ନୂଆଦିଲ୍ଲୀ, ୧୯।୧- ଅଷ୍ଟ୍ରେଲିଆରେ ଅଷ୍ଟ୍ରେଲିଆର ଗର୍ବ ଭାଙ୍ଗିବା ପରେ ଟିମ୍ ଇଣ୍ଡିଆର ପରବର୍ତ୍ତୀ ଟାର୍ଗେଟରେ ହେଉଛି ଇଂଲଣ୍ଡ। ଆଗାମୀ ଇଂଲଣ୍ଡ ବିପକ୍ଷ ଘରୋଇ ଟେଷ୍ଟ ସିରିଜର ପ୍ରଥମ ୨ଟି ମ୍ୟାଚ ପାଇଁ ମଙ୍ଗଳବାର ଘୋଷିତ ହୋଇଯାଇଛି ୧୮ ଜଣିଆ ଭାରତୀୟ ଦଳ। ଅଧିନାୟକ ବିରାଟ କୋହଲି, ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଓ ଅଭିଜ୍ଞ ଦ୍ରୁତ ବୋଲର ଈଶାନ୍ତ ଶର୍ମା ଦଳକୁ ଫେରିଛନ୍ତି। ଫିଟ୍ ହେବା ପରେ ଯଶପ୍ରୀତ୍ ବୁମ୍ରା ଓ ରବିଚନ୍ଦ୍ରନ ଅଶ୍ୱିନଙ୍କୁ ଦଳରେ ସାମିଲ କରାଯାଇଛି। ଏମାନଙ୍କ ବ୍ୟତୀତ ଦଳରେ ସ୍ଥାନ ପାଇଛନ୍ତି ବ୍ରିସବେନ ଟେଷ୍ଟର ହିରୋ ଶାର୍ଦ୍ଦୁଳ ଠାକୁର, ଓ୍ବାଶିଂଟନ ସୁନ୍ଦର ଓ ମହମ୍ମଦ ସିରାଜ।
ଚେତନ ଶର୍ମାଙ୍କ ନେତୃତ୍ୱାଧୀନ ନୂଆ ଜାତୀୟ ଚୟନ କମିଟି ଆଗାମୀ ଇଂଲଣ୍ଡ ସିରିଜ ପାଇଁ ଦଳ ଚୟନ କରିଛି। ଭର୍ଚୁଆଲ ପ୍ଲାଟ୍ଫର୍ମ ମାଧ୍ୟମରେ ବୈଠକ ସହ ଯୋଡ଼ି ହୋଇଥିଲେ ଅଧିନାୟକ ବିରାଟ। ବୈଠକରେ ଯୋଗ ଦେଇଥିବା ଅନ୍ୟ ଚୟନକର୍ତ୍ତାମାନେ ହେଲେ ସୁନୀଲ ଜୋଶୀ, ଆବେ କୁରୁଭିଲା, ଓଡ଼ିଶାର ଦେବାଶିଷ ମହାନ୍ତି ଓ ହରବିନ୍ଦର ସିଂ। ଦଳ ସହ ୪ ଷ୍ଟାଣ୍ଡବାଇ ଖେଳାଳିଙ୍କ ନାମ ଘୋଷଣା କରିଛନ୍ତି ଚୟନକର୍ତ୍ତାମାନେ। ଏହି ଖେଳାଳିମାନେ ଭାରତୀୟ ଦଳ ସହିତ ଯାତ୍ରା କରିବେ ନାହିଁ। ଯଦି କୌଣସି ଖେଳାଳି ଆହତ ହୁଅନ୍ତି, ତାଙ୍କ ସ୍ଥାନରେ ଖେଳିବେ। ଏହା ବ୍ୟତୀତ କୋଭିଡ ମହାମାରୀ ଗାଇଡ୍ଲାଇନ୍କୁ ଦୃଷ୍ଟିରେ ରଖି ୫ ନେଟ୍ ବୋଲରଙ୍କୁ ମଧ୍ୟ ଚୟନ କରାଯାଇଛି।
ଭାରତୀୟ ଦଳ : ରୋହିତ ଶର୍ମା, ଶୁବମନ ଗିଲ୍, ମୟଙ୍କ ଅଗ୍ରଓ୍ବାଲ, ଚେତେଶ୍ୱର ପୂଜାରା, ବିରାଟ କୋହଲି (ଅଧିନାୟକ), ଅଜିଙ୍କ୍ୟ ରାହାନେ, ରିଷଭ ପନ୍ତ, ରିଦ୍ଧିମାନ ଶାହା, ହାର୍ଦ୍ଦିକ ପାଣ୍ଡ୍ୟା, ଲୋକେଶ ରାହୁଲ(ଫିଟ୍ ହେଲେ ଖେଳିବେ), ଯଶପ୍ରୀତ୍ ବୁମରା, ଈଶାନ୍ତ ଶର୍ମା, ମହମ୍ମଦ ସିରାଜ, ଶାର୍ଦ୍ଦୁଳ ଠାକୁର, ରବିଚନ୍ଦ୍ରନ ଅଶ୍ୱିନ, କୁଲଦୀପ ଯାଦବ, ଓ୍ବାଶିଂଟନ ସୁନ୍ଦର ଓ ଅକ୍ଷର ପଟେଲ।
ଷ୍ଟାଣ୍ଡବାଇ ଖେଳାଳ: ଶାହାବାଜ ନଦୀମ, କେ.ଏସ୍. ଭରତ, ଅଭିମନ୍ୟୁ ଇଶ୍ୱରନ, ରାହୁଲ ଚହର। ନେଟ୍ ବୋଲର: ଅଙ୍କିତ ରାଜପୁତ, ଆଭେଶ ଖାଁ, ସନ୍ଦୀପ ଓ୍ବାରିୟର, କ୍ରିଷ୍ଣାପ୍ପା ଗୋଥାମ, ସୌରଭ କୁମାର।
