉଇକେଟ ହରାଇ ୧୬୪ ରନ୍ କରିବାକୁ ସକ୍ଷମ ହୋଇଥିଲା। ଦଳ ପାଇଁ ଜାସନ ରୟ ୪୬, ଅଧିନାୟକ ଇଆନ ମୋର୍ଗାନ ୨୮, ଦାଓ୍ବିଦ ମଲାନ ଓ ବେନ ଷ୍ଟୋକ୍ସ ୨୪ ରନ୍ କରିଥିଲେ। ଓ୍ବାଶିଂଟନ ସୁନ୍ଦର ଓ ଶାର୍ଦ୍ଦୁଳ ଠାକୁର ହାତେଇଥିଲେ ୨ ଲେଖାଏ ଉଇକେଟ। ଜବାବରେ ଇଂଲଣ୍ଡ ଭଳି ଭାରତ ମଧ୍ୟ ପ୍ରଥମ ଓଭରରେ ହିଁ ହରାଇଥିଲା ତା’ର ଓପନରଙ୍କ ଉଇକେଟ। ଲୋକେଶ ରାହୁଲ ଖାତା ଖୋଲିବା ପୂର୍ବରୁ ଆଉଟ୍ ହେବା ପରେ ଅଧିନାୟକ କୋହଲି ଓ ଇଶାନ ଦ୍ୱିତୀୟ ଉଇକେଟ ପାଇଁ ଯୋଡ଼ିଥିଲେ ବିସ୍ଫୋରକ ୯୪ ରନ୍ । ଇତି ମଧ୍ୟରେ କ୍ୟାରିୟରର ପ୍ରଥମ ଅର୍ଦ୍ଧଶତକ ପୂରଣ କରିଥିଲେ ଇଶାନ। ସେ ଆଉଟ୍ ହେବା ପୂର୍ବରୁ ୩୨ ବଲରେ ୫ ଚୌକା ଓ ୪ ଛକା ବଳରେ ୫୬ ରନ୍ କରିଥିଲେ। ଏହାପରେ ଋଷଭ ପନ୍ତଙ୍କ ସହ ମିଶି ଦଳୀୟ ସ୍କୋରରେ ୩୬ ରନ୍ ଯୋଡ଼ିଥିଲେ କୋହଲି। ଏଥି ଯୋଗୁ ୧୭.୫ ଓଭରରେ ହିଁ ୧୬୬ ରନ୍ର ବିଜୟ ଲକ୍ଷ୍ୟ ହାସଲ କରି ନେଇଥିଲା ଭାରତ। କୋହଲି ସର୍ବାଧିକ ୭୩ ( ୫ ଚୌକା ଓ ୩ ଛକା) ଓ ଶ୍ରେୟାସ ଆୟାର ୬ ରନ୍ କରି ଅପରାଜିତ ଥିଲେ।
