ଦୁବାଇ, ୨୫।୯: ଆଇପିଏଲ୍-୧୩ତମ ସଂସ୍କରଣର ୬ଷ୍ଠ ମୁକାବିଲାରେ ଗୁରୁବାର ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୯୭ ରନର ବୃହତ୍ ବ୍ୟବଧାନରେ କିଙ୍ଗ୍ସ ଇଲେଭେନ ପଞ୍ଜାବ ନିକଟରୁ ପରାସ୍ତ ହୋଇଥିଲା। ମ୍ୟାଚ୍ରେ ବିରାଟ ବ୍ୟାଟିଂରେ ବିଫଳ ହୋଇଥିବାବେଳେ ତାଙ୍କ ଅଧିନାୟକତ୍ୱକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ସେହିଭଳି ଶତକ ହାସଲକାରୀ ଲୋକେଶ ରାହୁଲଙ୍କ ଏକ କ୍ୟାଚ୍ ମଧ୍ୟ କୋହଲି ଡ୍ରପ୍ କରିଥିଲେ। କେବଳ ଏତିକିରେ କୋହଲିଙ୍କ ସମସ୍ୟା ଦୂର ହୋଇ ନ ଥିଲା। ଏହି ମ୍ୟାଚ୍ରେ ‘ସ୍ଲୋ ଓଭର ରେଟ୍’ ବୋଲିଂ ଲାଗି ବାଙ୍ଗାଲୋର ଅଧିନାୟକ ବିରାଟଙ୍କ ଉପରେ ଅର୍ଥଦଣ୍ଡ ଲାଗିଛି। ନିର୍ଦ୍ଧାରିତ ସମୟରେ ୨୦ ଓଭର ବୋଲିଂ କରିପାରି ନ ଥିବା ଯୋଗୁ ଅଧିନାୟକ ଭାବେ କୋହଲିଙ୍କୁ ୧୨ ଲକ୍ଷ ଟଙ୍କାର ଜରିମାନା କରାଯାଇଛି। ସ୍ଲୋ ଓଭର ଲାଗି ପଞ୍ଜାବ ଇନିଂସ ବହୁ ବିଳମ୍ବରେ ଶେଷ ହୋଇଥିଲା। ଆଇପିଏଲ୍ ନିୟମ ଅନୁଯାୟୀ ନିର୍ଦ୍ଧାରିତ ସମୟରେ ବୋଲିଂ ଶେଷ କରି ନ ପାରିଲେ ବୋଲିଂ ଦଳର ଅଧିନାୟକଙ୍କ ଉପରେ ଜରିମାନା କରାଯାଇଥାଏ। ଆଇପିଏଲ୍ର ଚଳିତ ତ୍ରୟୋଦଶ ସଂସ୍କରଣରେ ପ୍ରଥମଥର ଲାଗି କୌଣସି ଅଧିନାୟକଙ୍କ ଉପରେ ‘ସ୍ଲୋ ଓଭର ରେଟ୍’ ବୋଲିଂ ଲାଗି ଜରିମାନା କରାଯାଇଛି। ଉଲ୍ଲେଖଯୋଗ୍ୟ, ଯଦି କୋହଲି ଲଗାତର ଏହି ଭୁଲ ଦୋହରାଇବେ ତେବେ ତାଙ୍କୁ ଦଣ୍ଡ ସ୍ବରୂପ ପରବର୍ତ୍ତୀ ମ୍ୟାଚ୍ରୁ ବାସନ୍ଦ କରାଯିବ।
