ନୂଆଦିଲ୍ଲୀ, ୨୦ା୬(ପି.ଟି.): ମଣିପୁରରେ ଏକତା ଦିବସ ପାଳନକୁ ୨୪ ଘଣ୍ଟା ନ ପୂରୁଣୁ ସେଠାରେ ସାନି ହିଂସାକାଣ୍ଡ ଘଟିଛି। ରବିବାର ରାତିରେ ହୋଇଥିବା ସଂଘର୍ଷ ଓ ଗୁଳିମାଡ଼ରେ ଜଣେ ଯବାନ ଆହତ ହୋଇଛନ୍ତି। ବିଭିନ୍ନ ଜିଲାରେ ସଂଘର୍ଷ ଘଟିଥିବାର ଖବର ମିଳିଛି। ମଣିପୁର ଜନସାଧାରଣଙ୍କ ମଧ୍ୟରେ ଏକତା ସୃଷ୍ଟି ଲକ୍ଷ୍ୟରେ ପ୍ରତିବର୍ଷ ଜୁନ୍ ୧୮ରେ ସେଠାରେ ଏକତା ଦିବସ ପାଳନ କରାଯାଏ। ଏହି ଅବସରରେ ୨୦୦୧ ଜୁନ୍ ୧୮ ଆନ୍ଦୋଳନରେ ପ୍ରାଣବଳି ଦେଇଥିବା ୧୮ ଜଣଙ୍କୁ ସମ୍ମାନ ପ୍ରଦର୍ଶନ କରାଯାଇଥିଲା। ଇମ୍ଫାଲ ଇଷ୍ଟ୍ର କାଣ୍ଟୋ ସବାଲ ଅଞ୍ଚଳରୁ କେତେଜଣ ସଶସ୍ତ୍ର ବ୍ୟକ୍ତି ଚିଙ୍ଗମାଙ୍ଗ ଗାଁ ଆଡ଼କୁ ହଠାତ୍ ଗୁଳି ଚଳାଇବାରୁ ସେଠାରେ ମୁତୟନ ଥିବା ଜଣେ ଯବାନ ଆହତ ହୋଇଥିଲେ। ତାଙ୍କୁ ସାମରିକ ହସ୍ପିଟାଲରେ ଭର୍ତ୍ତି କରାଯାଇଛି। ଏଥିସହିତ ଦୁର୍ବୃତ୍ତମାନେ କେତେକ ଘରେ ନିଆଁ ଲଗାଇଦେଇଥିଲେ। ସେନା ଯବାନମାନେ ପାଲଟା ଜବାବ ଦେବା ସହ ନିଆଁ ଲିଭାଇଥିଲେ। ଉକ୍ତ ଅଞ୍ଚଳକୁ ଅଧିକ ସୁରକ୍ଷା ବଳ ପଠାଯାଇଛି।
ବ୍ୟତୀତ ଇମ୍ଫାଲ ଓ କାଙ୍ଗପୋକ୍ସି ଜିଲା ସୀମାରେ ସଂଘର୍ଷ ଘଟିଛି। ଏହି ସଂଘର୍ଷ ବେଳେ କୁକି ସମ୍ପ୍ରଦାୟର କେତେଜଣ ଅଜଣା ଲୋକ ଦୁଇଟି ପ୍ରତିଷ୍ଠାନକୁ ଭଙ୍ଗାରୁଜା କରିଛନ୍ତି। ଅନ୍ୟପକ୍ଷରେ କୁକିମାନେ ରହୁଥବା ହେଙ୍ଗଜାଙ୍ଗ ଗ୍ରାମରେ ଗୁଳିକାଣ୍ଡ ଘଟିଥିବା ଖବର ମିଳିଛି। କୁକି ଏବଂ ମେଇତି ସମ୍ପ୍ରଦାୟ ମଧ୍ୟରେ ବିବାଦରୁ ଦେଢ଼ମାସ ହେଲା ମଣିପୁରରେ ହିଂସା ଜାରି ରହିଛି। ଶତାଧିକ ଲୋକ ଏହି ହିଂସାକାଣ୍ଡରେ ପ୍ରାଣ ହରାଇଲେଣି ଓ ଅନେକ ହଜାର ବାସହରା ହୋଇଛନ୍ତି। ଉତ୍ତରପୂର୍ବାଞ୍ଚଳ ରାଜ୍ୟ ଜଳୁଥିବାବେଳେ ଶାନ୍ତି ଫେରାଇ ଆଣିବାରେ ସରକାର ବିଫଳ ହୋଇଛନ୍ତି।
ହିଂସା କ୍ଷତିଗ୍ରସ୍ତ ମଣିପୁର ସ୍ଥିତିକୁ ନେଇ କଂଗ୍ରେସ ସୋମବାର ପୁଣିଥରେ କେନ୍ଦ୍ରକୁ ସମାଲୋଚନା କରିଛି। ବିତୁଥିବା ପ୍ରତ୍ୟେକ ଦିନକୁ ଅବହେଳା କରାଯାଉଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଭାଜପା ବିବାଦକୁ ଦୀର୍ଘଦିନ ପର୍ଯ୍ୟନ୍ତ ଜାରି ରଖିବାକୁ ଚାହୁଁଥିବା ସ୍ପଷ୍ଟ ହୋଇଛି ବୋଲି କଂଗ୍ରେସ କହିଛି। ମଣିପୁରକୁ ସର୍ବଦଳୀୟ ପ୍ରତିନିଧି ପଠାଇବାକୁ ପୂର୍ବରୁ କଂଗ୍ରେସ ଦାବି କରିଥିଲା। କଂଗ୍ରେସ ସାଧାରଣ ସମ୍ପାଦକ (ସଂଗଠନ) କେ.ସି. ବେଣୁଗୋପାଳ କହିଛନ୍ତି, ୪୯ ଦିନ ହେଲା ମଣିପୁର ଜଳୁଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଣିପୁର ସଙ୍କଟ ଉପରେ ଗୋଟିଏ ବି ଶବ୍ଦ ଉଚ୍ଚାରଣ ନ କରି ୫୦ତମ ଦିନରେ ବିଦେଶ ଗସ୍ତରେ ଯାଉଛନ୍ତି। ଏହି ରାଜ୍ୟରେ ଶତାଧିକ ପ୍ରାଣ ହରାଇଥିବାବେଳେ ହଜାର ହଜାର ଲୋକ ବାସହରା ହୋଇଛନ୍ତି। ଅନେକ ଚର୍ଚ୍ଚ ଓ ଉପାସନା ସ୍ଥଳ ଧ୍ୱଂସ ହୋଇଛି। ରାଜ୍ୟ ପ୍ରଶାସନ ସମାଧାନ କରିବା ପରିବର୍ତ୍ତେ ସମସ୍ୟାର ଅଂଶବିଶେଷ ସାଜିଛନ୍ତି।
